Liv Matye
Chapit 24
Klike la pou koute lekti chapit sa1
Apre sa, Jezi soti, Li ale kite tanp lan, epi, disip Li yo vin bò kote L, pou yo montre L pòsyon nan konstriksyon tanp lan.
2
E, Jezi di yo: Nou wè tout bagay sa yo? Anverite Mwen di nou sa, p ap gen yon grenn wòch k ap rete sou yon lòt, san ke yo pa jete l atè.
3
Epi, pandan Li te chita nan Mòn Oliv la, disip yo vin kote L anprive, yo di L: Di nou, kilè bagay sa yo gen pou yo rive? Epitou, kisa ki va siy ke W ap tounen, e, ak lafendimonn?
4
E, Jezi reponn, e, Li di yo: Fè atansyon pou pèsonn pa twonpe nou!
5
Paske, anpil moun ap vin sou non Mwen, y ap di: Mwen se Kris la, e yo va twonpe anpil moun.
6
E, nou va tande anpil lagè, ak bwi k ap kouri sou lagè; veye aske nou pa twouble pou sa; paske, tout bagay sa yo dwe rive, men se poko ap lafen an sa.
7
Paske, nasyon va leve kont nasyon, e, wayòm kont wayòm; e, va gen grangou, ak epidemi, ansanm ak tranblemanntè nan plizyè kote.
8
Men, tout bagay sa yo, se kòmansman doulè yo.
9
Apre sa, yo va bay nou pou yo toumante nou. Y ap tiye nou; e, tout nasyon yo va rayi nou poutèt non Mwen.
10
E lè sa a, anpil moun ap chite, epi, youn va trayi lòt, e youn va rayi lòt.
11
Epi, anpil fo pwofèt a va parèt, e, yo va twonpe anpil moun.
12
E, akòz inikite ka pral ogmante, lanmou anpil moun ap rafredi.
13
Men, moun ki va andire jiska lafen an, se li menm ki va sove.
14
E, levanjil wayòm sa a, va preche nan lemonn antye, kòm yon temwayaj pou tout nasyon yo; e sètalò ke lafen an va vini.
15
Alò, lè nou wè abominasyon dezolasyon ke pwofèt Danyèl te pale de li a kanpe nan plas kote ki sen an, (Nenpòt moun k ap li, se pou l konprann;)
16
Alò, kite sila yo ki nan Jide, sove al nan mòn yo,
17
kite moun ki anlè tèt kay, pa desann al pran anyen anndan lakay li,
18
nonplis tou, pa kite moun ki nan jaden retounen al pran rad li.
19
E, malè pou yo menm ki ansent, ak sa k ap bay tete, nan jou sa yo!
20
Men, lapriyè pou ke jou kouri pa w la, pa ni ann ivè, ni yon jou Saba.
21
Paske, a va gen gwo tribilasyon, tankou pa janm genyen depi kòmansman lemonn, jis rive kounye a; e, ni p ap janm genyen konsa ankò!
22
E, eksepte lefèt ke jou sa yo ta vin pi kout, pa ta gendwa gen moun ki t ap sove; men, poutèt Chwazi yo, jou sa yo ap vin pi kout.
23
Alò, si yon moun ta di w: Gade, men Kris la isit la wi; osinon: Men Li bò la a wi; pa kwè l.
24
Paske, va gen fo kris ak fo pwofèt k ap parèt, e, yo va fè gwo mirak siy ak mèvèy, nan pwen ke si sa te posib, yo ta va twonpe menm Chwazi yo.
25
Gade, Mwen te di nou sa davans!
26
Konsa donk, si yo ta di nou: Gade, men Li nan dezè a; pa ale; Gade, men Li nan chanm sekrè yo; pa kwè l.
27
Paske, menm jan zeklè soti nan lès, epi l klere jis rive nan lwès, se konsa vini Pitit Gason Lòm nan ap ye tou.
28
Paske, nenpòt kote zosman yo ye, se la tou ke votou yo va sanble ansanm.
29
Imedyatman apre tribilasyon nan jou sa yo, solèy la va nwasi, e lalin lan p ap bay limyè l, epi, zetwal yo va tonbe sot nan syèl, e, puisans yo ki nan syèl la va souke;
30
E, sètalò ke siy Pitit Gason Lòm nan va parèt nan syèl la; e, lè sa a, tout tribi ki sou latè va nan tristès, yo va wè Pitit Gason Lòm nan ap vini sou nyaj nan syèl yo, avèk puisans e avèk anpil glwa.
31
E, Li va voye zanj Li yo ak yon gwo kout twonpèt, epi yo va rasanble ansanm tout Chwazi yo, nan direksyon kat van yo, soti nan yon pwent syèl la, rive sou lòt pwent lan.
32
Kounye a, aprann yon parabòl sou pye figfrans: Lè branch li yon jan lage, epi l ap pouse fèy, nou konnen ke sezon lete a pre rive.
33
Se konsa tou pou nou menm, lè nou va wè tout bagay sa yo, konnen ke Li tou pre, ke Li menm nan papòt la.
34
Anverite, Mwen di nou sa, jenerasyon sa a p ap pase avan tout bagay sa yo akonpli.
35
Syèl la ak latè va pase, men pawòl Mwen yo p ap janm pase.
36
Men, kanta pou jou ak lè sa a, pèsonn pa konnen; non, zanj ki nan syèl yo pa konnen, men Papa M sèl.
37
Men, menm jan sa te ye nan jou Noye yo, se konsa tou ke vini Pitit Gason Lòm nan va ye.
38
Paske, tankou nan jou anvan delij la, yo t ap manje, bwè, marye, e bay pitit fi yo pou marye, jouk jou Noye rantre anndan lach la.
39
E, yo pa t konn anyen jistan delij la vini, epi li pote yo tout ale. Se konsa tou ke vini Pitit Gason Lòm nan va ye.
40
Alò, va gen de moun nan jaden, gen youn yo va pran, epi, lòt la rete.
41
De fanm a va moulen nan menm moulen an, gen youn yo va pran, epi, lòt la rete.
42
Alò, se pou nou veye; paske nou pa konnen kilè Senyè nou an ap vini.
43
Men, konprann sa, si mèt kay la te konnen a ki lè vòlè a t ap vini, li t ap ret veye, e li pa t ap pèmèt ke yo kase kay li a.
44
Se poutèt sa tou ke nou dwe mete nou pre, paske, nan yon lè ke nou pa panse, Pitit Gason Lòm nan va vini.
45
Kiyès atò ki se yon sèvitè fidèl e saj, ke mèt li te mete chèf sou lòt moun nan kay la, pou ba yo manje, lè lè manje yo rive?
46
Sèvitè sa a beni, li menm, lè mèt li tounen, li ta jwenn l ap fè sa vre.
47
Anverite, M ap di nou sa, li ta ba l responsab tout zafè l.
48
Men, si move sèvitè a ta di nan kè l: Mèt mwen ap mize avan l vini;
49
Epi, li ta va kòmanse bat lòt sèvitè parèy li yo; e, manje ak bwè avèk tafyatè;
50
mèt sèvitè sa a, va vini yon lè ke li pa t ap atann, nan yon lè ke l pa t konnen;
51
e, li va met misye an miyèt moso, lèfini la ba l pòsyon pa l avèk ipokrit yo; a va gen rèl ak manje dan!
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!