Liv Mak
Chapit 9
Klike la pou koute lekti chapit sa1
Epi, Li di yo konsa: Anverite M ap di nou sa, gen kèk pami moun ki kanpe la a ki p ap wè lanmò pazavan yo wè wayòm Bondye a vini avèk puisans.
2
Se konsa ke sis jou apre, Jezi pran Pyè, Jak ak Jan, Li mennen yo sou yon mòn byen wo, apa poukont yo; epi, aparans Li transfòme devan yo.
3
E, rad sou Li a vin klere, depase blanchè lanèj; nan pwen ke okenn lesivyè sou latè ta ka fè yo vin blan konsa.
4
Alèkile, Eli ak Moyiz parèt devan yo; e, yo t ap pale ak Jezi.
5
Lè sa a, Pyè pran lapawòl, li di Jezi konsa: Mèt, se yon bon bagay sa ye difèt ke nou isit la. Annou monte twa tant non; youn pou Ou, youn pou Moyiz, e youn pou Eli.
6
Anfèt, li pa t konn sa pou l di ankò, si tèlman yo te pè.
7
Epi, gen yon nyaj ki vin kouvri yo; ansuit, yon vwa ki soti nan nyaj la di konsa: Se Pitit Gason byenneme Mwen an sa; koute Li!
8
Epi, menm kote a, lè yo vire gade toutotou yo, yo pa wè pèsonn ankò; sof Jezi avèk yo.
9
Apre sa, pandan yo t ap desann mòn nan, Li pase yo lòd pou yo pa di pèsonn bagay ke yo te wè yo, jiskaske Pitit Gason Lòm nan va resisite pami mò yo.
10
Yo kenbe pawòl sa a pou yo menm; men, youn t ap poze lòt kesyon sou ki sans resisite pami mò yo dwe genyen.
11
Yo mande L, yo di: Poukisa pwofesè Lalwa yo di ke Eli dwe vini anvan an?
12
Alò, Li reponn, Li di yo: Vremanvre, Eli ap vini anvan, e l ap met tout bagay nan lòd; epi, tankou sa te ekri konsènan Pitit Gason Lòm nan, kòmkwa L ap gen pou soufri anpil bagay, e y ap meprize L.
13
Epoutan, M ap di nou sa, se tout bon wi Eli te vini an; e, yo te fè sa yo te vle avèk li; tankou sa te ekri sou li a.
14
Epi, lè L rive kote disip Li yo, Li wè yon gwo foul moun te antoure yo; epi, kèk pwofesè Lalwa ki t ap diskite avèk yo.
15
Alèkike, kou moun yo wè Li, yo te etone anpil; epi, yo kouri al jwenn Li, e yo salye L.
16
Li mande pwofesè lalwa yo: Kisa n ap diskite avè yo la a?
17
Lè sa a, yon moun nan foul la reponn, e li di: Mèt, mwen te mennen pitit gason m nan ba Ou; li gen yon lespri bèbè sou li.
18
E, kèlkeswa kote l pran l nan, li fese l atè, li kimen nan bouch, li pran manje dan l, epi l vin ret tou rèd. Mwen pale ak disip Ou yo pou yo te chase l; men, yo pa t kapab.
19
Jezi reponn li, Li di: O Jenerasyon moun san lafwa, konbyen tan M ap gen pou M rete avèk nou? Konbyen tan M ap gen pou M sipòte nou? Mennen tigason an ban Mwen.
20
Alò, yo mennen l ba Li. Men kou move lespri a wè Jezi, lamenm, li sakaje tigason an, li fese l atè, e li t ap woule ak kimen nan bouch.
21
Jezi mande papa tigason an: Depi konbyen tan bagay sa a tonbe sou li? Papa a di: Depi l toupiti wi;
22
e, souvan li lage l nan dife, ak nan dlo pou l tiye l. Men, si W ka fè nenpòt bagay, gen konpasyon pou nou, e ede nou.
23
Jezi di l: Si w kapab kwè; tout bagay posib pou moun ki gen lafwa.
24
Menm kote a, papa tigason an rele byen fò; li di, ak dlo nan je: Senyè, mwen kwè wi; ede m ak mank lafwa m nan non!
25
Lè Jezi wè foul la t ap kouri vin jwenn yo, Li fè move lespri a obsèvasyon, Li di l konsa: Ou menm lespri bèbè e soudè, Mwen kòmande w, soti sou li, lèfini pa antre nan li ankò.
26
Apre sa, lespri a rele, e li sakaje tigason an; epi, li soti sou li; li te tankou yon moun ki mouri; e, se rezon sa a ki fè kèk moun te di: Li mouri wi!
27
Men, Jezi pran men li, Li fè l leve, epi li kanpe.
28
Epi apre sa, lè Jezi te fin antre nan kay la, disip Li yo mande L an prive: Sa k fè nou pa t ka chase l?
29
Alò, Li di yo konsa: Anyen pa ka fè kalite sa a soti sof lapriyè ak jèn.
30
Yo kite kote yo te ye a; yo pase Galile; men, Li pa t vle pèsonn moun konn sa.
31
Paske, Li t ap anseye disip Li yo, Li t ap di yo: Pitit Gason Lòm nan ap livre nan men lèzòm; y ap tiye L; men, apre ke yo tiye L la, L ap leve sou twa jou.
32
Epoutan, yo pa t konprann sa L di a; men, yo te pè poze L kesyon.
33
Epi, Li rive Kapènawòm; e, lè L antre anndan kay la, Li mande yo: Sou ki sa nou t ap diskite sou wout la konsa?
34
Men, yo ret bouch pe, paske pandan yo te sou wout la, yo t ap diskite pou yo konnen kiyès nan yo ki dwe pi enpòtan.
35
Alèkike, Li chita; epi, Li rele Douz yo, Li di yo konsa: Si yon moun vle pou se li ki anpremye, moun sa a dwe andènye pami tout moun, e li dwe osèvis tout moun.
36
Lèfini, Li pran yon timoun piti, Li mete l nan mitan yo; e apre ke Li pran l kenbe nan bra L, Li di yo:
37
Nenpòt moun ki va resevwa yon timoun konsa yo nan non Mwen, se Mwen ke li resevwa; e anplis, nenpòt moun ki va resevwa M, se pa Mwen ke l resevwa non; men, se Sila ki voye M nan.
38
Jan reponn Li, li di: Mèt, nou te wè yon nonm ki t ap chase demon nan non W; alòske misye pa t suiv nou; donk, nou te defann li fè sa paske l pa t suiv nou.
39
Men, Jezi di: Pinga defann li fè sa non; paske, pa gen yon moun k ap fè yon mirak nan non Mwen, epi pou l ta pale M mal tousuit apre sa.
40
Paske, yon moun ki pa kont nou, se nan kan nou li ye.
41
Paske, kèlkeswa moun ki va ban nou yon gode dlo pou bwè nan non Mwen, poutèt se moun Kris nou ye; anverite M ap di nou sa, li pa gendwa pèdi rekonpans li.
42
Men, kèlkeswa moun ki va lakòz youn nan tipiti sa yo ki kwè nan Mwen yo chite, li t ap pi bon pou moun sa a si yo ta pandye yon wòch moulen nan kou l, epi yo lage l nan lanmè.
43
Konsa, si se men w ki lakòz ou chite; koupe l. Li pi bon pou ou pou ke w antre nan lavi a ak yon bout bra, tan pou se ak toude men w ke w al nan lanfè, nan dife ki p ap janm etenn lan;
44
kote vè yo pa mouri a, e dife a pa etenn lan.
45
Si se pye w ki lakòz ou chite; koupe l. Li pi bon pou ou pou ke w antre nan lavi a ak yon bout janm, tan pou se ak toude pye w ke yo voye w jete nan lanfè, nan dife ki p ap janm etenn lan;
46
kote vè yo pa mouri a, e dife a pa etenn lan.
47
E, si se je w ki lakòz ou chite, rache l jete. Li pi bon pou ou pou w antre nan wayòm Bondye a ak yon grenn je, tan pou se ak toude je w ke yo lage w nan dife lanfè,
48
kote vè yo pa mouri a, e dife a pa etenn lan.
49
Paske, chak moun va gen pou li asezonnen ak dife; e, chak sakrifis va gen pou li asezonnen ak sèl.
50
Sèl bon; men, si sèl la pèdi gou sèl li, ak ki sa n ap sale l ankò? Se pou nou gen sèl nan nou; e, se pou nou gen lapè youn ak lòt.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!