Liv Matye
Chapit 18
Klike la pou koute lekti chapit sa1
Menm lè sa a, disip yo vini bò kot Jezi, yo mande: Kiyès ki pi gran nan wayòm syèl la?
2
Alò, Jezi rele yon timoun piti, Li mete nan mitan yo,
3
epi, Li di: Anverite Mwen di nou sa, eksepte si nou konvèti, epi nou vin tankou timoun piti, nou p ap antre nan wayòm syèl la.
4
Nenpòt moun, atò, ki rabese tèt li tankou timoun piti sa a, se li menm ki pi gran nan wayòm syèl la.
5
E, kikeseswa ki va resevwa yon timoun piti konsa nan non Mwen, se Mwen menm li resevwa.
6
Men, kikeseswa ta eskandalize youn nan tipiti sa yo ki kwè nan Mwen yo, sa t ap pi bon pou li si yon wòch moulen te pann nan kou l, epi li te neye nan fon lanmè.
7
Malè pou lemonn akòz eskandal! Kòm sètoblije ke eskandal yo rive; men, malè pou moun sa a ki lakòz eskandal la rive a.
8
Konsa donk, si men w oswa pye w, ap lakòz ou chite, koupe yo, epi voye yo jete byen lwen w; li pi bon pou ou ke w antre nan lavi ak yon bout ponyèt oswa yon bout janm, tan pou w ta gen de men ak de pye, epi pou yo lage w nan dife etènèl la.
9
E, si je w lakòz ou chite, rache l, epi voye l jete byen lwen w; sa ap pi bon pou ou, ke w antre nan lavi ak yon grenn je, tan pou w ta gen toude je w, epi pou yo lage w nan dife lanfè a.
10
Veye pou nou pa meprize youn nan tipiti sa yo, paske Mwen di nou sa, nan syèl la, zanj pa yo toujou rete nan prezans Papa M ki nan syèl la.
11
Paske Pitit Gason Lòm nan vini pou sove sa ki te pèdi.
12
Kisa nou panse? Si yon nonm gen san mouton, epi youn nan yo ta pèdi; èske l pa t ap kite katrevendiznèf lòt yo, epi l ale nan mòn yo e chèche sa ki pèdi a?
13
E, si sa rive ke l jwenn li, anverite Mwen di nou sa, l ap rejwi plis pou mouton sa a, ke pou katrevendiznèf sa ki pa t pèdi yo.
14
Konsa tou, se pa volonte Papa nou ki nan syèl la, pou ke youn nan tipiti sa yo ta peri.
15
Yon lòt bagay ankò, si frè w peche kont ou, ale, epi di l fot li komèt kont ou a, ant ou menm ak li, nou de sèl. Si li koute w, ebyen, ou rejwenn frè w.
16
Men, si li pa koute w, alò, pran youn oswa de moun anplis avè w, pou ke nan bouch dezoutwa temwen, chak pawòl ki pale ka tabli.
17
E, si li derefize koute yo, di legliz la sa; men, si li derefize koute legliz la, alò, kite l vin pou ou tankou yon Payen, yon pèseptè.
18
Anverite Mwen di nou sa, nenpòt kisa nou mare sou latè, l a va mare tou nan syèl la, e, nenpòt kisa nou lage sou latè, l a va lage tou nan syèl la.
19
Mwen di nou sa ankò, ke si de nan nou ta mete n dakò sou latè sou kèlkeswa bagay nou ta vle mande, Papa M ki nan syèl la t ap regle sa pou yo.
20
Paske, kote dezoutwa reyini ansanm nan non Mwen, se la Mwen ye pami yo.
21
Apre, Pyè vini kote L, li di: Senyè, konbyen fwa pou frè m ta va peche kont mwen, epi pou m ta padone l? Jis rive sèt fwa?
22
Jezi di li: Mwen pa di w jis rive sèt fwa non; men, jis rive swasanndis fwa sèt fwa!
23
Konsa, wayòm syèl la sanble ak yon sèten wa, ki te vle fè kontwòl ak sèvitè l yo.
24
E, lè li kòmanse kontwole, yo mennen youn ba li ki te dwe l dimil talan.
25
Men, difèt ke l pa t gen mwayen pou l peye, mèt li kòmande pou yo vann li, ansanm ak madanm li, pitit, ak tout sa l posede, epi, pou peman ka fèt.
26
Sèvitè a, alò, lage kò l atè, li ajenou nan pye l, li di: Mèt, pran pasyans ak mwen, e, m ap peye w tout dèt la.
27
Lè sa a, mèt sèvitè a te vin plen ak konpasyon, epi, li lage l, e li anile dèt li a.
28
Men, menm sèvitè sa a soti, epi l jwenn yon sèvitè parèy li, ki te dwe l san denye; epi, l met men sou li, e, li pran trangle l, li di: Peye m sa w dwe m nan!
29
Epi sèvitè parèy li a lage kò l atè, li sipliye l, li di: Pran pasyans ak mwen, m ap peye w tout dèt la.
30
Men, li derefize, e, l ale, li mete l nan prizon pou jis li fin peye dèt la.
31
Konsa, lè lòt sèvitè parèy li yo wè sa k te fèt la, yo te twouble ak anpil lapenn; alò, yo vin al di mèt yo tout sa ki te rive a.
32
Alò, mèt li a, apre ke l te fè rele misye, li di: Ou se yon sèvitè mechan! Mwen anile tout dèt sa a pou ou, paske w te mande m fè sa pou ou;
33
èske w pa t dwe gen konpasyon tou pou sèvitè parèy ou a, menm jan ke m te gen pitye pou ou a?
34
E, mèt la te fache, li lage misye nan men bouwo pou bat li jiskaske li fin peye tout sa ke l te dwe l.
35
Se konsa Papa M ki nan syèl la ap fè nou tou, si nou chak, nou pa padonnen frè nou nan kè nou, pou peche yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!