Liv Matye
Chapit 2
Klike la pou koute lekti chapit sa1
Alò, lè Jezi te fèt nan Bètleyèm nan rejyon Jide a, nan tan wa Ewòd la, twouve ke kèk maj, ki te soti nan zòn lès la, antre Jerizalèm.
2
Yo t ap di: Kibò l ye, wa Jwif ki fèt la? Paske, nou wè zetwal li nan zòn lès la, e nou vini la a pou nou adore li.
3
Lè wa Ewòd tande bagay sa yo, li te twouble; e tout vil Jerizalèm nan, menm jan ak li.
4
Epi, lè li reyini ansanm tout chèf prèt yo ak pwofesè Lalwa pèp la, li mande yo, ki kote Kris la ta dwe fèt.
5
Epi, yo di li, nan Bètleyèm, rejyon Jide a, paske se konsa pwofèt yo te ekri:
6
E, Ou menm Bètleyèm, sou tè Jide a, ou pa pi piti pami prens Jida yo non, paske se nan ou ke yon Gouvènè gen pou soti, li gen pou dirije Izrayèl, pèp Mwen an.
7
Apre sa, Ewòd, lè l fin rele maj yo apa, li te prese pran enfòmasyon nan men yo, kilè zetwal la te parèt.
8
Epi, li voye yo Bètleyèm, e li di yo: Ale, prese chèche jenn timoun nan, e lè nou jwenn li, pote komisyon ban mwen ankò, pou m ka vini, e pou m adore l tou.
9
Lè yo fin tande wa a, yo pati; e, twouve ke zetwal la, sa ke yo te wè nan zòn lès la, t ap deplase devan yo, jis li rive, epi l kanpe sou tèt kote jenn timoun nan te ye a.
10
Lè yo te wè zetwal la, yo te rejwi ak yon lajwa depase mezi;
11
Epi lè yo te antre nan kay la, yo wè timoun nan ak Mari, manman Li, epi yo tonbe ajenou, e yo adore Li; e, apre sa, yo louvri kòf trezò yo, epi yo prezante kado ba Li, lò, ak lansan, e ak lami.
12
E, kòm yo te jwenn avètisman kote Bondye pa yon rèv pouke yo pa t tounen bò kote Ewòd, yo pati retounen nan peyi yo, pa yon lòt wout.
13
E, lè yo te fin ale, twouve Zanj Senyè a parèt bay Jozèf nan yon rèv, li di l: leve, epi pran jenn timoun nan ak manman l; epi chape poul ou al ann Ejip; epi, rete la jiskaske mwen pot mesaj ba ou; paske Ewòd a pral chèche jenn timoun nan pou fè l peri.
14
Lè l leve, li pran jenn timoun nan ak manman Li pandan lannuit, epi l pati al ann Ejip;
15
E, li te ret la, pou jis lanmò Ewòd; se te pou sa te akonpli, pawòl pwofèt la, ki te di: Mwen rele Pitit Gason Mwen an soti kite Lejip.
16
Apre sa, Ewòd, lè li wè ke maj yo te pase l nan rizib, li te fache anpil; epi li voye tiye tout timoun ki te nan Bètleyèm ak nan tout alantou yo, apati de dezan e sa ki pi piti, dapre dat ke li te prese pran nan men maj yo.
17
Se konsa, sa pwofèt Jeremi te deklare a te akonpli, ki di:
18
Nan Rama, yo tande yon vwa, kriye ak rele anmwe, ak anpil tristès, se Rachèl k ap kriye pou pitit li yo, e li pa vle jwenn konsolasyon, paske yo pa la ankò.
19
Men, lè Ewòd mouri, twouve yon zanj Senyè a parèt nan yon rèv bay Jozèf ann Ejip,
20
pou di l: Leve, epi pran jenn timoun nan ak manman l, ale nan peyi Izrayèl, paske, moun ki t ap chèche pran lavi timoun nan, yo mouri.
21
Epi, li leve, li pran jenn timoun nan ak manman l, e li vini nan peyi Izrayèl.
22
Men, lè li tande ke se Akalayis ki te wa nan Jida, nan plas papa l, Ewòd; li te pè al la; e malgre sa, li jwenn yon avètisman de Bondye pa yon rèv, epi l vire tounen al nan zòn Galile a;
23
E li vin rete nan yon vil yo te rele Nazarèt; pou ke sa te akonpli, sa ki te ekri pa pwofèt yo: Li gen pou yo rele L yon Nazareyen.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!