Liv Mak
Chapit 3
Klike la pou koute lekti chapit sa1
Apre sa, Li antre nan sinagòg la ankò; te gen yon nonm anndan an ki te gen yon men ki sèch.
2
E, yo t ap suiv Jezi, pou wè si Li ta pral geri nonm lan pandan jou Saba a, dekwa pou yo ta akize L.
3
Alèkile, Li di nonm ki te gen men sèch la: Leve, vin pa devan!
4
Lèfini, li di yo konsa: Èske sa legal pou fè byen nan jou Saba, oswa pou fè mal? Pou sove lavi, oswa pou tiye? Men, yo te kenbe silans yo.
5
Epi, apre ke Li te voye je L an won gade yo avèk kòlè, paske sa te fè L lapenn pou Li te wè jan kè yo di; Li di nonm lan konsa: Lonje men w! E, nonm lan lonje men l; epi, men misye te refè nan menm kondisyon ak lòt men an.
6
Alèkile, Farizyen yo leve soti al konplote menm lè a ak patizan Ewod yo kont Jezi, pou wè kijan yo ta ka detwi Li.
7
Men, Jezi retire kò L al bò lanmè a ak disip Li yo; e, yon foul moun ki sot Galile te suiv Li, ak moun ki sot Jide,
8
sa ki sot Jerizalèm, sa k sot Idime, e pa lòt bò Jouden an, e sa k sot nan zòn Ti ak Sidon; yon gwo foul moun! Lè yo te tande kalite bagay Li te fè yo, yo te vin kote Li.
9
Epi, Li pale disip Li yo pou te gen yon ti kannòt ki te ret ap tann Li, poutèt foul moun yo; dekwa pou sa pa rive ke yo ta kwense L;
10
paske Li te geri anpil moun; si tèlman, ke tout moun ki te gen yon maladi t ap pouse rive sou Li pou yo te manyen L.
11
E, lè move lespri yo te wè Li, yo tonbe atè devan L, yo rele, yo di: Ou se Pitit Gason Bondye a!
12
E, Li te pale rèd avèk yo pou yo pa t fè moun konnen kiyès ke L ye.
13
Lèfini, Li monte sou yon mòn, epi, Li rele moun Li te vle yo, vin jwenn Li; e, yo ale kote Li.
14
Alèkile, Li seleksyone douz, ki te pou rete avèk Li; e, ke Li ta ka voye al preche;
15
e, ke yo ta gen pouvwa geri maladi, e chase demon.
16
E se konsa, Li bay Simon non Pyè;
17
e, Jak, pitit gason Zebede a, ak Jan frè Jak la, Li ba yo non Bowanègès, ki siyifi pitit gason loraj yo;
18
apre sa, Andre, ak Filip, ak Batèlmi, ak Matye, ak Toma, ak Jak pitit gason Alfe a, ak Tade, ak Simon, Kananeyen an,
19
ak Jida Iskaryòt, li menm ki te trayi L tou a; epi yo antre nan yon kay.
20
Alèkile, foul moun nan te vin rasanble ankò, nan pwen ke menm manje yo pa t ka manje.
21
Alò, lè fanmi Jezi yo tande bagay sa a, yo vini pou yo pran Li; paske, yo t ap di: Li pèdi tèt Li!
22
E, pwofesè lalwa, ki te desann sot Jerizalèm yo, di: Li gen Bèlzeboul sou Li; epi, se pa mwayen prens demon yo ke L ap chase demon.
23
Jezi rele yo vin jwenn Li; lèfini, Li pale ak yo an parabòl, Li di: Kòman Satan ta ka chase Satan?
24
Epi, si yon wayòm ta va dizive kont pwòp tèt li, wayòm sa a pa t ap ka ret kanpe non.
25
E, si yon kay ta va divize kont pwòp tèt li, kay sa a pa t ap ka ret kanpe non.
26
E, si Satan ta soulve kont pwòp tèt li, epi l ta divize, li pa t ap ka ret kanpe non; men, se fini l t ap fini.
27
Pèsonn pa ka antre anndan lakay yon nonm ki gwonèg pou piye byen li, sof ke l ta mare nonm ki gwonèg la; e lè sa a alò, l a va piye kay li a.
28
Anverite M ap di nou sa, tout peche pitit lèzòm yo ak klèkeswa blasfèm ke yo ta va blasfeme, ap jwenn padon;
29
Men, moun ki blasfeme kont Lespri Sen an p ap janm jwenn padon; men, li an danje pou kondanasyon etènèl.
30
Se te difèt ke yo te di ke Li gen yon move lespri a.
31
Epi, se konsa ke manman Li ak frè Li yo, te ret kanpe pa deyò, yo voye kote Li, pou rele L.
32
Alèkile, foul la te chita toutotou Li; epi, yo di Li konsa: Gade, men manman W ak frè W yo deyò a wi; y ap chèche W.
33
E, Li reponn yo, Li di: Kiyès ki manman M, oswa ki frè M?
34
Epi, Li vire je L gade moun ki te chita antoure L yo, e, Li di: Gade, men manman Mwen, men frè M yo!
35
Paske, nenpòt moun ki va fè volonte Bondye, se li menm ki frè M, e ki sè M, ak manman M!
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!