Liv Mak
Chapit 2
Klike la pou koute lekti chapit sa1
Epi, yon lòt fwa ankò, Jezi antre Kapènawòm kèk jou apre sa; e, bwi a te kouri ke Li te lakay la.
2
Alèkile, menm lè a, anpil moun te rasanble; si tèlman ke pa t gen plas pou resevwa yo okenn kote, menm devan pòt la. E, Li t ap preche Pawòl la ba yo.
3
Se konsa te gen kèk moun ki vin kote Li, yo te mennen yon malad paralize, ke kat nonm t ap pote.
4
Alèkile, lè yo pa t kapab rive pre Li akòz foul la, yo dekouvri pati fetay kote L te ye a; epi, apre ke yo te fin louvri l, yo glise branka ke malad paralize a te kouche sou li a desann.
5
Lè Jezi wè lafwa yo, Li di malad paralize a konsa: Gason M, peche w yo padone!
6
Men, te gen kèk nan pwofesè lalwa yo ki te chita la; e, yo t ap fè refleksyon nan kè yo:
7
Kòman nonm sa a fè ap komèt blasfèm konsa a? Kiyès ki ka padone peche apa de Bondye sèl?
8
E menm lè a, Jezi te konnen nan Lespri Li ke se kalite rezònman sa yo ke yo t ap fè nan yo menm, Li di yo konsa: Poukisa n ap fè refleksyon sa yo nan kè nou?
9
Èske li pi fasil pou di malad paralize a: Peche w yo padone; oswa pou di: Leve kanpe, e pran branka w, epi mache?
10
Men, dekwa pou nou ka konnen ke Pitit Gason Lòm nan gen pouvwa sou latè pou Li padone peche, (Li di malad paralize a),
11
Mwen di w, leve kanpe, e pran branka w, epi al fè wout ou lakay ou.
12
Epi lamenm, misye leve kanpe; li pran branka a; lèfini, l al fè wout li devan yo tout; ansòt ke yo tout te sezi; yo t ap glorifye Bondye; yo t ap di: Nou pa janm wè kalite bagay konsa non!
13
Apre sa, Jezi soti al sou bòdmè a ankò; e, tout foul la t ap vin jwenn Li; epi, Li t ap anseye yo.
14
Alèkile, pandan Li t ap pase, Li wè Levi, pitit gason Alfe a, ki te chita nan biwo resepsyon enpo a; epi, Li di misye konsa: Suiv Mwen! Epi, misye leve kanpe, e li suiv Li.
15
E, sa te vin rive ke antan Jezi te chita ap manje lakay misye, plizyè pèseptè ak moun ki nan peche te chita tou ansanm ak Jezi e disip Li yo; paske avredi, yo te anpil, e yo t ap suiv Li.
16
Alò, lè pwofesè lalwa yo ak Farizyen yo wè ke Li t ap manje ansanm ak pèseptè e moun ki nan peche, yo di disip Li yo konsa: Kòman fè L ap manje ak bwè avèk pèseptè ak moun pechè?
17
Lè Jezi tande sa, Li di yo konsa: Moun ki ansante, se pa yo ki bezwen doktè; men se moun ki malad. Mwen pa t vini pou Mwen rele moun ki jis yo non; men, pechè yo, pou repantans!
18
Apre sa, disip Jan yo ak Farizyen yo te abitye fè jèn; yo vin kote Jezi, epi yo di Li konsa: Kijan fè disip Jan yo ak Farizyen yo fè jèn, men, disip pa W yo pa fè jèn?
19
Alò, Jezi di yo konsa: Èske zanmi lemarye yo kapab fè jèn pandan lemarye a la avè yo? Toutotan yo gen lemarye a avèk yo, yo pa ka fè jèn.
20
Men, gen jou ki pral vini kote ke y ap rape lemarye a nan men yo; se lè sa a ke yo va fè jèn nan jou sa yo.
21
Pèsonn, konsa tou, pa janm koud yon pyès twal nèf sou yon vye rad; si se ta sa, moso pyès nèf ki koud sou li a t ap pran fòs sou vye a, lèfini, chire a t ap vin pi mal.
22
E, pèsonn pa janm met diven ki fèk fèt nan ansyen veso; si se ta sa, diven k fèk fèt la t ap pete ansyen veso a, epi diven an t ap pèdi e veso a t ap detwi; kidonk, diven ki fèk fèt la, se nan veso nèf yo dwe mete l.
23
Apre sa, twouve ke Li t ap travèse yon chan ble pandan yon jou Saba, epi, disip Li yo, antan ke yo t ap pase a, yo te pran rache grap ble.
24
Alò, Farizyen yo di Li konsa: Gade, poukisa nan jou Saba a y ap fè sa ki pa legal?
25
Epi, Li di yo konsa: Èske nou pa janm li kisa David te fè lè li te nan nesesite, e ke l te grangou, li menm ak moun ki te avèk li yo?
26
Kòman li te ale anndan kay Bondye a, nan epòk ke Abiyata te sakrifikatè souvren an, epi li te manje pen sakre yo; alòske sa pa legal pou manje, eksepte pou sakrifikatè yo; anplis, li te bay moun ki te avè l yo manje tou?
27
E, Li di yo konsa: Se Saba a ki te fèt pou lòm; se pa lòm ki te fèt pou Saba a.
28
Kidonk, Pitit Gason Lòm nan se Mèt Saba a Li ye tou.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!