Liv Matye
Chapit 12
Klike la pou koute lekti chapit sa1
Alèkile, Jezi t ap travèse yon chan ble nan yon jou Saba, e, disip Li yo te grangou, epi yo kòmanse rache grap ble pou yo manje.
2
Men, lè Farizyen yo wè sa, yo di Li: Gade disip Ou yo ap fè sa ke Lalwa pa pèmèt moun fè nan jou Saba.
3
Men Li di yo: Èske nou pa li sa David te fè lè ke l te grangou ansanm ak moun ki te avèk li yo;
4
Kijan li antre nan kay Bondye a, epi li manje pen sakre yo, sa ke l pa t gen dwa manje dapre Lalwa; nonplis tou pou moun ki te avèk li yo, men se te pou sakrifikatè yo sèlman?
5
Oubyen, èske nou pa li nan Lalwa a, kijan nan jou Saba yo, sakrifikatè yo k ap sèvi nan tanp lan, vyole Saba a, san ke yo pa koupab?
6
Men, Mwen di nou sa, kote nou ye la a, gen youn ki pi gran pase tanp lan.
7
Men, si nou te konnen sa sa vle di: Mwen vle mizerikòd, e non pa sakrifis , nou pa t ap kondane inosan yo;
8
paske, Pitit Gason Lòm nan, se Mèt menm jou Saba sa a.
9
E, lè Jezi pati sot la a, Li ale nan sinagòg yo a;
10
epi, twouve te genyen yon nonm ki te gen yon men l ki te pòk. Alò, yo mande Li, yo di: Èske Lalwa pèmèt yo fè gerizòn jou Saba? Se pou yo te akize L.
11
Men, Li di yo: Kiyès pami nou la a, ki ta genyen yon mouton, e ke si l ta tonbe nan yon twou nan jou Saba, pou li pa ta pran l epi retire l sot nan twou a?
12
Ki valè yon moun genyen menm pase yon mouton? Konsa donk, Lalwa pèmèt yo fè byen nan jou Saba.
13
Apre sa, Li di nonm nan: Lonje men w! Alò, misye lonje men l, epi, men an vin nòmal menm jan ak lòt la.
14
Lè sa a, Farizyen yo soti, epi yo monte yon konplo kont Li, pou yo ka detwi L.
15
Men, lè Jezi vin konn sa, Li retire kò L la a; e, yon gwo foul moun suiv Li, epi Li geri yo tout;
16
Ansuit, Li avèti yo pou ke yo pa fè konnen kiyès Li ye.
17
Se dekwa pou sa te akonpli, sa pwofèt Ezayi te di a:
18
Gade Sèvitè Mwen an ke Mwen chwazi a, byenneme Mwen an, nan Li nanm Mwen jwenn plezi; M ap met Lespri Mwen sou Li, epi L ap anonse jijman a Payen yo.
19
Li p ap ni plede, ni rele, nonplis tou, pèsonn p ap tande vwa Li nan lari.
20
Li p ap kase yon wozo fele, e Li p ap tenyen yon mèch lanp k ap mouri, pou jis Li fè jijman gen laviktwa.
21
E, se nan non Li ke Payen yo va mete konfyans yo.
22
Apre sa, yo mennen youn ki te posede pa yon demon, li te avèg, e bèbè; epi Li geri l, kifè ke nonm ki te avèg ak bèbè a te ka, e wè, e pale.
23
E, tout moun yo te etone, yo t ap di: Èske se pa Li menm ki Pitit Gason David la?
24
Men, lè Farizyen yo tande sa, yo di: Nonm sa a ap chase demon pa Bèlzeboul, prens demon yo.
25
E, Jezi te konn panse nan tèt yo, Li di yo: Tout wayòm ki divize kont tèt li, ap devaste; e, tout vil oswa kay ki divize kont tèt li, p ap ka kanpe.
26
E, si Satan ap chase Satan, li divize ak pwòp tèt li, donk, kijan pou wayòm li an fè kanpe?
27
E, si se pa Bèlzeboul ke Mwen chase demon, pa kiyès pitit nou yo chase demon yo menm? Poutèt sa, se yo ki va jij nou.
28
Men, si Mwen chase demon pa Lespri Bondye, donk, wayòm Bondye a rive sou nou.
29
Oubyen ankò, kòman yon moun kapab antre lakay yon gwonèg, epi pou l piye byen l yo, eksepte si li ta mare gwonèg la anvan? Epi, se apre sa, ke li va piye kay la.
30
Moun ki pa avèk Mwen, li kont Mwen; e, moun ki p ap rasanble avèk Mwen, se gaye l ap gaye.
31
Se poutèt sa M ap di nou; Tout sòt de peche ak blasfèm a va jwenn padon pou lèzòm, men, blasfèm kont Lespri Sen an p ap jwenn padon pou lèzòm.
32
E, nenpòt moun ki di yon pawòl kont Pitit Gason Lòm nan, l ap jwenn padon; men nenpòt moun ki pale kont Sent Espri a, li p ap jwenn padon, ni nan monn sa a, ni nan monn k ap vini an.
33
Oswa w fè pyebwa a bon, epi fwi l bon; oubyen ankò ou fè l yon move pyebwa, ki bay move fwi; paske yo rekonèt yon pyebwa dapre fwi li.
34
Jenerasyon sèpan, kijan pou nou menm, jan nou move moun, pou nou ta pale de bon bagay? Paske se nan abondans sa ki nan kè moun ke bouch pale.
35
Yon bon moun, se nan bon kòfrefò kè li ke li rale bon bagay soti; e, yon move moun, se nan move kòfrefò kè li ke li rale move bagay soti.
36
Men, Mwen di nou sa, sèke, tout pawòl san sans ke moun di, yo gen pou rann kont de yo nan Jou Jijman an.
37
Paske se pa mwayen pawòl ou ke w ap jistifye, e se pa mwayen pawòl ou ke w ap kondane.
38
Apre sa, kèk pwofesè Lalwa ak Farizyen reponn, yo di: Mèt, nou ta renmen Ou fè yon siy pou n wè.
39
Men, Li reponn, Li di: Yon jenerasyon move moun ak moun adiltè ap chèche yon siy, e pa gen okenn siy ke y ap ba li, sof siy pwofèt Jonas la.
40
Paske menm jan Jonas te fè twa jou, twa nuit nan vant gwo pwason an, se konsa tou ke Pitit Gason Lòm nan va fè twa jou, twa nuit anndan zantray latè.
41
Mesye Niniv yo va kanpe nan Jijman an ak jenerasyon sa a, e yo va kondane l; paske yo menm, yo te repanti apre prèch Jonas la; e, gade, gen youn ki pi gran ke Jonas, ki isit la.
42
Rèn ki sot nan Sid la a va kanpe nan Jijman an ak jenerasyon sa a, e li va kondane l; paske li te sot jis nan pwent latè vin tande sajès Salomon an; epi, gade, gen youn ki pi gran ke Salomon, ki isit la.
43
Lè yon move lespri soti nan yon moun, li mache travèse kote ki sèch, l ap chèche repo, epi l pa jwenn anyen.
44
Alò, li di: m ap retounen lakay mwen, kote m te soti a; e, lè l rive, li jwenn li vid, byen bale, e byen ranje.
45
Lè sa a, l ale, epi l pran sèt lòt lespri ki pi mechan pase l, epi yo antre andedan e yo abite la; alò, dènye eta nonm nan, pi mal pase premye eta li te ye a. Se menm jan sa va ye pou jenerasyon mechan sa a.
46
Pandan Li t ap pale toujou avèk moun yo, twouve ke manman L ak frè Li yo te kanpe deyò a, yo te bezwen pale avè L.
47
Lè sa a, yon moun di L: Gade, men manman W ak frè W yo deyò a, yo bezwen pale avèk Ou.
48
Men, Li reponn, e Li di moun ki te vin di L sa a: Kiyès ki manman M? Kiyès ki frè M?
49
Epi, Li lonje men L sou disip Li yo, epi Li di: Gade, men manman Mwen ak frè Mwen!
50
Paske nenpòt moun ki fè volonte Papa M ki nan syèl la, se li menm ki frè M, sè M, e manman M.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!