Liv Matye
Chapit 7
Klike la pou koute lekti chapit sa1
Pa jije, dekwa pou yo pa jije nou.
2
Paske se ak jijman ke w jije a, ke yo va jije w tou; e, se ak mezi ke w mezire a ke yo va mezire ba ou tou.
3
Epi, poukisa w ap gade pay ki nan je frè w la, men w pa konsidere madriye ki nan pwòp je pa w la?
4
Oubyen, kòman w kapab di frè w: Kite m retire pay la ki nan je w la; alòske, gade yon madriye ki nan pwòp je pa w?
5
Ou se yon ipokrit! Anpremye, wete madriye ki nan pwòp je pa w la; epi apre, ou va wè klè pou retire pay ki nan je frè w la.
6
Pa lonje bagay ki sen, bay chyen; nonplis tou, pa voye grenn pèl nou yo devan kochon, pou ke yo pa pile yo anba pye yo, lèfini yo vire kont nou pou depatcha nou.
7
Mande, epi yo va ban nou; chèche, epi n a va jwenn; frape, epi yo va louvri pou nou.
8
Paske, tout moun ki mande, resevwa; e, sila ki chèche, jwenn; e, pou sila ki frape, yo va louvri.
9
Oubyen, kiyès nan nou, si pitit gason l mande l pen, k ap ba l yon wòch?
10
Oubyen, si l mande yon pwason, k ap ba l yon sèpan?
11
Si nou menm alò, ki move moun, nou konn kijan pou n bay bon kado bay timoun nou yo, konbyen pi plis toujou ke Papa nou ki nan syèl la va bay bon bagay ba moun ki mande L?
12
Konsa donk, tout bagay sanzeksepsyon ke nou t a vle lèzòm fè pou nou, fè yo pou yo menm jan an tou; paske se sa ki Lalwa a ak pwofèt yo.
13
Antre nan ti pòtay sere a; paske pòtay laj la, ak chemen ki gran an, yo mennen moun nan pèdisyon; e, moun ki antre ladan yo anpil;
14
Alòske, se yon ti pòtay sere, yon chemen ki kwense, ki mennen a lavi; e, se yon ti kras moun ki jwenn li.
15
Fè atansyon ak fo pwofèt yo, ki vin sou nou ak abiman mouton sou yo, alòske pa anndan, se lou devoran yo ye.
16
Nou va konnen yo dapre fwi yo. Èske moun keyi rezen nan pikan, oswa figfrans nan bayawonn?
17
Konsa tou, tout bon pyebwa donnen bon fwi; men yon move pyebwa donnen move fwi.
18
Yon bon pyebwa pa kapab donnen move fwi; nitou yon move pyebwa pa ka donnen bon fwi.
19
Chak pyebwa ki pa donnen bon fwi, yo koupe l, epi yo jete l nan dife a.
20
Kifè, se dapre fwi yo ke w va rekonèt yo.
21
Se pa tout moun k ap di M: “Senyè, Senyè!” k ap antre nan wayòm syèl la; men, se sila ki fè volonte Papa Mwen ki nan syèl la.
22
Anpil moun va di M nan jou sa a: “Senyè, Senyè, èske nou pa t pwofetize nan non W? Epi, nan non W, nou te chase demon? Epi, nan non W, nou te fè anpil zak mèvèy?”
23
E lè sa a, M ap deklare yo: Mwen pa t janm konnen nou, soti sou Mwen, nou menm k ap komèt zak malveyan.
24
Donk, nenpòt ki moun ki tande bagay sa yo M ap di a, epi ki fè yo, M ap konpare l a yon moun ki gen sajès, ki bati kay li sou yon wòch;
25
e ansuit, lapli tonbe, epi lavalas desann, lèfini, van soufle al bat sou kay la; men li pa tonbe, paske li te bati sou yon wòch.
26
Alòske, tout moun ki tande bagay sa yo M ap di a, epi, ki pa fè yo, yo tankou yon egare, ki bati kay li sou sab.
27
E ansuit, lapli tonbe, epi, lavalas desann, lèfini, van soufle al bat sou kay la; lè sa a li tonbe; e, se pa ti gwo, tonbe l la te gwo!
28
Epi, sa ki vin rive, lè Jezi te fin di bagay sa yo, moun yo te sezi akoz ansèyman Li yo;
29
paske Li te anseye yo tankou yon moun ki plen otorite; yon jan ki pa menm ak pwofesè Lalwa yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!