Liv Matye
Chapit 19
Klike la pou koute lekti chapit sa1
Epi, sa ki vin rive sèke lè Jezi fin di pawòl sa yo, Li kite Galile, Li vin nan zòn Jide, sou lòt bò Jouden an.
2
E, foul moun yo t ap suiv Li, epi Li geri yo la.
3
Farizyen yo te vin kote L tou, pou chèche tante Li, yo t ap di: Èske sa legal pou yon nonm divòse ak madanm li pou nenpòt ki rezon?
4
Epi, Li reponn, Li di yo: Èske nou pa li, ke Sila ki kreye yo depi okòmansman an te kreye yo nonm ak fanm,
5
epi, L te di: Se poutèt rezon sa a ke yon nonm a va kite papa l ak manman l, e li va ini ak madanm li; alò, yo de, va fè yon sèl chè?
6
Konsa, yo pa de ankò, men yo se yon sèl chè. Alò, sa ke Bondye ini ansanm, pinga pèsonn separe l.
7
Yo di Li: Donk, poukisa Moyiz te kòmande pou ekri yon lèt divòs, epi voye l ale?
8
Li di yo: Moyiz, akòz jan kè nou di, te tolere nou voye madanm nou ale, men depi okòmansman, sa pa t konsa.
9
E, Mwen di nou sa, nenpòt moun ki divòse ak madanm li, eksepte pou fònikasyon, epi k al marye ak yon lòt; li komèt adiltè, e nenpòt moun ki ta marye ak dam divòse a, komèt adiltè.
10
Disip Li yo di Li: Si se konsa sa ye ant yon nonm ak madanm li, sa pa bon pou w marye.
11
Men, Li di yo: Tout òm pa ka resevwa pawòl sa a, sof sila yo ke yo te bay li a.
12
Paske, gen enik ki fèt konsa depi nan vant manman yo; gen lòt enik ke se lèzòm ki fè yo vin enik; epi, gen enik ki rann tèt yo enik poutèt wayòm syèl la. Moun ki ka resevwa sa a, se pou l resevwa l!
13
Apre sa, yo pote ba Li, timoun piti, pou Li poze men Li sou yo, ak lapriyè; alò, disip yo fè yo repwòch;
14
men, Jezi di: Tolere timoun piti yo, e, pa anpeche yo vin jwenn Mwen; paske se ak moun tankou yo wayòm syèl la fèt.
15
Epi Li poze men L sou yo, ansuit, Li kite kote a.
16
Epi twouve, yon moun pwoche e li di Li: Bon Mèt, ki bon bagay mwen dwe fè pou m ka gen lavi etènèl?
17
E, Li di li: Poukisa w rele Mwen bon? Paske pa gen pèsonn ki bon, men yon sèl; sa vle di, Bondye; men, si w vle antre nan lavi a, obsève kòmandman yo.
18
Li di Li: Kiyès? Jezi di: Ou pa dwe asasinen, ou pa dwe komèt adiltè, ou pa dwe vòlè, ou pa dwe bay manti,
19
onore papa w ak manman w, epi, ou dwe renmen pwochen w tankou pwòp tèt ou.
20
Jennòm nan di Li: Tout bagay sa yo, mwen kenbe yo depi m te piti jis kounye a; kisa m manke ankò?
21
Jezi di li: Si w vle alapèfeksyon, ale, e vann sa w genyen, epi bay pòv yo; e, ou va gen trezò nan syèl la; apre sa, vini, epi suiv Mwen.
22
Men, lè jennòm nan tande pawòl sa a, l al fè wout li byen tris, paske misye te gen anpil byen.
23
Alò, Jezi di disip Li yo: Anverite Mwen di nou sa, ke yon moun rich ap difisil pou l antre nan wayòm syèl la.
24
Epi ankò, Mwen di nou sa, li pi fasil pou yon chanmo pase nan je zegui, pase pou yon moun rich antre nan wayòm Bondye a.
25
Lè disip yo tande sa, yo te sezi anpil, yo di: Kiyès atò ki ka sove?
26
Men, Jezi gade yo, Li di yo: Ak lèzòm, sa enposib, men ak Bondye, tout bagay posib.
27
Lè sa a, Pyè reponn, li di Li: Twouve nou kite tout bagay dèyè, epi nou suiv Ou; kisa nou va genyen atò a?
28
E Jezi di yo: Anverite Mwen di nou sa, ke nou menm ki suiv Mwen yo, nan tan, lè tout bagay refèt la, lè Pitit Gason Lòm nan va chita sou twòn laglwa Li a, nou menm tou n a va chita sou douz twòn, pou jije douz tribi Izrayèl yo.
29
E, chak moun ki te kite kay, oswa frè, oswa sè, oswa papa, oswa manman, oswa madanm, oswa pitit, oswa teren, pou byen non Mwen, ap jwenn san fwa pi plis, epi, l ap eritye lavi ki p ap janm fini an.
30
Men, anpil ki anpremye a va vin andènye, e dènye yo a va vin premye.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!