Liv Mak
Chapit 5
Klike la pou koute lekti chapit sa1
Alèkile, yo rive pa lòt bò lanmè a, nan peyi Gadarenyen yo.
2
Epi, lè Jezi soti nan kannòt la, lamenm, yon nonm ki te gen yon move lespri te soti nan tonb yo vin rankontre avèk Li.
3
Nonm nan te gen kay li pami tonb yo nan simityè a; e, pèsonn pa t kapab mare l; non, menm pa ak chenn!
4
Paske, an plizyè fwa, yo te mare misye ak sèk an fè nan pye l epi ak chenn; men, li te pete chenn yo, e kase sèk an fè yo an miyèt moso; nitou, pyès moun pa t ka donte misye.
5
E, se tout tan, lajounen kou lannuit nan mòn yo ak nan tonb yo, li t ap rele epi kòche pwòp tèt li ak wòch.
6
Men, lè li te wè Jezi depi delwen, li te kouri e li adore L.
7
Lèfini, li rele ak yon vwa byen fò, e li di: Kisa mwen gen pou wè avèk Ou, Jezi, Ou menm ki se Pitit Gason Bondye Trèwo a? M mande W pou sèmante devan Bondye ke W p ap toumante mwen.
8
Se poutèt Jezi te di l: Soti sou nonm nan, move lespri!
9
Alèkile, Jezi mande l: Kòman w rele? Li reponn, li di: Mwen rele Rejiman, paske nou plizyè.
10
Lèfini, move lespri a sipliye Li anpil pou Li pa voye yo ale soti kite peyi a.
11
Kounye a la, tou pre mòn nan, twouve te gen yon gwo twoupo kochon ki t ap manje.
12
Kidonk, tout dyab yo sipliye Li, yo di: Voye nou sou kochon yo non, pou nou ka antre nan yo!
13
Epi menm lè a, Jezi kite yo ale. Alò, move lespri yo soti, epi yo antre nan kochon yo; alèkile, twoupo kochon an kouri ak vyolans, y al sou tèt yon falèz yo lage kò yo anba nan lanmè a; (Yo te demil konsa), e yo tout neye nan lanmè a.
14
Men, moun ki t ap gade kochon yo kouri al rakonte sa nan vil la ak nan zòn andeyò yo. Epi moun yo vin gade sa k te pase a.
15
Epi, yo vin kote Jezi, e yo wè nonm ki te posede pa dyab la, e ki te gen Rejiman an, chita, tou abiye, e, ak tout bonsans li; moun yo vin pè, atò.
16
Epi, moun ki te wè sa k te pase a, te rakonte yo sa ki te rive nonm ki te posede pa dyab la; e, konsènan kochon yo tou.
17
Lè sa a, yo kòmanse sipliye Jezi pou L al kite zòn yo a.
18
Epi, antan Jezi t ap monte nan kannòt la, nonm ki te gen dyab sou li a sipliye Li pou l ale avèk Li.
19
Men, Jezi pa t pèmèt li fè sa; men, Li di misye: Al lakay ou jwenn fanmi w, epi rakonte yo kalite gwo bagay Senyè a fè pou ou; e, jan ke L te gen konpasyon pou ou.
20
Epi, nonm nan ale; e, li kòmanse anonse nan Dekapolis la kalite gwo bagay Jezi te fè pou li yo; e, tout moun yo te sezi.
21
Lè Jezi te fin travèse pa lòt bò lanmè a ankò nan bato a, yon gwo foul moun te vin rasanble bò kote Li; e, Li te bò lanmè a.
22
Se konsa te gen youn nan chèf sinagòg la ki vin parèt; non l se te Jayiris. Lè misye wè Jezi, li tonbe nan pye L.
23
Lèfini, li sipliye L anpil; li di: Ti pitit fi m nan kouche tou pre pou lanmò ale avè l; tanpri, vini, epi poze men W sou li pou l ka refè, e li va viv.
24
Alò, Jezi ale avèk li; anpil moun t ap suiv Li, e yo te kwense sou Li.
25
Alèkile, yon dam ki te gen yon pwoblèm san ki t ap koule sou li depi douz an;
26
e, ki te pase anpil tray nan men plizyè doktè; epi, ki te fin depanse tout sa l te posede, alòske li pa t janm fè mye, okontrè, se mal li te vin pi mal;
27
lè li te tande pale de Jezi, li fofile kò l nan foul la pa dèyè Jezi, epi li touche rad Li.
28
Paske, li te di tèt li: Si m ta touche rad Li sèlman, m ap geri.
29
Epi lamenm, flo san ki t ap koule sou li a rete sèk; e, li te santi nan kò li ke l te geri anba maladi touman an.
30
Alèkile, menm kote a, Jezi ki santi te gen yon fòs ki soti nan Li te vire nan mitan foul la, epi Li di: Ki moun sa a ki manyen rad Mwen an?
31
Alò, disip Li yo di L konsa: Ou wè foul la ap kwense sou Ou, epi W ap mande: Ki moun ki manyen M nan?
32
Alèkile, Li voye je L gade toutotou Li pou L wè dam ki te fè sa a.
33
Men, dam nan te pè, li t ap tranble, e li te rekonèt sa ki te sot rive l la; li parèt, li met ajenou nan pye Jezi, epi li di Li tout laverite.
34
Jezi di li konsa: Pitit fi M, lafwa w geri w; ale anpè; ou geri nèt anba maladi touman w lan.
35
Pandan Li t ap pale toujou, gen kèk moun ki te sot lakay chèf sinagòg la ki parèt e ki di: Pitit fi w la mouri! Poukisa w bezwen deranje Mèt la ankò?
36
Men, menm lè Jezi tande pawòl yo di a, Li di dirijan sinagòg la: Pa pè; kwè sèlman!
37
Lè sa a, Li pa pèmèt pèsonn suiv Li, eksepte Pyè, ak Jak, ak Jan, frè Jak la.
38
Epi, lè Li rive kay dirijan sinagòg la, Li wè eskandal la, ak moun ki t ap kriye e ki t ap plede rele yo.
39
Lè L fin antre, Li di yo konsa: Poukisa n ap fè eskandal konsa a, epi n ap kriye a? Demwazèl la pa mouri, se dòmi l ap dòmi.
40
Alò, yo ri pou pase L nan rizib. Men, apre ke Li te fè yo tout soti, Li pran papa ak manman demwazèl la ansanm ak moun ki te akonpaye Li yo, epi, Li antre kote demwazèl la te kouche a.
41
Lèfini, Li pran men demwazèl la, Li di l konsa: Talita koumi! Ki vle di: Demwazèl, Mwen di w, leve!
42
Epi lamenm, demwazèl la leve e li kòmanse mache; paske se yon timoun douzan li te ye. Alò, yo te sezi yon sèl sezi!
43
Men, Li pase yo yon lòd fèm pou ke pèsonn pa konn sa; epi, Li di yo pran kichòy bay demwazèl la pou l manje.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!