Liv Matye
Chapit 14
Klike la pou koute lekti chapit sa1
Nan tan sa a, Ewòd, tetrak la, te tande renome Jezi,
2
Epi, li di sèvitè li yo: Se Jan Batis wi! Li resisite pami mò yo; se konsa gwo mirak sa yo ap fèt pa li menm.
3
Puiske se Ewòd ki te met men sou Jan, epi mare l, e mete l nan prizon, poutèt Ewodyas, madanm Filip, frè l la.
4
Paske Jan te di l: Lalwa pa ba w dwa pou w pran li.
5
E, li te vle tiye Jan, men, li te pè foul la, paske yo te rekonèt Jan kòm yon pwofèt.
6
Men, lè fèt Ewòd t ap fete, pitit fi Ewodyas la danse devan moun yo, e li te fè Ewòd plezi.
7
Jis rive ke misye fè l pwomès pa yon sèman, pou l ba manzè nenpòt sa l ta mande.
8
Alò, li menm, dapre enstriksyon manman l, li di: Ban mwen tèt Jan Batis, la a, nan yon plato.
9
E, wa a te regrèt; sepandan, poutèt sèman an, epi envite ki te la avèk li yo, li bay lòd pou yo pote l ba li.
10
Epi, voye al koupe tèt Jan Batis nan prizon an.
11
Se konsa, yo te pote tèt li nan yon plato, e, yo bay demwazèl la li; li menm, li pote l bay manman l.
12
Apre, disip li yo vini, yo pran kò a, yo antere l, epi y al di Jezi sa.
13
Lè Jezi tande sa, Li pati kite kote a sou kannòt, Li ale nan yon dezè, yon kote apa; e, lè moun yo te vin aprann sa, yo suiv Li apye, y ale kite vil yo.
14
Epi, Jezi debake, Li wè yon gwo foul, e, Li te gen konpasyon pou yo; apre, Li geri malad ki te pami yo.
15
Epi, lè aswè rive, disip Li yo pwoche kote L, yo di: Kote sa a se yon dezè, epi lè a fin pase, voye moun yo ale, dekwa pou yo al nan bouk yo, e y a achte pwovizyon pou tèt yo.
16
Men, Jezi di yo: Yo pa bezwen ale; nou menm, ba yo manje.
17
Alò, yo di Li: Se senk pen ak de pwason ase nou gen la a wi.
18
Li di: Pote yo isit ban Mwen.
19
Epi, Li kòmande foul la pou yo chita sou zèb la, e, Li pran senk pen yo ak de pwason yo, e, Li leve tèt Li gade syèl la, Li rann gras, Li kase yo, epi, Li bay disip yo pen yo; e, disip yo bay foul moun yo.
20
E, yo tout te manje, e, vant yo te plen; epi, yo ranmase moso ki te rete yo nan douz panyen byen plen.
21
E, kantite ki te manje a te senk milòm konsa, san konte fanm ak timoun.
22
Epi, menm lè a tou, Jezi fòse disip Li yo monte nan yon kannòt, pou yo pran devan L, ale sou lòt bò rivaj la, pandan ke Li menm, Li t ap voye foul moun yo ale.
23
Apre sa, lè Li fin voye foul moun yo ale, Li monte sou yon mòn pou kont Li, pou Li lapriyè; e lè aswè te rive, Li te la Li sèl Li.
24
Men, kannòt la, kounye a, te nan mitan lanmè a, vag yo t ap frape l, paske van an te nan sans kontrè.
25
Epi, vè katryèm vèy nuit la, Jezi al jwenn yo, Li mache sou lanmè a.
26
Alò, lè disip yo wè Li k ap mache sou lanmè a, yo te twouble, yo t ap di: Se yon lespri! Epi, yo pran rele byen fò paske yo te pè.
27
Men, menm lè a, Jezi pale ak yo, Li di: Pran kouraj, se Mwen Menm, pa pè.
28
Alò, Pyè reponn Li, e, li di: Senyè, si se Ou, ban m lòd pou m vin jwenn Ou sou dlo a.
29
E Li di: Vini non! Epi, lè Pyè soti desann sou kannòt la, li mache sou dlo a, pou l al jwenn Jezi.
30
Men, lè misye wè van an te fò, li vin pè; epi l kòmanse fè fon; li rele, li di: Senyè sove m!
31
E menm lè a, Jezi lonje men L, Li pran li, epi Li di l: Nonm ti lafwa, poukisa w te doute?
32
Epi, lè yo monte nan kannòt la, van an sispann.
33
Alò, sila yo ki te nan kannòt la vini e yo adore L, yo di: Tout bon vre Ou se Pitit Gason Bondye a!
34
E, lè yo fin travèse, yo koste sou tè Jenezarèt.
35
Alò, lè moun kote a te vin konn kiyès Li ye, yo voye ale ozalantou tout peyi a, epi yo pote ba Li tout sa k te malad yo.
36
Epi, yo sipliye Li pou yo annik manyen franj rad Li ase; e, valè moun ki te manyen L yo, tout te geri nèt.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!