Liv Matye
Chapit 10
Klike la pou koute lekti chapit sa1
Epi, apre ke L te rele douz disip Li yo vin jwenn Li, Li ba yo pouvwa kont move lespri, pou yo ka chase yo, epi pou yo geri tout kalite maladi ak tout sòt enfimite.
2
Kounye a, men non douz apot yo: premye a, se Simon, ke yo rele Pyè a, ak Andre frè l la; Jak, pitit gason Zebede a, ak Jan, frè l la;
3
Filip ak Batèlmi; Toma ak Matye, pèseptè a; Jak, pitit gason Alfe a, ak Lebeyis, ki te gen ti non Tade;
4
Simon, Kananeyen an, ak Jida Iskaryòt; ki te trayi L tou a.
5
Se douz sa yo ke Jezi voye ale, e Li kòmande yo, Li di: Pa pran wout ki ale kay Payen yo, e, nan kèlkeswa vil Samariten yo, pa antre;
6
men, ale pito kote mouton ki pèdi yo ki nan kay Izrayèl la.
7
Pandan nou prale, preche, di: Wayòm syèl la pre rive!
8
Geri moun malad yo, pirifye moun ki gen lalèp yo, leve moun mouri yo, chase demon; se gratis nou resevwa, se gratis tou pou nou bay.
9
Pa mete ni lò, ni ajan, ni monnen nan bous nou;
10
epitou, ni valiz pou vwayaj nou an, ni rad derechanj, ni soulye, ni menm baton; paske travayè a merite manje pa l la.
11
E, nan kèlkeswa vil oswa bouk nou va antre, chèche konnen kiyès moun ki merite resevwa nou; epi rete la jiskaske n ale.
12
E, lè nou antre nan yon kay, salye li.
13
Si kay la merite l, kite lapè nou an tonbe sou li; men, si li pa merite l, kite lapè nou an retounen vin jwenn nou.
14
Epi, nenpòt moun ki pa resevwa nou, ni ki pa tande pawòl nou yo, lè n aprale kite kay sa a oswa vil sa a, souke pousyè sot nan pye nou.
15
Anverite Mwen di nou sa, sa va pi tolerab pou vil Sodòm ak Gomò nan jou jijman an, ke pou vil sa a.
16
Gade, Mwen voye n ale tankou mouton nan mitan lou; konsa, se pou nou entelijan tankou sèpan, epi inofansif tankou pijon.
17
Men, fè atansyon ak lèzòm; paske y ap livre nou bay jij yo, epi y ap kale nou nan sinagòg yo.
18
E, nou gen pou yo mennen nou devan gouvènè ak wa poutèt Mwen menm, pou sèvi temwayaj kont yo e kont Payen yo.
19
Men, lè yo livre nou, pa reflechi ni kòman, ni kisa nou pral di; paske y a va ban nou nan menm moman an sa pou nou di.
20
Paske, se pa nou menm k ap pale, men se Lespri Papa nou k ap pale nan nou.
21
E, frè a gen pou livre frè a pou l mouri; e, papa a, pitit la; e, timoun yo gen pou soulve kont paran yo, e y ap lakòz yo tiye yo.
22
Epi, nou gen pou tout moun rayi nou akòz non Mwen; men, sila a ki kenbe fèm jiska lafen an va sove.
23
Men, lè yo pèsekite nou nan vil sa a, sove al nan yon lòt, paske anverite Mwen di nou sa, Nou p ap fin pase nan tout vil ann Izrayèl yo, anvan ke Pitit Gason Lòm nan gentan vini.
24
Disip la pa sou tèt mèt li; ni sèvitè a pa sou tèt senyè li.
25
Sa kont pou disip la pou li ta tankou mèt li; e pou sèvitè a, tankou senyè li. Si yo te rele mèt kay la Bèlzeboul, ki pi move non yo va bay moun lakay li yo?
26
Donk, pa pè yo; pa gen anyen ki kouvri, ki p ap dekouvri; e, anyen ki kache, ke yo p ap vin konnen.
27
Sa Mwen di nou nan fènwa, pale l nan limyè; e, sa yo di nou nan zorèy, preche l anlè tèt kay.
28
Epi, pa pè sila yo ki ka tiye kò a, men ki pa kapab tiye nanm nan; men pito, nou dwe pè Sila ki kapab detwi e nanm e kò nan lanfè a.
29
Èske de tizwazo pa vann pou yon santim? Epoutan, youn nan yo pa gendwa tonbe atè san volonte Papa w.
30
Alòske, tout cheve nan tèt pa nou konte.
31
Donk, pa pè; paske nou gen plis valè pase anpil tizwazo.
32
Konsa donk, nenpòt moun ki rekonèt Mwen devan lèzòm, li menm tou, M ap rekonèt li devan Papa M ki nan syèl la.
33
Men, nenpòt moun ki nye Mwen devan lèzòm, li menm tou, M ap nye li devan Papa M ki nan syèl la.
34
Pa panse ke Mwen vin pote lapè sou latè; Mwen pa vin pote lapè, men yon epe.
35
Paske, Mwen vin fè yon nonm kanpe kont papa l, e pitit fi a kont manman l, e bèlfi a kont bèlmè l.
36
E, lènmi yon nonm se va pwòp moun lakay li yo.
37
Yon moun ki renmen papa oswa manman plis pase Mwen, pa merite M; e, moun ki renmen pitit gason oswa pitit fi plis pase Mwen, pa merite M.
38
E, moun ki pa pran kwa l epi suiv Mwen, li pa merite M.
39
Moun ki jwenn lavi li a, va pèdi l; e, moun ki pèdi lavi li poutèt Mwen, l a va jwenn li.
40
Moun ki resevwa nou, resevwa Mwen; e, moun ki resevwa M, resevwa Sila ki voye Mwen an.
41
Moun ki resevwa yon pwofèt poutèt li se pwofèt, li va jwenn rekonpans yon pwofèt; e, moun ki resevwa yon nonm dwat poutèt li se yon nonm dwat, li va jwenn rekonpans yon nonm dwat.
42
E, nenpòt moun ki bay youn nan ti piti sa yo yon gode dlo fre pou bwè, sèlman difèt ke l se yon disip, anverite Mwen di nou sa, pa gen jan pou l pèdi rekonpans li a.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!