Liv Matye
Chapit 26
Klike la pou koute lekti chapit sa1
Epi, sa ki vin rive, lè Jezi te fin di tout pawòl sa yo, Li di disip Li yo:
2
Nou konnen nan de jou, se va fèt Pak la, epi, Pitit Gason Lòm nan ap livre pou yo krisifye L.
3
Apre sa, sakrifikatè an chèf yo ak Ansyen pami pèp la te reyini ansanm nan palè sakrifikatè souvren an, ki te rele Kayif.
4
Yo pran diskite sou jan pa lariz, pou yo ta arete Jezi, epi tiye L.
5
Men, yo te di: Pa nan jou fèt la, pa krentif pou ke pa gen dezòd pami pèp la.
6
Kounye a, lè Jezi te nan Betani, lakay Simon ki te gen lalèp la,
7
te vin gen yon dam ki pwoche bò kote L, ki te gen nan men l yon bwat ann albat ki te gen yon pafen ki gen anpil valè; epi, li vide l sou tèt Li, pandan Li chita L ap manje.
8
Men, lè disip Li yo wè sa, yo te endiye, yo di: Kisa gaspiyaj sa a regle?
9
Paske, pafen sa ta ka vann pou bon kou lajan, e, ki ta kapab distribye bay pòv yo.
10
Lè Jezi konprann sa, Li di yo: Pouki n ap annuiye dam nan? Paske, li fè yon bòn zèv pou Mwen.
11
Paske, n ap toujou gen pòv yo avèk nou; men Mwen menm, nou pa p toujou genyen M.
12
Paske, lefèt ke l vide pafen sa a sou kò Mwen an, li fè l pou antèman M.
13
Anverite, Mwen di nou sa, nenpòt ki kote levanjil sa a preche nan lemonn antye, y ap rakonte sa dam sa a te fè a tou, an memwa de li.
14
Apre sa, youn nan Douz yo, ke yo te rele Jida Iskaryòt al jwenn sakrifikatè an chèf yo.
15
Epi, li di yo: Kisa n ap ban mwen, epi pou m livre Li ban nou? Epi, yo antann avèk li sou trant pyès ann ajan.
16
Depi lè sa a, misye t ap cheche yon okazyon pou li trayi L.
17
Kounye a, nan premye jou fèt Pen san Ledven an, disip yo pwoche kote Jezi, yo di Li: Ki kote W ta vle nou pare manje Pak la pou Ou?
18
Epi, Li di: Ale nan bouk la, kay tèl tèl nonm, epi di l, Mèt la di: Tan Mwen an rive; M ap pase Pak la lakay ou ak disip Mwen yo.
19
Epi, disip yo fè kon Jezi te kòmande yo a, e, yo pare Pak la.
20
Kounye a, lè aswè rive, Li chita ak Douz yo.
21
E, pandan yo t ap manje, Li di: Anverite, Mwen di nou sa, youn nan nou ap trayi M.
22
E, yo te tris anpil, epi yo kòmanse chak nan yo ap mande L: Met, èske se mwen?
23
Epi L reponn, Li di: Moun ki te tranpe men l ansanm avè M nan bòl la, se li tou k ap trayi M nan.
24
Pitit Gason Lòm nan aprale jan sa ekri sou Li a; men, malè pou moun sa a ki lakòz trayizon Pitit Gason Lòm nan! Sa t ap pi bon pou moun sa a, si li pa t fèt.
25
Alò, Jida, ki te trayi L la, reponn, li di konsa: Rabi, èske se mwen? Jezi di misye: Se ou menm ki di l!
26
E, pandan y ap manje, Jezi pran pen, Li beni l, e Li kase l, e, Li bay disip yo, epi L di: Pran; manje; sa a se kò Mwen!
27
Epi, Li pran gode a, Li rann gras, e Li ba yo l, Li di: Nou tout, bwè ladan l!
28
Paske sa a se san Mwen, san Nouvo Testaman an ki koule pou anpil moun, pou padon peche.
29
Men, Mwen di nou sa, apati de kounye a, Mwen p ap bwè fwi rezen an ankò, pou jis jou sa a, lè Mwen va bwè youn ki nouvo avèk nou, nan wayòm Papa M nan.
30
Epi, apre yo te chante yon im, y ale sou Mòn Oliv la.
31
Lè sa a, Jezi di yo: Nou tout ap chite akòz Mwen aswè a; paske, sa ekri: M ap frape bèje a, epi mouton yo nan twoupo a va gaye pasi pala.
32
Men, apre ke M leve ankò, Mwen prale anvan nou nan Galile.
33
Pyè reponn, li di Li: Menm si tout moun ta chite poutèt Ou, mwen menm, mwen pa gen dwa janm chite!
34
Jezi di li: Anverite, Mwen di w sa, lannuit sa a, anvan kòk chante, w ap nye Mwen twa fwa.
35
Pyè di Li: Menm si pou m ta mouri avè W, men, mwen p ap nye W. Tout lòt disip yo di menm bagay la.
36
Apre sa, Jezi rive avèk yo yon kote yo rele Jetsetmane, epi Li di disip yo: Chita la a, pandan ke Mwen pral lapriyè lòt bo a.
37
Epi, Li pran Pyè ak de pitit gason Zebede yo; e, Li te kòmanse gen lapenn ak kèsere.
38
Lè sa a, Li di yo: Nanm Mwen plen ak chagren depase mezi, jouk pou M mouri; rete la a, epi veye avèk Mwen.
39
Epi, Li ale yon ti jan pi lwen, e Li tonbe fas atè, Li lapriyè, Li di: O, Papa Mwen, si sa posib, kite gode sa a pase lwen Mwen; mentou, se pa jan ke Mwen vle a; men, jan ke Ou vle a!
40
Epi, Li tounen kote disip yo, e Li jwenn yo ap dòmi, e, Li di Pyè: Kisa, ou pa t ka veye ave M pandan inèdtan?
41
Veye e lapriyè pou nou pa tonbe nan tantasyon; lespri a vle tout bon vre, men lachè a fèb!
42
Li ale ankò yon dezyèm fwa, e, Li lapriyè, Li di: O Papa Mwen, si gode sa a pa ka pase lwen Mwen, eksepte pou Mwen bwè l, ke volonte W fèt!
43
Epi, Li vini, Li jwenn yo ap dòmi ankò; paske je yo te lou.
44
Li kite yo, Li deplase ankò, epi Li lapriyè twazyèm fwa a, Li di menm pawòl yo.
45
Apre sa, Li vin kote disip Li yo, epi, Li di yo: Dòmi toujou non; e, repoze nou non; gade, lè a rive, e yo trayi Pitit Gason Lòm nan, epi livre L nan men pechè.
46
Leve! ann ale; gade, men l rive, sila ki trayi Mwen an.
47
E, pandan Li t ap pale toujou, vwala ke, Jida, youn nan Douz yo, vini, e, avè l te gen yon gwo foul ak epe, ak baton; ke sakrifikatè an chèf yo ak Ansyen yo pami pèp la, te voye.
48
Alò, sila ki te trayi L la, te ba yo yon siy, li te di: Nenpòt moun ke mwen va bo a, se Li menm L ap ye; kenbe L vit!
49
Epi, li vanse sou Jezi, epi li di: Sali Rabi! Epi, l bo L.
50
E, Jezi di li: Zanmi, ki kote w sot la?
51
Epi, gade, youn pami sila ki te ak Jezi yo lonje men l, epi li rale epe l, e, li frape yon sèvitè sakrifikatè souvren an, e, li koupe zòrèy li.
52
Lè sa a, Jezi di li: Remete epe w la nan plas li; paske, tout moun ki pran epe va peri pa epe.
53
Èske w panse ke Mwen pa ta ka lapriyè Papa M, e ke menm lè a, Li ta va ban Mwen plis pase douz rejiman zanj?
54
Men alò, kijan Lèzekriti ta va akonpli, ke sa dwe rive konsa a?
55
Nan menm lè sa a, Jezi di foul moun yo: Apa nou vini tankou se dèyè yon vòlè nou ye, ak epe, ak baton pou nou arete M? Mwen te chita chak jou avèk nou nan tanp lan; e, nou pa t pran Mwen.
56
Men, tout sa te fèt, pou ke Lèzekriti pwofèt yo te ka akonpli. Lè sa a, tout disip yo al kite L, e, yo sove.
57
Epi, sila yo ki te arete Jezi a mennen L kay Kayif, sakrifikatè souvren an ; se la pwofesè Lalwa yo ak Ansyen yo te reyini.
58
Men, Pyè suiv Li de lwen jis nan palè sakrifikatè souvren an , epi, l chita ak sèvitè yo, pou l wè kijan sa ap fini.
59
Kounye a, sakrifikatè an chèf yo, Ansyen yo, ak tout Konsèy la te chèche fo temwen kont Jezi, pou yo kondane l amò;
60
men, yo pa t jwenn pèsonn. Vremanvre, malgre anpil fo temwen te vini, poutan, yo pa t jwenn okenn. Andènye, gen de fo temwen ki te vini;
61
epi, yo di: Nonm sa a di: Mwen kapab detwi tanp Bondye a, epi M rebati l nan twa jou!
62
Lèfini, sakrifikatè souvren an leve kanpe, e, li di Li: Apa W pa reponn anyen? Kisa temwen sa yo ap di kont Ou konsa a?
63
Men, Jezi kenbe silans Li. Epi, sakrifikatè souvren an reponn, e li di: Mwen sipliye W nan Non Bondye vivan an, pou W di nou si wi ou non Ou se Kris la, Pitit Gason Bondye a.
64
Jezi di li: Ou di l! Mentou, Mwen di nou sa, apre jodi a, nou va wè Pitit Gason Lòm nan chita sou men dwat Puisans lan, epi k ap vini sou nyaj yo ki nan syèl la.
65
Lè sa a, sakrifikatè souvren an chire rad li, li di: Li blasfeme! Sa nou bezwen temwen fè ankò? Gade, kounye a, nou tande blasfèm Li an!
66
Sa nou panse? Yo reponn, e, yo di: Li koupab pou L kondane amò.
67
Apre sa, yo krache nan figi L, e, yo ba L kout pwen; e, gen lòt ki frape L ak pla men yo,
68
yo di: Pwofètize pou nou non Ou menm Kris la; ki moun ki frape W la?
69
Kounye a menm, Pyè te chita nan lakou palè a, epi, yon demwazèl pwoche kote l, li di: Ou menm tou, ou te avèk Jezi, moun Galile a!
70
Men, li nye sa devan yo tout, li di: Mwen pa konn sa w ap di la a!
71
E, lè li soti al bò pòtay la, yon lòt sevant wè li, epi l di moun ki te la yo: Misye sa a te avèk Jezi, moun Nazarèt la!
72
E, yon lòt fwa ankò, li nye sa ak yon sèman: Mwen pa konn nonm nan!
73
Epi, apre yon bon moman, moun ki te la yo pwoche kote l, e, yo di Pyè: Vremanvre, ou se youn nan yo wi, paske jan w pale a fè yo rekonèt ou!
74
Lè sa a, li kòmanse joure, e, li fè sèman, li di: Mwen pa konnen nonm nan! Epi, menm lè a tou, kòk la chante.
75
E, Pyè sonje pawòl Jezi a, ki te di l: Anvan kòk chante, ou va nye Mwen twa fwa. Epi, li soti, li kriye de ran dlo, de ran larim.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!