Liv Matye
Chapit 11
Klike la pou koute lekti chapit sa1
Apre sa, lè Jezi fin pase lòd bay douz disip Li yo, Li pati kite kote Li te ye a pou L al anseye e preche nan vil yo.
2
Kounye a, nan prizon an, lè Jan te vin tande travay Kris yo, li voye de nan disip li yo;
3
epi li mande Li: Èske W se Sila ki gen pou vini an, oubyen se pou nou tann yon lòt?
4
Jezi reponn, e Li di yo: Al rapòte bay Jan ankò bagay sa yo ke nou tande e ke nou wè yo:
5
Moun avèg yo vin kapab wè, moun bwete yo ka mache, moun ki gen lalèp, vin pirifye, e moun soud yo ka tande; moun mouri ap leve, epi moun pòv yo gen Bòn Nouvèl la preche ba yo.
6
E, nenpòt moun ki pa bite akòz Mwen, se moun beni.
7
Epi, pandan yo t a prale, Jezi kòmanse pale ak foul moun yo konsènan Jan: Kisa nou t al wè nan dezè a? Èske se te yon pye wozo van t ap soufle?
8
Alò, kisa l ye ke nou t al wè a? Èske se yon nonm ki te abiye ak bèl rad? Gade, moun ki abiye ak bèl rad yo, se kay wa yo ye.
9
Donk, kisa nou t al wè? Yon pwofèt? Wi, Mwen di nou! E, plis pase yon pwofèt.
10
Paske se li menm ke yo te ekri sou li a: Gade, Mwen voye mesaje Mwen an devan W, li va pare chemen W lan devan W.
11
Anverite, Mwen di nou sa: Pami moun ki pran nesans nan fanm, pa gen okenn ki leve vin pi gran pase Jan Batis; malgre sa, sila ki pi piti nan wayòm syèl la, pi gran pase l.
12
E, depi nan jou Jan Batis yo, jis pou kounye a, wayòm syèl la ap sibi vyolans; e, se moun ki vyolan ki pran l pa fòs.
13
Paske, tout pwofèt yo, ak Lalwa a te pwofetize jis rive sou Jan.
14
E, si nou vle konprann sa, se li ki Eli ki te gen pou vini an.
15
Moun ki gen zòrèy pou tande, tande!
16
Men, ak kisa pou Mwen t a konpare jenerasyon sa a? Li tankou timoun ki chita nan plas piblik, epi y ap rele lòt timoun parèy yo,
17
epi y ap di: Nou jwe flit pou nou, epi nou pa danse; nou chante chante tris pou nou, epi nou pa kriye!
18
Paske, Jan vini, li pa ni manje, ni bwè, epi yo di: Li gen yon demon!
19
Pitit Gason Lòm nan vini, Li manje e Li bwè, epi yo di: Gade, se yon gran manjè ak yon bwesonyè, zanmi pèseptè ak zanmi moun k ap viv nan peche! Men, lasajès jwenn jistis nan men pitit li yo.
20
Apre sa, Li pran repwoche vil kote pi fò nan mirak Li yo te fèt, paske yo pa t repanti:
21
Malè pou ou, Korazen, malè pou ou Betsayida! Paske, si mirak sa yo ki te fèt nan nou yo, se te nan Ti ak Sidon yo te fèt, yo t a repanti depi lontan nan rad an sak ak nan sann.
22
Men, Mwen di nou sa, l ap pi tolerab pou Ti ak Sidon nan Jou Jijman an, pase pou nou menm.
23
E Ou menm, Kapènawòm, ki elve jis nan syèl, yo va rale w desann nan lanfè; paske, si mirak ki te fèt nan ou yo te fèt nan Sodòm, li t ap la toujou jis jodi a.
24
Men, M ap di w ke l ap pi tolerab pou Sodòm nan Jou Jijman an, pase pou ou menm.
25
Epi nan moman sa a, Jezi reponn, Li di: Mwen remèsye W, O Papa, Senyè syèl la ak tè a, paske Ou te kache bagay sa pou moun save ak entelijan yo, e ke W revele yo bay tibebe.
26
Sa fèt fason sa a, Papa, paske se konsa sa fè W plezi.
27
Se tout bagay Papa M livre ban Mwen, e okenn moun pa konn Pitit Gason an, sof Papa a; nonplis tou okenn moun pa konn Papa a, sof Pitit Gason an, ak nenpòt kiyès moun ke Pitit Gason an ta bay revelasyon de Li.
28
Vin jwenn Mwen, nou tout k ap travay e k ap pote fado, epi M a ban nou repo.
29
Pran jouk Mwen an sou nou, e aprann nan men M; paske Mwen dou e Mwen gen kè sansib; konsa, nou va jwenn repo pou nanm nou.
30
Paske jouk Mwen an dous, e fado Mwen an lejè.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!