Liv Matye
Chapit 22
Klike la pou koute lekti chapit sa1
Epi Jezi reponn, e Li pale ak yo an parabòl ankò,
2
Li di: Wayòm syèl la se tankou yon wa ki pare nòs pitit gason li.
3
Epi, li voye sèvitè li yo al rele moun ki te envite nan nòs la; men, yo pa t vle vini.
4
Yon lòt fwa ankò, li voye lòt sèvitè, li di: Di envite yo, Gade, mwen pare resepsyon m nan, bèf mwen ak lòt bèt ki t ap angrese yo fin tiye, e, tout bagay pare; vini nan nòs la.
5
Men, yo pa bay sa enpòtans, epi y al fè wout yo, youn al nan jaden l, lòt la nan komès li,
6
epi, rès yo pran sèvitè l yo, yo imilye yo, epi yo tiye yo.
7
Men, lè wa a tande sa, li te fache, epi, li voye lame l al detwi asasen sa yo, epi, boule vil yo a.
8
Apre sa, li di sèvitè l yo, nòs la pare, men envite yo pa t merite l.
9
Se pou nou ale sou tout wout yo, e, mezi moun nou jwenn, envite yo nan nòs la.
10
Konsa, sèvitè sa yo ale sou wout yo, epi yo rasanble mezi moun yo te jwenn, kit bon, kit move moun; e, nòs la te plen ak moun.
11
Epi, lè wa a vin antre pou li wè envite yo, li wè yon nonm la a ki pa t gen rad nòs la sou li.
12
Epi, li di l: Zanmi, kijan w fè antre la a alòske w pa gen yon rad nòs? E, misye te ret bouch be.
13
Alò, wa a di sèvitè li yo, Mare misye, men l ak pye l, epi ale avè l, voye l jete nan fènwa deyò a, se la k ap gen rèl ak manje dan.
14
Paske, gen anpil moun ki resevwa apèl la, men se yon tikras ke y ap chwazi.
15
Apre sa, Farizyen yo ale, yo konsilte youn ak lòt pou yo wè kijan yo ta ka pran Jezi nan pyèj ak pwòp pawòl nan bouch Li.
16
Epi, yo voye disip pa yo ansanm ak sòlda Ewòd yo bò kote L, yo di Li: Mèt, nou konnen ke W onèt, e ke W anseye chemen Bondye a nan laverite; epitou, Ou pa pè pèsonn, paske W pa gade sou figi moun.
17
Alò, di nou non: Sa W panse? Èske sa legal pou yon moun peye Seza taks?
18
Men, Jezi te gentan konnen mechanste yo a, Li di: Poukisa n ap tante M nan? Ipokrit ke nou ye!
19
Ban M wè pyès lajan yo peye taks la! Epi, yo pote yon denye ba Li.
20
Epi, Li di yo: Pou kiyès foto sa a, e pou kiyès yo ekri bagay sa yo?
21
Yo di Li: Pou Seza! Alò, Li di yo: Konsa, bay Seza bagay ki pou Seza, epi, bay Bondye bagay ki pou Bondye.
22
Lè yo te tande pawòl sa yo, yo te etone, epi, yo kite L, yo ale fè wout yo.
23
Menm jou sa a, Sadiseyen yo vini bò kote Li, se yo ki di ke pa gen rezireksyon an; yo mande L,
24
yo di: Mèt, Moyiz te di, si yon nonm ta mouri, san ke l pa t gen pitit, frè li ta dwe marye ak madanm li an, epi pou li elve desandan pou frè ki mouri a.
25
Twouve ke te gen sèt frè avèk nou, epi, premye a, lè li te marye ak yon fi, li vin mouri; e kòm li pa t gen pitit, li kite madanm li an pou frè l.
26
Menm jan an, dezyèm nan tou, epi twazyèm nan, rive sou setyèm nan.
27
Epi, andènye nèt, madanm lan vin mouri tou.
28
Konsa donk, lè rezireksyon an, madanm kiyès li va ye pami yo sèt la? Puiske yo tout te genyen l.
29
Jezi reponn, e Li di yo: Nou nan lerè, difèt ke nou pa konn Lèzekriti, nitou pouvwa Bondye.
30
Paske, nan rezireksyon an, yo p ap ni marye, ni bay pitit fi pou marye, men y ap tankou zanj Bondye yo nan syèl la.
31
Men, konsènan rezireksyon mò yo, èske nou pa li sa ki te deklare pou nou, pa Bondye Li menm, ki di:
32
Mwen se Bondye Abraram, ak Bondye Izarak, e Bondye Jakòb? Bondye pa Bondye moun mouri, men, Bondye moun vivan.
33
E, lè foul la tande sa, yo te etone pa ansèyman Li an.
34
Men, lè Farizyen yo te vin tande kòman Li te fèmen bouch Sadiseyen yo, yo t al reyini ansanm.
35
Epi youn nan yo, ki te yon avoka, poze Li yon kesyon, pou tante L, li di:
36
Mèt, kiyès ki pi gwo kòmandman nan Lalwa a?
37
Jezi di li: Ou va renmen Senyè Bondye w la ak tout kè w, e ak tout nanm ou, epi ak tout panse w.
38
Se sa ki premye e pi gran kòmandman.
39
E, dezyèm nan menm jan avè l; ou va renmen pwochen w tankou tèt pa w.
40
Se sou de kòmandman sa yo ke tout Lalwa a ak pwofèt yo apiye.
41
Pandan Farizyen yo te rasanble ansanm nan, Jezi mande yo,
42
Li di: Kisa nou panse de Kris la? Pitit Gason kiyès Li ye? Yo di Li, Pitit Gason David.
43
Li di yo: Alò, kijan fè David, ki t ap pale pa Lespri, rele Li: Senyè? Li di:
44
Senyè a di Senyè mwen an: Chita adwat Mwen, jiskaske Mwen fè lènmi W yo tounen machpye W.
45
Konsa, si David rele Li Senyè, kòman pou L ta fè Pitit Gason l?
46
Epi, okenn moun pa t ka reponn Li yon mo, nitou okenn moun, apati de jou sa a, pa janm oze poze L kesyon ankò.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!