Liv Matye
Chapit 16
Klike la pou koute lekti chapit sa1
Farizyen yo, ak Sadiseyen yo tou, te vini, yo te vle tante Jezi, yo mande L pou L fè yo wè yon siy ki soti nan syèl.
2
Li reponn, Li di yo: Lè aswè rive, nou di: ap fè bon tan, paske syèl la wouj.
3
Epi, nan maten: ap fè move tan jodi a, paske syèl la wouj, epi l kouvri. Ah, bann ipokrit! Atò, nou ka fè diferans nan bagay k ap pase nan syèl la, epi, pou siy tan sa a menm, nou pa kapab.
4
Yon jenerasyon moun k ap fè mal, ak moun adiltè ap chèche yon siy; ebyen, pa gen okenn siy ke y ap ba li, apa de siy Jonas la. Epi, Li kite yo, L ale.
5
Apre sa, disip Li yo rive sou lòt bò rivaj la, yo te bliye pran pen.
6
Jezi di yo: Fè atansyon ak ledven Farizyen ak Sadiseyen yo.
7
Alò, yo pran reflechi pami yo menm, yo t ap di: Èske se poutèt nou pa pran pen an?
8
Lè Jezi vin wè sa, Li di yo: Ah, nou menm ki gen ti lafwa; sa k fè n ap reflechi antre nou difèt ke nou pa pote pen an?
9
Èske nou pa konprann, nitou nou pa sonje senk pen pou senk milòm lan, epi, konbyen panyen nou te pran pou n ale?
10
Nonplis tou, sèt pen pou kat mil gason an; epi, ak konbyen panyen nou te ale?
11
Kijan fè nou pa konprann ke se pa de zafè pen Mwen t ap pale nou, lè M di fè atansyon ak ledven Farizyen ak Sadiseyen yo?
12
Lè sa a, yo vin konprann ke Li pa t mande yo fè atansyon ak ledven yo met nan pen an, men, ak doktrin Farizyen e Sadiseyen yo.
13
Lè Jezi rive nan zòn Sezare Filip, Li mande disip Li yo, Li di: Kiyès lèzòm di ke Mwen ye, Mwen menm, Pitit Gason Lòm nan?
14
Epi, yo di: Genyen ki di ke W se Jan Batis, genyen ki di Eli, gen lòt, Jeremi, oswa youn nan pwofèt yo.
15
Li di yo: Men, kiyès nou di ke Mwen ye?
16
Alò, Simon Pyè reponn, li di: Ou se Kris la, Pitit Gason Bondye vivan an.
17
Epi, Jezi reponn, Li di li: Ou beni, Simon, pitit gason Jonas la, paske se pa lachè ak san ki revele w sa, men, se Papa Mwen ki nan syèl la.
18
E, M ap di w sa tou, ou se Pyè, e se sou wòch sa a ke M ap bati legliz Mwen an; e, pòtay lanfè p ap kapab gen laviktwa sou li.
19
Epi, M ap ba w kle wayòm syèl la, e, nenpòt sa ou va mare sou latè, a va mare tou nan syèl la; e, nenpòt sa ou va lage sou latè, a va lage tou nan syèl la.
20
Apre sa, Li kòmande disip Li yo pou yo pa di pyès moun ke se Li, Jezi, ki Kris la.
21
Depi lè sa a, Jezi kòmanse montre disip Li yo kijan ke Li gen pou L ale Jerizalèm, epi pou Li soufri anpil bagay anba men Ansyen yo, sakrifikatè prensipal yo, ak pwofesè Lalwa yo, e, pou yo tiye L; apre, pou Li resisite sou twazyèm jou a.
22
Alò, Pyè pran L sou kote, li kòmanse fè L obsèvasyon, li di: Ke bagay sa a rete lwen W, Senyè! Sa pa gendwa rive W!
23
Men, Li vire, Li di Pyè: Demaske w devan M lan, Satan! Ou se yon eskandal pou Mwen, paske lide w pa sou bagay Bondye, men sou bagay lèzòm.
24
Apre, Jezi di disip Li yo: Si nenpòt moun vle mache dèyè Mwen, se pou l nye tèt li, epi pran kwa l, e suiv Mwen.
25
Paske, nenpòt moun ki ta vle sove lavi li, l ap pèdi l; e, nenpòt moun ki ta va pèdi lavi l poutèt Mwen, l ap jwenn li.
26
Paske, ki pwofi yon nonm tire si l ta va genyen lemonn antye, epi l pèdi pwòp nanm li? Oswa, kisa yon nonm a va bay kòm boukantay pou nanm li?
27
Paske, Pitit Gason Lòm nan va vini nan laglwa Papa a, avèk zanj Li yo; e, lè sa a, L ap bay chak moun rekonpans dapre travay ke l te fè.
28
Anverite, Mwen di nou sa, genyen ki kanpe isit la a, ki p ap goute lanmò jiskaske yo wè Pitit Gason Lòm nan vini nan wayòm Li.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!