Liv Matye
Chapit 13
Klike la pou koute lekti chapit sa1
Menm jou sa a, Jezi soti nan kay la, epi Li chita bò lanmè a.
2
Epi, yon gwo foul moun te rasanble toutotou L, ki fè ke L al monte sou yon kannòt pou L chita, epi tout foul la te kanpe bò rivaj la.
3
E, Li pale anpil bagay avèk yo an parabòl, Li di: Twouve, te gen yon kiltivatè ki te soti al simen semans.
4
E, lè li simen semans lan, kèk gren semans tonbe bò wout la; epi, zwazo vini yo devore yo;
5
kèk lòt tonbe nan kote ki plen wòch, kote ke yo pa jwenn ase tè; yo pouse menm lè a, paske tè a te san pwofondè;
6
E, lè solèy la leve, yo boule, e difèt ke yo pa t gen rasin, yo fennen.
7
Kèk lòt te tonbe nan mitan pikan, epi pikan yo pouse, yo toufe yo.
8
Men, gen lòt ki tonbe nan bon tè, epi ki donnen fwi, kèk donnen san, kèk swasant, kèk trant.
9
Sa ki gen zòrèy pou tande, tande!
10
Epi, disip yo vini, e yo di L: Poukisa W pale avèk yo an parabòl la?
11
Li reponn, e Li di yo: Se paske yo pèmèt nou pou nou konprann mistè yo nan wayòm syèl la, men, yo menm, yo pa pèmèt yo konprann yo.
12
Paske nenpòt moun ki genyen, se a li menm y ap bay, epi, l ap genyen ann abondans; men, nenpòt moun ki pa genyen, se de li ke yo va pran menm sa ke l te genyen an.
13
Konsa donk, Mwen pale ak yo an parabòl; paske yo gade, men yo pa wè; yo tande, men yo pa ni koute, ni konprann.
14
E, se nan yo ke pwofesi Ezayi a akonpli, sa ki di: N ap tande sa nou tande a, men nou p ap konprann; n ap gade sa nou gade a, men nou p ap wè;
15
Paske kè pèp sa a vin di, epi zòrèy yo lou pou tande, e, yo fèmen je yo, pou anpeche ke nenpòt ki lè yo ta wè ak je yo, e tande ak zòrèy yo, e pou yo ta konprann nan kè yo, e pou yo ta konvèti, e ke M ta geri yo.
16
Men, je nou beni, paske yo wè; zòrèy nou beni, paske yo tande.
17
Paske, anverite, Mwen di nou sa, anpil pwofèt ak nonm ki dwat te anvi wè bagay ke n ap wè la yo, e, yo pa wè yo; yo te anvi tande sa n ap tande la yo, e, yo pa tande yo.
18
Alò, nou menm, koute sans parabòl kiltivatè a.
19
Lè nenpòt moun tande pawòl wayòm nan, epi yo pa konprann li, lè sa a, Mechan an vini, epi li wete sa ki te simen nan kè l la. Se sila a ki te resevwa semans lan arebò wout la.
20
Men, sila ki te resevwa semans lan kote ki plen wòch la, se li menm ki tande pawòl la, epi menm lè a, li resevwa l ak lajwa;
21
epoutan, li pa t gen okenn rasin nan li menm, alò, se yon ti moman li dire, paske, lè tribilasyon oswa pèsekisyon leve akòz pawòl la, lapoula yo chite.
22
Sila a tou ki resevwa semans lan mitan pikan yo, se li menm ki tande pawòl la, epi, tèt chaje lavi a, ak twonpri richès sou latè, toufe pawòl la; konsa, li vin pa donnen fwi.
23
Men, sila ki resevwa semans nan bon tè a, se li menm ki tande pawòl la, e ki konprann li; se li tou ki donnen fwi, e ki pwodui, enpe bay san, enpe bay swasant, enpe trant.
24
Li ba yo yon lòt parabòl, Li di: Wayòm syèl la se tankou yon nonm ki simen bon semans ble nan jaden l;
25
men, pandan moun t ap dòmi, lènmi l vini, epi l simen ble mawon nan mitan ble a, lèfini l ale.
26
Men, lè flèch yo fleri epi yo donnen fwi, alèkile, ble mawon yo parèt tou.
27
Kifè ke sèvitè mèt jaden an pwoche, epi yo di li: Mesye, èske w pa t simen bon semans nan jaden w lan? Kote sa soti ke l gen ble mawon ladan l?
28
Li di yo: Yon lènmi m ki te fè sa. Sèvitè yo di li, Èske w ta vle n al sanble ble mawon yo ansanm?
29
Li di: Non, pou sa pa rive ke lè n ap rasanble ble mawon yo, nou pa rache bon ble a ansanm ak yo!
30
Kite toude pouse ansanm jis rive lè rekòt; e nan tan rekòt la, m a di travayè k ap rekòlte yo: Sanble ble mawon yo anvan, mare yo an pakèt pou n boule yo; men, sanble ble a nan depo m.
31
Li mete yon lòt parabòl devan yo, Li di: Wayòm syèl la tankou yon grenn moutad ke yon nonm pran epi l al simen l nan jaden l;
32
se li ki pi piti pase tout semans; men, lè l pouse, li pi gwo pase tout legim, epi l vin yon pyebwa, ansòt ke zwazo nan syèl la vin fè nich yo sou branch li.
33
Yon lòt parabòl Li ba yo ankò: Wayòm syèl la, se tankou poud elevasyon yon madanm pran, epi l simayen nan twa mezi farin, jouktan tout pat la leve.
34
Se tout bagay sa yo ke Jezi pale ak foul moun yo an parabòl, epitou, Li pa pale avèk yo san se pa an parabòl.
35
Se pou sa te akonpli pawòl pwofèt la, ki di: M ap louvri bouch Mwen an parabòl, M ap deklare bagay ki te rete an sekrè depi lemonn te kreye.
36
Apre sa, Jezi voye foul moun yo ale, epi, Li antre andedan kay la; alò, disip Li yo pwoche bò kote L, yo di: Eksplike nou parabòl ble mawon nan jaden an non.
37
Li reponn, Li di yo: Sila a ki simen bon semans lan se Pitit Gason Lòm nan;
38
Jaden an, se lemonn; bon semans lan, se pitit wayòm nan; men ble mawon yo, se pitit Mechan an;
39
lènmi ki te simen yo a, se dyab la, rekòt la se lafendimonn; e, sila k ap rekòlte yo, se zanj yo.
40
Konsa, tankou ble mawon yo sanble epi boule nan dife, se menm jan sa va ye nan lafendimonn.
41
Pitit Gason Lòm nan va voye zanj Li yo devan, e yo va rasanble deyò wayòm Li an tousa ki lakòz eskandal, e moun k ap komèt inikite yo;
42
e, y ap voye jete yo nan yon founèz dife; a va gen rèl ak manje dan.
43
Lè sa a, moun ki dwat yo va klere kon solèy nan wayòm Papa yo a. Yon moun ki gen zòrèy pou tande, kite l tande.
44
Epi ankò, wayòm syèl la tankou yon ja ki kache nan yon teren, ke lè yon nonm twouve l, li sere l; epi, kèkontan fè ke l al vann tousa ke l genyen, epi l achete teren an.
45
Epi ankò, wayòm syèl la tankou yon nonm ki se yon machann, ki t ap chèche bèl grenn pèl;
46
ke, lè li jwenn yon grenn pèl gwo valè, l ale, e li vann tousa l te genyen, epi l achte l.
47
Epi ankò, wayòm syèl la tankou yon privye ke yo te voye nan lanmè, epi ki te pran tout kalite pwason;
48
ke, lè l vin plen, yo rale l bò lanmè a, epi yo chita, e apre, yo triye sa ki bon yo mèt nan veso, men, yo voye jete sa k pa bon yo.
49
Se konsa sa va ye lè lafendimonn rive; zanj yo ap vin parèt, epi y ap wete mechan yo soti pami moun jis yo.
50
Epi yo va voye yo jete nan founèz dife a; a va gen rèl ak manje dan.
51
Jezi di yo: Èske nou konprann tout bagay sa yo? Yo di Li: Wi Senyè.
52
Alò, Li di yo: Konsa, chak pwofesè Lalwa ki pran konesans sou wayòm syèl la, li tankou yon nonm ki mèt yon kay, k ap rale bagay, e sa ki nèf, e sa ki Ansyen soti met deyò nan kòf li.
53
Epi, sa vin rive ke lè Jezi te fini ak parabòl sa yo, Li soti la a.
54
E, lè Li rive nan pwòp peyi Li, Li anseye yo nan sinagòg yo, si tèlman ke yo te sezi, epi yo te di: Kote nonm sa a bare ak sajès sa a, ak gran mirak sa yo?
55
Èske se pa Li menm ki se pitit gason bòs chapant lan? Se pa manman L ki rele Mari a? Epi, frè L yo rele Jak, Joz, Simon, ak Jid la?
56
Epi, sè Li yo, èske se pa yo ki la a avèk nou an? Donk, ki kote nonm sa a bare ak tout bagay sa yo?
57
E, yo te eskandalize akòz Li. Men, Jezi di yo: Yon pwofèt pa janm rete san lonè, sof nan pwòp peyi l, ak nan pwòp kay li.
58
Epi, Li pa fè anpil gran mirak la a, akòz pa kwè yo a.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!