Liv Mak
Chapit 7
Klike la pou koute lekti chapit sa1
Alèkile, te gen Farizyen ak kèk pwofesè lalwa ki sot Jerizalèm ki te rasanble bò kote Li.
2
Lè yo wè kèk nan disip Li yo t ap manje ak men yo tou sal, ki vle di san men yo pa lave; yo ba yo tò.
3
Paske, Farizyen yo ak tout lòt Juif yo pa manje san ke yo pa lave men yo byen lave, dekwa pou yo kenbe tradisyon Ansyen yo;
4
E, lè yo sot nan mache, toutotan yo pa pirifye tèt yo, yo p ap manje. Anplis de sa, te gen plizyè lòt tradisyon ke yo te resevwa pou yo kenbe, tankou lave gode, krich, veso ki fèt an kuiv, ak tab.
5
Alò, Farizyen ak pwofesè lalwa yo mande Li: Poukisa disip Ou yo pa suiv tradisyon Ansyen yo; men, gade y ap manje ak men yo san lave?
6
Li reponn, e Li di yo konsa: Ezayi te gen rezon pwofetize sou nou an wi, bann ipokrit! Jan sa te ekri a: Pèp sa a se nan bouch l ap onore M, men kè li byen lwen Mwen.
7
Konsa, se pou granmesi y ap adore M nan, paske doktrin y ap anseye yo se kòmandman lèzòm yo ye.
8
Avredi, nou mete kòmandman Bondye yo sou kote, epi se tradisyon lèzòm yo nou kenbe; tèlke lave veso ak gode, epi bagay tankou sa yo, ke n ap fè yo.
9
Li di yo ankò: Nou rejte kòmandman Bondye yo nèt, dekwa pou nou ka kenbe pwòp tradisyon pa nou yo.
10
Pa egzanp, Moyiz te di: Onore papa w ak manman w; e, nenpòt moun ki joure papa l oswa manman l, se pou yo kondane l amò.
11
Men nou menm, nou di: Si yon moun ta va di papa l oswa manman l: Sa ke m te genyen pou w ta benefisye nan men m nan, li kòban; ki vle di, se kado pou Bondye l ye; moun sa a lib.
12
Epi, nou pa pèmèt li fè anyen ankò pou papa l oswa pou manman l.
13
Donk, nou fè Pawòl Bondye a vin san valè avèk tradisyon nou an ke n transmèt la, ansanm ak anpil lòt bagay konsa ke n ap fè.
14
Apre sa, Li rele foul la vin jwenn Li, Li di yo: Nou chak la a tande Mwen, epi pran sans sa M pral di a:
15
Pa gen anyen ki pa deyò yon moun, ki antre anndan l epi ki ka sal li. Men, bagay ki sot anndan yon moun se yo ki sal moun nan.
16
Si yon moun gen zòrèy pou l tande, se pou l tande!
17
Alèkile, lè Li te fin antre nan kay la, lwen foul la, disip Li yo poze L kesyon konsènan parabòl la.
18
Epi, Li di yo: Èske nou san konprann tou? Èske nou pa rekonèt ke nenpòt bagay pa deyò ki antre anndan yon moun pa kapab sal li?
19
Paske, bagay la, se pa nan kè l li antre, men se nan vant li; lèfini, li elimine nan yon kote apa pou dechè, ki pije tout manje?
20
Epi, Li di: Sa ki soti anndan yon moun, se li ki sal moun nan.
21
Paske, se andedan, se kè lèzòm ki donnen move lide, adiltè, fònikasyon, asasinay,
22
vòl, konvwatiz, mechanste, twonpri, pèvèsyon, move je, blasfèm, ògèy ak foli.
23
Tout move bagay sa yo, se anndan yo soti; e, se yo ki sal yon moun.
24
Epi, de la etan, Li leve L al nan zòn fwontyè Ti ak Sidon. Li antre nan yon kay; Li pa t vle pèsonn konn sa, men, Li pa t ka ret kache.
25
Twouve te gen yon madanm ke ti pitit fi l la te gen yon move lespri sou li; madanm nan te tande pale de Jezi, li vini, epi l lage kò l nan pye Jezi.
26
Madanm nan se te yon Grèk, moun Fenisi, nan peyi Siri. Li sipliye Jezi pou Li ta chase demon an soti sou pitit fi l la.
27
Men, Jezi di l konsa: Kite vant timoun yo plen anvan, paske li pa bon pou yo pran pen timoun yo, epi pou voye l bay chyen.
28
Lè sa a, manzè reponn, li di Li konsa: Se vre wi Senyè, epoutan, chyen ki anba tab yo manje miyèt timoun yo.
29
Alò, Li di madanm nan konsa: Poutèt sa w di a, ou mèt ale; demon an soti sou pitit fi w la.
30
Epi, lè madanm nan rive lakay li, li jwenn ke demon an te soti, e pitit fi l la te kouche sou kabann lan.
31
Yon lòt fwa ankò, Jezi kite kòt Ti ak Sidon yo, Li rive bò lanmè Galile a, apre ke L te travèse rejyon Dekapolis la.
32
Yo mennen ba Li yon moun ki te soud e ki te gen difikilte pou l pale; epi yo sipliye L pou Li poze men Li sou misye.
33
Alò, Li deplase ak nonm nan akote foul la; epi, Li mete dwèt Li nan zòrèy misye, Li krache, epi Li touche lang nonm nan.
34
Lèfini, Li gade anlè nan syèl la, Li pouse yon soupi, epi Li di misye: Efata! Sa ki vle di: Se pou w louvri!
35
Epi, lamenm zòrèy nonm lan yo te vin louvri, e fil lang li te demare, e li te pale nòmal.
36
Ansuit, Jezi pase yo lòd pou yo pa di pèsonn sa; men, plis Li te defann yo pale, se plis yo t ap rakonte sa.
37
Avredi, moun yo te sezi depase mezi, e yo t ap di: Li fè tout bagay byen; Li alafwa fè moun soud tande, e moun bèbè pale.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!