Liv Mak
Chapit 8
Klike la pou koute lekti chapit sa1
Nan jou sa yo, foul moun ki te rasanble a te gwo anpil, e yo pa t gen anyen pou yo manje. Jezi rele disip Li yo, Li di yo konsa:
2
Mwen gen konpasyon pou foul la, paske sa deja fè twa jou depi yo la a ansanm avè M, e yo pa gen anyen pou yo manje.
3
E, si Mwen voye yo al lakay yo tou grangou a, y ap tonbe feblès nan wout la, paske gen kèk ladan yo ki soti byen lwen.
4
Men, disip Li yo reponn Li: Ki bò yon moun ka jwenn pen pou kontante moun sa yo nan dezè sa a?
5
Lè sa a, Li mande yo: Konbyen pen nou gen la a? Epi, yo di: Sèt wi.
6
Alèkile, Li pase moun yo lòd pou yo chita atè a; epi, Li pran sèt pen yo, epi Li rann gras; Li kase yo, ansuit li lonje yo bay disip Li yo pou yo sèvi moun yo; e, yo sèvi pen yo bay moun yo.
7
Konsa tou, yo te gen detwa ti pwason, Li beni yo, epi Li di disip li yo pou yo sèvi yo tou bay moun yo.
8
Konsa donk, yo manje, e, yo te kontante; apre sa, disip yo ranmase rès manje, yo te plen sèt panyen.
9
E, kantite moun ki te manje yo te rive katmil konsa; apre sa, Li voye yo ale.
10
Epi lamenm, Li monte nan yon bato avèk disip Li yo; L al tonbe nan zòn Dalmanouta.
11
Alèkile, Farizyen yo vin parèt, epi yo pran diskite avèk Li; yo t ap mande L yon siy ki sot nan syèl; se dekwa pou yo te tante L.
12
Alò, Li pouse yon gwo soupi nan lespri Li, epi Li di: Poukisa jenerasyon sa a ap chèche yon siy nan? Anverite M ap di nou sa: Pa gen okenn siy ke yo va bay jenerasyon sa a!
13
Lèfini, Li kite yo, Li anbake nan bato a ankò, Li travèse al pa lòt bò a.
14
Alèkile, twouve disip yo te bliye pote pen; e nonplis tou, yo pa t gen plis pase yon sèl pen avèk yo nan bato a.
15
E, Li avèti yo, Li di: Veye kò nou, fè atansyon ak ledven Farizyen yo, e ak ledven Ewòd la.
16
Lè sa a atò, yo kòmanse fè refleksyon youn ak lòt, yo t ap di: Èske se poutèt nou pa pot pen an?
17
E, lè Jezi konn sa, Li di yo: Poukisa n ap fè refleksyon poutèt nou pa pote pen an? Se wè nou poko wè toujou; nitou konprann nou pa konprann? Èske se kè nou ki andisi?
18
Atout nou gen je, nou genlè pa wè? Atout nou gen zòrèy, nou genlè pa tande? Epi, nou pa sonje?
19
Lè M te kase senk pen pou senk mil moun yo, konbyen panyen nou te plen ak rès ki te rete yo? Yo di Li: Douz.
20
E lè M te kase sèt pen pou katmil moun yo, konbyen panyen ke n te plen ak rès ki te rete yo? Yo reponn: Sèt.
21
Lè sa a, Li di yo konsa: Kòman nou fè pa konprann?
22
Ansuit, Li vin rive Betsayida; epi, yo mennen yon nonm avèg ba Li, e yo sipliye L pou Li manyen misye.
23
Alò, Li pran men nonm avèg la, Li mennen l al deyò bouk la. Epi, apre ke Li krache nan je misye e ke L poze de men L sou li, Li mande misye si l wè yon bagay.
24
Lè sa a, nonm lan leve je l, li di: Mwen wè moun ki sanble ak pyebwa k ap mache.
25
Apre sa, Jezi mete men L sou je nonm lan ankò, epi Li fè misye gade anlè; e, nonm lan te geri; e li vin wè tout moun aklè.
26
Alèkile, Li voye misye al lakay li, Li di: Pinga w ni antre nan bouk la, ni al di pèsonn nan bouk la sa.
27
Kounye a la a, Jezi deplase ak disip Li yo pou y al nan bouk ki nan Sezare Filip yo; epi, sou wout la Li poze disip Li yo kesyon, Li di yo konsa: Kiyès ke moun yo di Mwen ye?
28
Alò, yo reponn: Jan Batis; men, gen lòt ki di Eli, lòt ankò ki di youn nan pwofèt yo.
29
Alèkile, Li di yo: Men, kiyès nou di ke M ye, nou menm? Pyè reponn, li di L: Ou se Kris la.
30
Lè sa a, Li pase yo lòd pou yo pa di pèsonn sa sou Li.
31
Epitou, Li kòmanse anseye yo, ke Pitit Gason Lòm nan gen pou soufri anpil tray, e ke Ansyen yo, sakrifikatè an chèf yo ak pwofesè Lalwa yo gen pou yo rejte L; e ke yo gen pou yo tiye L; men, ke twa jou apre, L ap resisite.
32
Li te fè deklarasyon sa a aklè. Men, Pyè rale L sou kote, epi li kòmanse repwoche Li.
33
Men apre, Jezi vire tèt Li gade disip Li yo, Li obsève Pyè byen obsève, Li di: Wete kò w sou Mwen, Satan! Paske se pa sou zafè Bondye lide w ye non, men se sou zafè lèzòm.
34
Apre sa, lè Li te fin rele foul la vin jwenn Li ansanm ak disip Li yo tou, Li di yo konsa: Nenpòt moun ki vle suiv Mwen, fò l nye tèt li, fò l pran kwa l, epi pou l suiv Mwen.
35
Paske, nenpòt moun ki vle sove lavi l, va pèdi l; men, nenpòt moun ki ta va pèdi lavi li poutèt Mwen e poutèt levanjil la, li va sove l.
36
Avredi, kisa sa regle pou yon moun si l ta va posede lemonn antye, epi l pèdi pwòp nanm li?
37
Oubyen, ki sa yon moun ta va boukante pou nanm li?
38
Kidonk, nenpòt moun ki ta va wont Mwen, ak pawòl Mwen yo nan jenerasyon moun adiltè ak pechè sa a; moun sa a, Pitit Gason Lòm nan va wont li tou lè Li va retounen nan glwa Papa L la, avèk zanj ki sen yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!