Liv Matye
Chapit 23
Klike la pou koute lekti chapit sa1
Apre sa, Jezi pale ak foul la, e ak disip Li yo,
2
Li di: Pwofesè Lalwa yo ak Farizyen yo chita sou chèz Moyiz la.
3
Alò, tousa, ke yo mande nou pou n obsève, se pou n obsève l, e fè l; men nou menm, pa suiv ajisman pa yo, paske se pale yo pale ase, alòske yo pa aji.
4
Paske yo mare chay lou, epi ki difisil pou moun pote, yo lage yo sou zepòl lèzòm, men yo menm, yo p ap deplase chay sa yo pa menm ak youn nan dwèt pa yo.
5
Men tout travay yo, y ap fè yo pou moun ka wè yo. Konsa, yo fè filaktè yo men lajè, epi franj rad yo men gwosè.
6
Epi, yo renmen plas rezève nan resepsyon, ak chèz devan, nan sinagòg,
7
ak salitasyon sou plas piblik, e pou moun ap rele yo: Rabi! Rabi!
8
Men, pa fè moun rele nou Rabi, paske gen yon sèl Mèt, se Kris; apre, nou tout se frè.
9
Epi, pa rele pèsonn moun papa sou latè, paske gen yon sèl ki Papa w, Sila ki nan syèl la.
10
Nonplis tou, ke pèsonn pa rele nou mèt, paske gen yon sèl ki Mèt ou, se Kris.
11
Men, moun sa a ki pi gran pami nou an, la va sèvitè nou.
12
E, nenpòt moun ki elve tèt li, y a va rabese l; e, moun ki rabese tèt li, y a va mete l anlè.
13
Men, malè pou nou, pwofesè Lalwa ak Farizyen, ipokrit; paske, nou fèmen antre wayòm syèl la pou lèzòm; paske, nou pa ni antre nou menm, ni nou pa pèmèt moun k ap antre yo antre.
14
Malè pou nou, pwofesè Lalwa ak Farizyen, ipokrit; paske, nou piye kay vèv yo, e, nou pran pòz ap lapriyè byen long, konsa, n a va resevwa pi gwo madichon an.
15
Malè pou nou, pwofesè Lalwa ak Farizyen, ipokrit; paske, nou travèse lanmè ak latè pou nou fè yon pwozelit; e, lè nou jwenn youn, nou fè l vin yon pitit lanfè de fwa pi plis pase nou.
16
Malè pou nou, bann gid avèg k ap di: Nenpòt moun ki ta va sèmante sou tanp lan, sa pa anyen; men nenpòt moun ki ta va sèmante sou lò ki nan tanp lan, li fè yon dèt.
17
Bann egare ak je pete! Paske, kisa ki gen plis valè, lò a, oswa tanp lan ki sanktifye lò a?
18
Epi, nou di: Nenpòt moun ki sèmante sou lotèl la, sa pa anyen; men, nenpòt moun ki sèmante sou ofrann ki sou lotèl la, li koupab.
19
Bann egare ak je pete! Paske, kisa ki gen plis valè, ofrann lan, oswa lotèl ki sanktifye ofrann lan?
20
Konsa donk, nenpòt moun ki ta sèmante sou lotèl la, li sèmante e sou lotèl la, e sou sa ki sou li yo.
21
E, nenpòt moun ki sèmante sou tanp lan, li sèmante e sou tanp lan, e sou sa ki anndan l yo.
22
Epi, moun ki ta sèmante sou syèl la, li sèmante sou twòn Bondye a, e sou Sila ki chita sou twòn lan.
23
Malè pou nou, pwofesè Lalwa ak Farizyen, ipokrit; paske, nou peye ladim sou mant, lanni, ak kanèl, epi nou pa fè sa ki gen plis valè nan Lalwa a: jistis, pitye, ak fidelite. Se sa yo pou nou te fè, san nou pa sispann fè lòt yo.
24
Nou se gid ki avèg, k ap pase yon mouch nan paswa, alòske n ap vale yon chamo.
25
Malè pou nou, pwofesè Lalwa ak Farizyen, ipokrit; paske, nou netwaye deyò gode ak plat yo, men, andedan yo plen ak magouy, ak mechanste.
26
Bann Farizyen avèg, netwaye sa ki andedan gode ak andedan plat yo anvan, pou ke sa ki sou deyò a kapab netwaye tou.
27
Malè pou nou, pwofesè Lalwa ak Farizyen, ipokrit; paske, nou sanble ak kavo yo blanchi, ki parèt bèl vre sou deyò, men, ki pa anndan, plen ak zosman mò, ak tout kalite salte.
28
Se konsa tou ke nou menm, sou deyò, nou parèt dwat nan je lèzòm, men andedan nou plen ak ipokrizi ak inikite.
29
Malè pou nou, pwofesè Lalwa ak Farizyen, ipokrit; paske, nou konstwi kavo pou pwofèt yo, e, nou dekore tonbo moun ki dwat yo,
30
epi nou di: Si nou te la nan tan zansèt nou yo, nou pa t ap patisipe avèk yo nan fè koule san pwofèt yo.
31
Nan konsa, nou se temwen kont pwop tèt pa nou, ke nou se desandan sila ki te tiye pwofèt yo.
32
Ebyen, fin konplete mezi move zak zansèt nou yo non!
33
Bann sèpan, jenerasyon vipè, kòman pou nou ta fè chape anba madichon lanfè a?
34
Poutèt sa, gade, M ap voye pwofèt ban nou, nonm ki saj, ak pwofesè Lalwa; epi, gen nan yo ke n ap tiye e krisifye; gen nan yo n ap kale ak fwèt nan sinagòg nou yo, epi n ap pèsekite yo soti nan yon vil al nan yon lòt.
35
Konsa, se sou nou ke san tout moun jis ki te koule sou latè yo va tonbe; pran depi sou san Abèl nonm dwat la, rive sou san Zakari, pitit gason Barachi, ke nou te asasinen ant tanp lan ak lotèl la.
36
Anverite, Mwen di nou sa, tout bagay sa yo gen pou tonbe sou do jenerasyon sa a.
37
O, Jerizalèm, Jerizalèm, ou menm ki tiye pwofèt yo, epi ki kalonen sila ke yo voye ba ou yo ak wòch, konbyen fwa Mwen te vle rasanble pitit ou yo ansanm, tankou yon manman poul sanble ti poul li yo anba zèl li, men, ou pa janm vle.
38
Gade, yo kite kay ou a ba ou, toutouni.
39
Paske, Mwen di nou sa, nou p ap wè M ankò pou jis lè n a va di: Beni Sila ki vini nan Non Senyè a.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!