Liv Matye
Chapit 6
Klike la pou koute lekti chapit sa1
Fè atansyon pou nou pa fè lacharite nou devan lèzòm pou yo ka wè nou; si se pa sa, nou pa gen okenn rekonpans bò kote Papa nou ki nan syèl la.
2
Konsa, lè n ap fè lacharite nou, pa sonnen twonpèt devan nou, menm jan ipokrit yo fè nan sinagòg ak nan lari, dekwa pou yo ka jwenn glwa nan men lèzòm. An verite, Mwen di nou sa, yo jwenn rekonpans yo.
3
Men, lè w ap fè lacharite, pa kite men gòch ou konnen sa men dwat ou ap fè;
4
pou ke lacharite w la ka fèt ansekrè; e, Papa w ki wè ansekrè, Li va rekonpanse w aklè.
5
E, lè w ap lapriyè, ou pa dwe tankou ipokrit yo ye a; paske yo renmen lapriyè kanpe nan sinagòg ak nan kwen lari yo, pou ke yo ka gen moun ki wè yo. Anverite Mwen di nou sa, yo jwenn rekonpans yo.
6
Men ou menm, lòske w ap lapriyè, antre nan chanm ou, epi apre ke w fèmen pòt la, lapriyè Papa w ansekrè; e Papa w ki wè ansekrè, Li va rekonpanse w aklè.
7
Men, lè w ap lapriyè, pa itilize repetisyon san valè, tankou Payen yo fè li a; paske yo panse ke y ap tande yo akòz pale anpil yo a.
8
Konsa, pinga nou sanble ak yo, paske Papa nou konnen sa nou bezwen, depi anvan ke nou mande L.
9
Nou menm, suiv modèl lapriyè sa a: Papa nou ki nan syèl la, se pou non W sen,
10
se pou wayòm Ou an vini. Se pou volonte W fèt sou latè, tankou li fèt nan syèl la.
11
Ban nou jounen jodi a, pen chak jou a.
12
E, padonnen dèt nou yo, menm jan nou padonnen moun ki dwe nou yo.
13
Pa kondui nou anba tantasyon, men delivre nou anba sa ki mal; paske se pou Ou wayòm nan, e pouvwa a, ak laglwa a ye, pou toutan. Amèn.
14
Paske, si nou padonnen movèzaksyon moun, Papa nou ki nan syèl la ap padonnen nou tou;
15
men, si nou pa padonnen movèzaksyon moun, Papa nou p ap padonnen movèzaksyon nou nonplis.
16
Anplis de sa, lè n ap fè jèn, pa pran pòz tris nou menm jan ak ipokrit yo, paske yo fè figi yo fennen dekwa pou moun ka wè y ap fè jèn. Anverite, Mwen di nou sa, yo jwenn rekonpans yo.
17
Men ou menm, lè w ap fè jèn, pase lwil sou tèt ou, e lave figi w;
18
dekwa pou w pa parèt nan je moun, tankou moun k ap fè jèn, men bay Papa w ansekrè, e, Papa w ki wè ansekrè, Li va rekonpanse w aklè.
19
Pa anpile trezò pou tèt nou sou latè, kote mit ak lawouy ap gate yo, epi kote vòlè kase kay pou antre vòlè yo.
20
Anpile trezò pou tèt nou nan syèl, kote ni mit, ni lawouy pa ka gate yo, e kote vòlè pa ka ni kase kay, ni vòlè;
21
paske, kote trezò w ye, se la kè w ap ye tou.
22
Limyè kò a se je; konsa, si je w bon, tout kò w ap plen ak limyè.
23
Men, si je w pa bon, tout kò w ap plen ak fènwa. Konsa, si limyè ki nan ou a se fènwa a l ye, ala yon gwo fènwa, fènwa sa a ye!
24
Pèsonn pa ka sèvi de mèt; paske se swa l ap rayi youn, epi l renmen lòt la; oubyen ankò ke l kole sou youn, epi l meprize lòt la. Ou pa kapab sèvi Bondye ansanm ak Mamon.
25
Se poutèt sa Mwen di nou: pa chaje tèt nou ap kalkile sou lavi nou, kisa nou va manje, oubyen kisa nou va bwè; nonplis tou pou kò nou, kisa nou va met sou nou. Èske lavi a pa vo plis pase manje; epi kò a, plis pase rad?
26
Gade zwazo nan syèl yo; paske yo pa plante, ni yo pa rekòlte, e nonplis, yo pa rasanble met nan depo; epoutan, Papa nou ki nan syèl la ba yo manje. Èske nou pa vo plis pase yo?
27
Kiyès nan nou afòs li chaje tèt li kapab ajoute yon pous nan wotè l?
28
E pou kisa nou chaje tèt nou pou rad? Gade flè delis ki nan jaden yo, jan yo pouse; yo pa travay di, ni yo pa trikote;
29
e malgre sa, Mwen di nou sa, ke menm Salomon, nan tout laglwa li a, pa t abiye tankou youn nan yo.
30
Kidonk, si Bondye abiye zèb nan jaden konsa, ki la jodi, epi ki voye jete nan dife demen; èske Li p ap abiye nou plis pase sa, bann moun ti lafwa?
31
Kidonk, pa chaje tèt nou pou n ap di, kisa nou va manje? Oswa, kisa nou va bwè? Oswa, kisa nou va met sou nou?
32
(Paske se dèyè bagay sa yo Payen yo ap kouri;) alòske Papa nou ki nan syèl la konnen nou bezwen tout bagay sa yo.
33
Men, chèche premyèman wayòm Bondye a, ak dwati Li; epi tout bagay sa yo ap vin yon diplis pou nou.
34
Konsa donk, pa chaje tèt nou pou demen; paske demen va gen pou regle pwoblèm pa l. Pwoblèm pa chak jou kont pou li.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!