Liv Matye
Chapit 17
Klike la pou koute lekti chapit sa1
E, si jou apre sa, Jezi pran Pyè, Jak ak Jan, frè li; Li mennen yo sou tèt yon mòn byen wo, pou kont yo.
2
Epi Li chanje figi devan yo, e, vizaj Li te klere kou solèy, e, rad Li te blan kou limyè.
3
Epi, kiyès ki twouve parèt sou yo, se Moyiz ak Eli, ki t ap pale ak Jezi.
4
Alò, Pyè reyaji, li di Jezi: Senyè, sa bon nèt pou nou la a isit la; si W vle, kite nou monte twa tant; youn pou Ou, youn pou Moyiz, youn pou Eli.
5
Pandan li t ap pale a, twouve yon nyaj klere vin kouvri yo; epi gen yon vwa ki soti nan nyaj la, ki di: Se Pitit Gason Mwen renmen anpil la, se nan Li Mwen jwenn plezi; se pou nou koute L!
6
E, lè disip yo tande li, yo tonbe sou fas, e yo te pè anpil.
7
Epi, Jezi vini, Li touche yo, e Li di: Leve, e pa pè!
8
E, lè yo leve je yo gade, yo pa wè pèsonn, eksepte Jezi sèl.
9
Pandan yo t ap desann mòn nan, Jezi ba yo lòd, Li di: Pa rakonte vizyon an bay pyès moun, pou jis Pitit Gason Lòm nan resisite pami mò yo.
10
Epi, disip yo poze Li yon kesyon. Yo di: Donk, poukisa pwofesè Lalwa yo di fòk Eli vin anvan an?
11
Jezi reponn, Li di yo: Se verite, Eli gen pou vin anvan, e l ap repare tout bagay.
12
Men, M ap di nou ke Eli vini deja, e yo pa t rekonèt li, epi yo fè l nenpòt sa yo te vle. Se menm jan an tou ke Pitit Gason Lòm nan gen pou Li soufri anba men yo.
13
Lè sa a, disip yo vin konprann ke Li t ap pale yo de Jan Batis.
14
E, lè yo rive bò kote foul moun yo, vin gen yon nonm ki parèt sou Li, li ajenou nan pye L, epi l di:
15
Senyè, gen mizerikòd pou pitit gason m nan; paske li gen malkadi, e l ap soufri anpil. Gen depafwa, li tonbe nan dife, e lòt fwa nan dlo.
16
Epi, mwen mennen l bay disip Ou yo, men yo pa t kapab geri l.
17
Alò, Jezi reponn, Li di: Ah, jenerasyon san lafwa e pèvèti! Konbyen tan pou M pase avèk nou? Konbyen tan pou M sipòte nou? Mennen l isit la ban Mwen!
18
Alò, Jezi fè dyab la obsèvasyon, epi li soti sou li; e, timoun nan te geri depi menm lè a.
19
Apre sa, disip yo pwoche kote Jezi apa, yo di: Sa k fè ke nou pa t kapab chase l?
20
Alò, Jezi di yo: Poutèt nou pa kwè; paske anverite, Mwen di nou sa, si nou te gen lafwa gwosè yon grenn moutad, nou ta di mòn sa a: Deplase w la! E, li ta va deplase; e, anyen pa t ap enposib pou nou.
21
Mentou, kalite sa a, p ap ale si se pa avèk lapriyè ak jèn.
22
E, pandan yo te rete nan Galile a, Jezi di yo: Pitit Gason Lòm nan gen pou yo trayi L, epi lage L nan men lèzòm.
23
Epi, yo va tiye L, e, sou twazyèm jou a, L ap leve ankò! E, sa te fè yo anpil lapenn.
24
Apre, lè yo rive Kapènawòm, pèseptè ki resevwa lajan taks yo, vin bò kot Pyè, yo di: Èske Mèt ou a peye taks?
25
Li di: Wi! Epi, pandan li t ap antre nan kay la, Jezi pran devan, Li di: Sa w panse, Simon? Nan men ki moun wa sou latè yo ranmase lajan tribi oswa taks; nan men pwòp pitit yo, oswa nan men etranje?
26
Pyè di Li: Nan men etranje. Jezi di li: Konsa, pitit yo egzante.
27
Menm si sa, pou nou pa fè eskandal ak moun sa yo, al nan lanmè a, epi voye yon zen; apre sa, pran premye pwason ki monte a; e, lè w louvri bouch li, ou va jwenn yon pyès lajan; w a pran l, epi w a bay li pou Mwen ak pou ou.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!