Liv Mak
Chapit 6
Klike la pou koute lekti chapit sa1
Ansuit, Li soti la, epi L rive nan pwòp peyi L; e disip Li yo te suiv Li.
2
Lè jou Saba a te rive, Li te kòmanse anseye nan sinagòg la, e anpil nan moun ki t ap koute L yo te sezi; yo t ap di: Ki kote nonm sa a jwenn bagay sa yo? Epi, ki kalite sajès sa a yo ba Li a, pou ke gwo mirak sa yo twouve ap fèt ak men L nan?
3
Èske se pa bòs chapant lan sa, pitit gason Mari a, frè Jak, Jozèf, Jid ak Simon an? Èske sè L yo pa isit la avèk nou? Kidonk, se te yon mank dega Li te ye pou yo.
4
Men, Jezi di yo: Yon pwofèt pa ret san onè, eksepte nan pwòp peyi l, pami fanmi l, ak nan pwòp kay li.
5
E, Li pa t ka fè okenn mirak la a; sof ke Li te poze men Li sou detwa malad, e Li te geri yo.
6
Avredi, Li te sezi wè enkredilite moun yo. Ansuit, L al toutotou vilaj yo, Li t ap anseye.
7
Apre sa, Li rele Douz yo vin jwenn Li; epi, Li kòmanse voye yo ale an de pa de; lèfini, Li ba yo pouvwa sou movezespri yo.
8
Anplis de sa, Li pase yo lòd ke yo pa dwe pote anyen nan vwayaj la; sof yon baton sèlman; ankenn sak, ni pen, ni lajan anndan bous sentiwon yo a.
9
Men, pou yo te met sandal nan pye yo; epi, pa met de rad sou yo.
10
Alèkile, Li di yo konsa: Nenpòt kote nou antre nan yon kay, rete la jiskaske n al kite kote a.
11
E kèlkeswa moun ki pa ta resevwa nou oswa ki pa ta koute nou, lè n ap kite kote sa a, souke pousyè ki anba pye nou; dekwa pou sa sèvi yon temwayaj kont yo. Anverite, Mwen di nou sa, li va pi tolerab pou Sodòm ak Gomò nan jou jijman an, ke pou vil sa a.
12
Kidonk, y ale, e yo preche ke se repanti lèzòm dwe repanti.
13
Yo chase anpil demon, yo onksyone anpil moun ki te malad ak luil, e yo geri yo.
14
Epi, wa Ewòd vin tande pale de Jezi; (paske non Li te simayen toupatou;) e li di konsa: Jan Batis te resisite pami mò yo, se rezon sa a ki fè mirak sa yo ap fèt ak Li a.
15
Gen lòt moun ki t ap di: Se Eli, wi. Gen lòt ankò ki t ap di: Se yon pwofèt, oubyen, se youn nan pwofèt yo.
16
Men, lè Ewòd tande sa, li di: Se Jan! Li menm ke m te fè koupe tèt li a; men, li resisite pami mò yo.
17
Avredi, se Ewòd li menm ki te voye arete Jan, li te fè mare l met nan prizon akòz Ewodyas, madanm Filip, frè Ewòd la. Paske, Ewòd te pran Ewodyas li marye avè l.
18
E, Jan t ap di Ewòd: Sa pa legal pou w pran madanm frè w la.
19
Kidonk, Ewodyas te kenbe Jan nan kè, e li te vle tiye misye, men li pa t kapab.
20
Paske, Ewòd te pè Jan. Li te konn misye kòm yon nonm ki jis e ki sen; kifè ke l te pwoteje misye; e, lè li tande Jan, sa te fè l anpil bagay; e, li te pran plezi tande misye.
21
Men, lè te vin gen yon jou konvnab ki vin rive, kote pou fèt Ewòd, misye te òganize yon resepsyon pou gwo chèf li yo, pou kòmandan militè yo, ak notab nan Galile yo.
22
Alèkile, lè pitit fi Ewodyas sa a te vini, epi ke l te danse, e ke sa te fè e Ewòd e moun ki te sou tab avè l yo plezi anpil; wa a di jenn fi a: Mande m nenpòt sa w vle; epi, m ap ba ou l.
23
Lèfini, li sèmante ba li, li di l: Kèlkeswa sa w ta va mande m lan, m ap ba w li; jis rive mwatye nan wayòm mwen an.
24
Alèkile, manzè soti, li di manman l: Ki sa m ta va mande? Manman an reponn: Tèt Jan Batis!
25
Kidonk, li tounen lamenm al jwenn wa a, epi li mande, li di: Mwen vle pou w ban m tèt Jan Batis kounye a la a nan yon plato.
26
Alò, sa te fè wa a tris anpil; Men, akòz sèman li te fè a, e akòz moun ki te sou tab ansanm avè l yo, li pa t ap refize li.
27
E menm lè a, wa a voye yon gaddikò, avèk lòd pou l vin ak tèt Jan Batis; nonm nan ale, li koupe tèt Jan nan prizon an.
28
Apre sa, li pote tèt la sou yon plato, li bay demwazèl la li, e li menm, li bay manman l li.
29
E, Lè disip Jan yo tande sa, yo vini, yo pran kò li, e yo mete l nan yon tonb.
30
Ansuit, apot yo rasanble tèt yo otou Jezi, yo rapòte tout bagay ba Li; e sa yo te fè, e sa yo te anseye.
31
Alèkile, Li di yo: Nou menm, vin pou kont nou yon kote apa pou n pran repo pou yon kadè; paske, te gen anpil ale vini ki t ap fèt, e yo pa t jwenn tan menm pou yo manje.
32
Se konsa, yo pati nan kannòt poukont yo pou y ale yon kote apa.
33
Men, moun yo te wè lè yo prale a, e anpil nan yo te konn Jezi; alèkile, yo kouri apye travèse tout vil yo; epi, yo gentan rive anvan; lèfini, yo tout ansanm al kote Li.
34
Alò, lè Jezi debake, Li wè yon gwo foul moun; e, kè Li te plen ak konpasyon pou yo; paske yo te tankou mouton san bèje; kidonk, Li kòmanse anseye yo anpil bagay.
35
E, lè jounen an te vanse fini, disip Li yo vin kote L, epi yo di: Kote sa a se yon dezè l ye; epi, tan an pase, li fin ta.
36
Voye yo ale, dekwa pou yo ka al nan zòn alantou yo ak nan vilaj yo pou y achte kichòy, paske yo pa gen anyen pou yo manje.
37
Li reponn, Li di yo konsa: Ba yo manje nou menm. Alò, yo di Li: Èske se achte pou nou ta va al achte desan denye pen pou nou bay moun yo manje?
38
Li mande yo: Konbyen pen nou gen la a? Al gade non! Lè yo fin konnen konbyen, yo di: Senk pen, ak de pwason.
39
Alèkile, Li pase yo lòd pou fè tout moun yo chita an gwoup sou zèb vèt la.
40
Se konsa ke moun yo te chita pa ranje; kèk an gwoup san, kèk an gwoup senkant.
41
Epi, apre ke Li te pran senk pen yo ak de pwason yo, Li voye je L gade syèl la, e Li rann gras; epi Li kase pen yo, e Li bay disip Li yo pou distribye bay moun yo; lèfini, Li divize de pwason yo pou separe bay tout moun.
42
Konsa, tout moun yo te manje vant plen.
43
Apre sa, disip yo ranmase douz panyen plen miyèt pen ak rès pwason.
44
E, kantite moun ki te manje yo te rive senk mil òm konsa.
45
Tousuit apre, Li egzije disip Li yo pou yo monte abò bato a, e pou yo pran devan, pou y al Betsayida, pa lòt bò lanmè a, pandan ke Li menm Li t ap voye foul la ale.
46
Men, apre ke L te fin voye yo ale a, Li monte sou yon mòn pou L lapriyè.
47
Lè aswè te vin rive, bato a te nan mitan lanmè a, e Li menm Li te poukont Li atè a.
48
Li wè difikilte yo te genyen pou yo rame, difèt ke van an te nan sans kontrè ak yo; alò, bò zòn katriyèm vèy lannuit la, Li mache vin jwenn yo sou lanmè a; e Li te fè kòmsi L t ap pase kite yo.
49
Lè yo wè L k ap mache sou lanmè a, yo te panse ke se yon lespri, e yo te pran rele byen fò.
50
Paske, yo tout te wè L e yo te twouble. Alò, menm lè a, Li pale avèk yo, Li di yo konsa: Met gason sou nou! se Mwen menm; pa pè!
51
Lèfini, Li monte jwenn yo nan bato a, epi van an sispann. Alèkile, yo te sezi depase mezi, e yo te etone.
52
Avredi, yo pa t rive konprann siyifikasyon mirak pen yo; poutèt kè yo te andisi.
53
Lè yo fin travèse, yo rive nan peyi Jenezarèt, epi yo koste la.
54
Men, debake yo debake, lamenm, moun yo rekonèt Li.
55
Epi, yo kouri al nan tout zòn nan ak ozalantou yo; lèfini, yo kòmanse mennen moun ki te malad yo sou branka vin kote yo tande L te ye a.
56
Kèlkeswa kote L antre a, kit nan vilaj, kit nan bouk, oswa nan zòn andeyò yo, moun yo te vin met malad yo atè nan lari a, e yo t ap sipliye Li pou L kite yo manyen ata franj rad Li sèlman; e, tout moun ki te manyen L yo, te geri.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!