Liv Mak
Chapit 1
Klike la pou koute lekti chapit sa1
Kòmansman levanjil Jezi Kris la, Pitit Gason Bondye a.
2
Tankou sa te ekri nan pwofèt yo: Gade non! Mwen voye sèvitè M nan pa devan W, se li ki va pare chemen W lan devan W.
3
Vwa yon nonm ap rele nan dezè a: Se pou w pare chemen Senyè a; fè ti wout Li yo dwat.
4
Jan, se nan dezè a li t ap batize moun, e li t ap preche batèm repantans lan pou padon peche.
5
Konsa, tout peyi Jide a, ak moun Jerizalèm yo te soti vin kote l; epi yo tout te batize nan men l nan rivyè Jouden an; yo t ap konfese peche yo.
6
Alò, Jan te met yon rad an plim chamo sou li, ak yon sentiwon an kui mare nan ren l; e, se krikèt ak siwo myèl mawon ke l te manje.
7
E, misye t ap preche, li t ap di: Gen Youn ki pi gran pase m k ap vin apre m; lasèt soulye Moun sa a, mwen pa merite bese pou m ta demare.
8
Anfèt, mwen te batize nou ak dlo; men, Li va batize nou ak Lespri Sen an.
9
Epi, sa te rive nan jou sa yo ke Jezi te vini sot Nazarèt, nan Galile, e ke Li te batize nan men Jan nan Jouden an.
10
Alèkile, menm moman ke Li t ap leve soti nan dlo a, Li te wè syèl la louvri, epi Lespri a, tankou yon pijon, t ap desann sou Li.
11
Epi, te gen yon vwa ki te soti nan syèl la, ki di: Ou se Pitit Gason byenneme Mwen an, ke Mwen trè kontan avèk Li a.
12
Alèkile, lamenm, Lespri a te kondui Li ale nan dezè a;
13
e, Li te rete la nan dezè a pandan karant jou anba tantasyon Satan; e, Li te la ak bèt sovaj yo; epi, zanj yo te osèvis Li.
14
Kounye a, apre ke Jan te fèmen nan prizon, Jezi te vin nan Galile, Li t ap preche Bòn Nouvèl wayòm Bondye a;
15
Li t ap di: Tan an bout, e wayòm Bondye a pre rive; Se pou nou repanti, epi kwè levanjil la.
16
Alèkile, pandan Li t ap mache bò lanmè Galile a, Li wè Simon ak Andre, frè li, ki t ap voye yon filè nan lanmè a; paske, se pechè pwason yo te ye.
17
E, Jezi di yo konsa: Vin suiv Mwen, epi M a fè nou tounen pechè lèzòm.
18
Epi lamenm, yo kite filè yo; e, yo suiv Li.
19
Epi, lè Li vanse yon tikras pi lwen kote a, Li wè Jak, pitit gason Zebede a, ak Jan, frè li a, ki te nan kannòt la tou, yo t ap repare filè pa yo.
20
E, menm lè a, Li rele yo; alò, yo kite Zebede, papa yo, avèk travayè yo; epi yo suiv Li.
21
Apre sa, y ale Kapènawòm; epi nan menm jou Saba a, Jezi antre nan sinagòg la, epi Li anseye.
22
E, yo te sezi poutèt ansèyman L lan; paske Li te anseye yo antan ke yon moun ki gen otorite; e nonpa tankou pwofesè lalwa yo.
23
Se konsa ke nan sinagòg yo a te gen yon nonm ak yon move lespri sou li; epi, li rele pale,
24
li di: Kite nou trankil! Kisa nou gen pou n wè avè W, Ou menm, Jezi moun Nazarèt? Se detwi Ou vin detwi nou? Mwen konnen kiyès Ou ye wi: Sen Bondye a.
25
Jezi blame l, Li di: Fè silans, epi soti sou li!
26
E, apre move lespri a fin sakaje nonm lan li rele ak yon vwa byen fò; lèfini, li soti nan nonm lan.
27
E, yo tout te etone, si tèlman ke youn t ap poze lòt kesyon yo t ap di: Kisa sa a ye la a? Ki nouvo ansèyman sa a? Paske, se ak otorite ke Li pase lòd bay move lespri yo; epi, yo obeyi L!
28
E, menm lè a, renome Jezi te simayen atravè tout zòn zalantou Galile a.
29
Epi, yon fwa yo te soti nan sinagòg la, yo antre lakay Simon ak Andre, ansanm avèk Jak ak Jan.
30
Men, manman madanm Simon an te kouche malad ak yon lafyèv; e menm lè sa a, yo pale Jezi de li.
31
Alò, Jezi vini, Li kenbe men bèlmè a, Li fè l leve kanpe; epi, lamenm lafyèv la kite l. E apre sa, bèlmè a sèvi yo.
32
Nan apremidi, lè solèy la te fin kouche, yo mennen ba Li tout moun malad yo ak sila ki te posede pa demon yo;
33
E, tout vil la te rasanble devan pòt la.
34
Epi, Jezi geri anpil moun ki te gen divès kalite maladi; e, Li chase anpil demon; men, Li pa t pèmèt ke demon yo pale, paske yo te rekonèt Li.
35
Epi nan maten, Li leve byen lontan anvan jou, Li soti, e L ale yon kote pou kont Li, e Li lapriyè la.
36
Alò, Simon ansanm ak moun ki te avèk Jezi yo te pran chèche Li.
37
Alèkile, lè yo jwenn Li, yo di L konsa: Tout moun ap chèche W wi.
38
Lè sa a, Li di yo: Ann ale nan lòt bouk ki apre yo, dekwa pou M ka preche la tou; paske, se pou sa ke Mwen te vini.
39
Konsa Li preche nan sinagòg toupatou nan Galile; e, Li chase demon.
40
Epi, gen yon nonm malad ak lèp ki te vin kote Jezi, li sipliye L, e li ajenou devan L, e li di L konsa: Senyè, si W ta vle, Ou ta kapab fè m pwòp.
41
Alò Jezi, ki te plen ak konpasyon, lonje men L, epi Li touche nonm nan; lèfini, Li di l konsa: Mwen vle; se pou w vin pwòp!
42
Epi, menm lè L te fin pale a, lamenm, lèp la soti sou nonm lan; misye te pirifye.
43
Epi, Jezi ba l yon avètisman fèm pou voye l ale;
44
Li di l: Fè tansòt pou w pa di pèsonn anyen; men, al fè wout ou, montre sakrifikatè a kò w; epi, pou pirifikasyon w lan, w a bay sa ke Moyiz te kòmande a; se va yon temwayaj pou yo.
45
Men, misye ale, li mache anonse sa, epi li simayen koze a si tèlman, ke Jezi te vin pa ka antre nan vil la an piblik ankò; Li te ret pa deyò nan yon kote ki apa; e, moun yo te sot nan tout kwen pou vin jwenn Li.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!