Liv Matye
Chapit 28
Klike la pou koute lekti chapit sa1
Nan fen Saba a, lè avanjou kòmanse pèse nan premye jou semèn nan, Mari moun Magdala ak lòt Mari a te vin wè tonm lan.
2
Epi, twouve te vin gen yon gwo tranblemanntè; paske Zanj Senyè a te desann sot nan syèl, e, li vini, li woule wòch la sot nan pòt la, epi, li chita sou li.
3
Figi l te klere kou zeklè, rad li te blan kou lanèj;
4
E, poutèt yo te pè li, gad yo te tranble, epi, yo te tounen kou moun mouri.
5
Epi, Zanj lan pale, e, li di medam yo: Nou menm, pa pè, paske mwen konnen ke n ap chèche Jezi ki te krisifye a.
6
Li pa isit la, paske Li resisite pami mò yo, jan Li te di a. Vini non, gade plas kote Senyè a te kouche a.
7
Ansuit, ale rapid, e di disip Li yo ke Li resisite pami mò yo; epi, gade, Li pran devan nou pou L al Galile, se la ke nou va wè Li. Men li, mwen di nou sa!
8
Alò, byen vit, y ale kite tonm lan, ak laperèz epi ak gwo lajwa; e, yo te kouri vre, pou y al pote pawòl la bay disip Li yo.
9
Epi, pandan ke yo prale pou di disip Li yo sa, twouve Jezi rankontre ak yo, Li di: Mwen salye nou! Epi, yo vini, e, yo kenbe L nan pye, e, yo adore L.
10
Lè sa a, Jezi di yo: Pa pè; ale di frè Mwen yo pou y al nan Galile, se la ke yo va wè Mwen.
11
Kounye a, pandan ke yo prale a, kèk nan gad yo te vini nan vil la, e yo rakonte bay sakrifikatè an chèf yo tout sa ki te pase.
12
E, lè yo te reyini ak Ansyen yo, e ke yo te reflechi sou ka a, yo bay gwo sòm lajan ba sòlda yo.
13
Yo di: Se pou nou di: Disip Li yo vin lannuit, epi yo vòlè L, y ale, pandan nou t ap dòmi.
14
E, si sa ta rive nan zòrèy gouvènè a, n ap konvenk li, e n ap pwoteje nou.
15
Konsa, yo pran lajan an, epi, yo fè tankou yo te anseye yo a; e, pawòl sa a vin ap repete souvan pami Jwif yo jouk jounen jodi a.
16
Alò, onz disip yo pati ale nan Galile, sou yon mòn kote Jezi te fè yo konnen davans.
17
Epi, yo wè Li, yo adore Li; men kèk nan yo te doute.
18
Epi, Jezi vini, e, Li pale avèk yo, Li di: Tout pouvwa lage nan men Mwen nan syèl la e sou latè a.
19
Alò, se pou nou ale, e, pou nou anseye tout nasyon yo, pou nou batize yo nan non Papa a, ak Pitit Gason an, ak Lespri Sen an.
20
Aprann yo pou yo obsève tout bagay, kèlkeswa sa Mwen te kòmande nou; epi, koute, Mwen toujou la avèk nou, pou jis rive nan lafendimonn. Amèn.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!