Liv Matye
Chapit 8
Klike la pou koute lekti chapit sa1
Lè Li t ap desann sot sou mòn nan, yon gwo foul moun te suiv Li.
2
Epi, twouve vin gen yon nonm ki te gen lalèp, ki koube devan L pou adore Li, epi li di: Senyè, si se volonte W, Ou ka rann mwen pwòp.
3
E, Jezi lonje men L, epi Li touche l, Li di: Mwen vle; se pou w vin pwòp! Epi, menm lè a, lalèp nonm lan pirifye.
4
Epi, Jezi di li: Wè pou w pa di pèsonn sa; men, al fè wout ou, montre sakrifikatè a kò w, epi, bay ofrann ke Moyiz te kòmande a; se va yon temwayaj pou yo.
5
E, lè Jezi t ap antre Kapènawòm, te gen yon santenye ki pwoche kote L,
6
e, li di Li: Senyè, sèvitè m lan kouche lakay, li malad paralize, anba anpil soufrans.
7
Epi, Jezi di li: M ap rive e M ap geri l.
8
Santenye a reponn, Li di: Senyè, mwen pa merite pou W ta antre anba twati lakay mwen; men, di pawòl la sèlman, e sèvitè m nan va geri.
9
Paske m se yon nonm anba otorite, mwen gen sòlda anba m; e, mwen di nonm sa a: Ale! Epi l ale; e, a yon lòt: Vini! Epi l vini; e, a sèvitè m nan: Fè sa! Epi li fè l.
10
Lè Jezi tande sa, Li te etone, epi Li di moun ki t ap suiv Li yo: Anverite Mwen di nou sa, Mwen pa jwenn yon gwo lafwa konsa non; pa menm ann Izrayèl.
11
E, Mwen di nou sa, gen anpil moun ki va soti nan zòn Lès ak nan zòn Lwès, e yo va chita ak Abraram, ak Izarak, ak Jakòb, nan wayòm syèl la.
12
Men, pitit wayòm nan, y a va jete yo nan fènwa ki deyò a; a va gen kriye ak manje dan.
13
Epi Jezi di santenye a: Ou mèt al fè wout ou; e jan w te kwè a, se konsa sa pase pou ou. Epi, sèvitè li a te geri nan menm lè sa a.
14
Epi, lè Jezi te vin antre lakay Pyè, Li wè manman madanm li kouche, e malad ak yon lafyèv.
15
E, Li touche men li, epi, lafyèv la kite l; apre sa, manzè leve, ansuit li sèvi yo.
16
Lè apremidi vin rive, yo mennen bay Li anpil moun ki te posede pa demon; e, Li chase move lespri yo ak pawòl Li; epi, Li geri tout moun ki te malad yo.
17
Se pou sa te akonpli, pawòl pwofèt Ezayi a ki te di: Li pran enfimite nou yo, epi Li pote fado maladi nou yo!
18
Kounye a, lè Jezi wè yon foul moun antoure Li, Li pase lòd pou pati ale pa lòt bò a.
19
Epi, yon sèten pwofesè Lalwa pwoche kote L pou di L: Mèt, m ap suiv Ou nenpòt kote W ale.
20
Epi, Jezi di li konsa: Rena gen twou pa yo, e zwazo nan syèl la gen nich pa yo; men Pitit Gason Lòm nan pa gen kote pou poze tèt Li.
21
Epi, yon lòt nan disip Li yo di Li: Senyè, pèmèt ke m ale pou m antere papa m anvan.
22
Men, Jezi di li: Suiv Mwen; kite mò yo antere mò pa yo.
23
E, lè Li te antre nan yon kannòt, disip Li yo te suiv Li.
24
Epi twouve vin gen yon gwo tanpèt sou lanmè a; si tèlman, ke kannòt la te kouvri ak vag lanmè; epoutan, se dòmi Li t ap dòmi.
25
Lè sa a, disip yo vin kote L, e yo reveye l, yo di: Senyè, sove nou; n ap peri!
26
Epi, Li di yo: Poukisa nou pè a, bann moun ti lafwa? Alò, Li leve, epi Li fè van yo ak lanmè a obsèvasyon; epi te vin gen yon gwo kalmi.
27
Men, mesye yo te sezi, yo di: Ki kalite moun sa a ye, pou ke menm van ak lanmè twouve obeyi Li?
28
E, lè Li te rive pa lòt bò a, nan peyi Gadareyen yo, de nonm ki te posede pa demon pwoche kote L, yo te soti nan mitan tonm yo, yo te si tèlman sovaj, ke okenn moun pa t ka pase nan wout sa a.
29
Epi twouve, yo rele byen fò, yo di: Kisa nou genyen pou wè avèk Ou, Jezi, Ou menm Pitit Gason Bondye a. Èske W vin la a pou toumante nou anvan lè a?
30
E, pi lwen yo a, te gen yon twoupo kochon ki t ap manje.
31
Alò, demon yo sipliye Jezi, yo di Li: Si W ap chase nou, pèmèt ke n al nan twoupo kochon an.
32
Epi, Li di yo: Ale! E, lè yo soti, y ale nan twoupo kochon an; epi twouve ke tout twoupo kochon an nèt pran kouri ak vyolans, yo degrengole nan falèz, tonbe nan lanmè, e yo peri nan dlo a.
33
Alò, gadò kochon yo sove, epi y al fè wout yo nan vil la, e, yo rakonte tout bagay, ak sa ki te rive nonm ki te posede pa demon yo.
34
Epi, twouve tout vil la nèt soti vin rankontre Jezi; e, lè yo wè Li, yo sipliye Li pou Li pati kite zòn yo a.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!