Liv Matye
Chapit 5
Klike la pou koute lekti chapit sa1
Alèkile, lè Li wè foul moun nan, Li monte sou yon mòn, epi lè L chita, disip Li yo vin jwenn Li,
2
e, Li pran lapawòl, Li anseye yo, Li di:
3
Moun ki pòv nan lespri yo, se moun beni, paske se pou yo wayòm syèl la ye.
4
Moun ki nan tristès yo, se moun beni, paske yo va konsole.
5
Moun ki senp yo, se moun beni, paske y ap eritye latè.
6
Moun ki grangou e ki swaf dèyè ladwati yo, se moun beni, paske yo va ranpli.
7
Moun ki gen mizerikòd yo, se moun beni, paske yo va jwenn mizerikòd.
8
Moun kè pwòp yo, se moun beni, paske yo va wè Bondye.
9
Moun k ap travay pou fè lapè yo, se moun beni, paske yo va rele yo pitit Bondye.
10
Moun ke y ap pèsekite poutèt ladwati yo, se moun beni, paske se pou yo wayòm syèl la ye.
11
Nou menm, nou va beni, lè lèzòm ap avili nou, pesekite nou, epi pale tout kalite mal ki pa vre kont nou, poutèt Mwen menm.
12
Rejwi, e gen yon lajwa depase mezi, paske rekonpans nou nan syèl la gwo; paske, se konsa tou yo te pèsekite pwofèt yo ki te anvan nou yo.
13
Nou se sèl latè a, men, si sèl la pèdi gou l, ak kisa yo va sale l? Konsa, li vin pa itil pou anyen; men, pou jete, e pou voye l atè pou pase anba pye.
14
Nou se limyè lemonn. Yon vil ki sou yon mòn, pa ka kache.
15
Nonplis, yo pa limen balèn pou mete l anba yon panyen, men pito sou yon chandelye; epi l bay limyè bay tout moun ki nan kay la.
16
Kite limyè nou limen menm jan an tou devan lèzòm, dekwa pou yo wè bòn zèv nou yo, e pou yo bay glwa a Papa w ki nan syèl la.
17
Pa panse ke Mwen vini pou detwi Lalwa oswa pwofèt yo; Mwen pa vin pou M detwi, men pou M akonpli.
18
Paske anverite, Mwen di nou, ke toutotan syèl la ak tè a pa pase, nonplis tou, yon yota, oswa yon tirè nan Lalwa a p ap pase, jiskaske tout bagay akonpli.
19
Nenpòt moun alò, ki va vyole youn nan sa ki pi piti nan kòmandman yo, epi ki va anseye moun pou l fè l tou, y ap rele li pi piti nan wayòm syèl la; men, nenpòt moun ki suiv yo, epi ki anseye yo, Li menm, yo va rele l gran nan wayòm syèl la.
20
Paske, Mwen di nou, ke sofsi ladwati pa nou an, depase ladwati pa pwofesè Lalwa yo ak Farizyen yo, nou p ap rantre ann oken ka nan wayòm syèl la.
21
Nou tande ke sa te konn di pa zansèt nou yo: Ou pa gendwa tiye moun; e, nenpòt moun ki tiye moun va anba danje jijman an.
22
Men, Mwen di nou, ke nenpòt moun ki fache kont frè l, san rezon, va anba danje jijman an, e nenpòt moun ki ta di frè l: Raka! va anba danje Konsèy la; men nenpòt moun ki ta di: Enbesil! va anba danje dife lanfè a.
23
Alò konsa, si w pote yon ofrann nan lotèl la, epi lè sa a, ou vin sonje ke frè w gen yon bagay kont ou;
24
kite ofrann ou an devan lotèl la; epi, al fè wout ou; premyèman, rekonsilye ak frè w, e apre sa wa vin bay kado w la.
25
Antann ou ak advèsè w la vit pandan w sou wout avèk li, dekwa pou sa pa rive ke nenpòt ki lè li livre w bay jij la, epi pou jij la pa livre w bay lapolis, epi w fèmen nan prizon.
26
Anverite, Mwen di nou, pa gen okenn jan pou nou soti la a, san nou pa peye dènye lajan nou genyen.
27
Nou tande ke sa te konn di pa granmoun lontan yo, ou pa gendwa komèt adiltè;
28
men, Mwen di nou, ke nenpòt moun ki gade yon fi ak anvi pou li, komèt adiltè ak fi a nan kè l.
29
E, si je dwat ou ap lakòz ou chite, rache l, epi voye l jete byen lwen w, paske li pi pwofitab pou ou, ke youn nan manm ou yo ta peri, tan pou se ta tout kò w ki jete nan lanfè.
30
E, si men dwat ou ap lakòz ou chite, koupe l, epi voye jete l byen lwen w, paske li pi pwofitab pou ou, ke youn nan manm ou yo ta peri, tan pou se ta tout kò w ki jete nan lanfè.
31
Yo te konn di, nenpòt moun ki voye madanm li ale, kite l bay li yon papye divòs.
32
Men, Mwen di nou, ke nenpòt moun ki voye madanm li ale, eksepte nan ka fònikasyon, li lakòz ke madanm nan komèt adiltè; e, nenpòt moun ki ta marye ak madanm divòse sa a, komèt adiltè.
33
Epi ankò, nou tande ke sa te konn di pa granmoun lontan yo, ke w pa dwe sèmante sou sa k pa vre, men, ke w dwe akonpli pwomès ou fè bay Senyè a;
34
men, Mwen di nou, pa sèmante ditou, ni pa syèl la, paske se twòn Bondye li ye;
35
ni pa latè, paske se machpye L li ye;
36
nonplis, pa sèmante sou tèt nou, paske nou pa ka fè yon cheve swa blan, swa nwa.
37
Men, kite pou kominikasyon nou se wi, wi; non, non, paske, nenpòt sa ki anplis pase sa, soti nan lemal.
38
Nou tande ke sa te di: Èy pou èy, e dan pou dan;
39
men, Mwen di nou, se pa pou nou reziste lemal, men nenpòt moun ki ta frape bò dwat figi nou, vire lòt bò a ba li tou.
40
E, si yon moun pral rele nou nan tribinal, e si l vle pran kostim sou nou, kite l pran chemiz nou tou.
41
E, nenpòt moun ki fòse nou mache yon kilomèt, fè de kilomèt avè l.
42
Bay moun ki mande w, e, moun ki vle prete nan men w lan, pa vire do w ba li.
43
Nou tande ke yo te di, ou dwe renmen pwochen w, e rayi lènmi w.
44
Men, Mwen di nou, renmen lènmi nou, beni moun ki modi nou, e fè byen pou moun ki rayi nou, e, lapriyè pou sila yo ki trete nou mal, e ki pèsekite nou,
45
pou nou ka pitit Papa nou ki nan syèl la; paske, Li fè solèy Li a leve e sou move, e sou bon moun; epi, Li fè lapli tonbe e sou moun ki jis, e sou moun ki pa jis.
46
Paske, si nou renmen moun ki renmen nou, ki rekonpans pou nou ta gen la a? Èske menm pèseptè yo pa fè menm bagay la?
47
Epi, si w salye frè w yo sèlman, kisa w fè anplis la a pase lòt moun? Èske menm pèseptè yo pa fè sa tou?
48
Konsa donk, se pou nou bon nèt, jan Papa nou nan syèl la bon nèt la.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!