Liv Mak
Chapit 10
Klike la pou koute lekti chapit sa1
Alèkile, Li kite kote l te ye a, epi Li rive sou zòn kòt Jide yo, pa lòt bò Jouden an; e, moun yo vin rasanble bò kote L ankò; e, jan Li abitye fè l la, Li anseye yo ankò.
2
Alò, Farizyen yo pwoche kote L; e, yo mande L: Èske sa legal pou yon nonm divòse ak madanm li? Se te teste yo t ap teste L.
3
Lè sa a, Li reponn, Li di yo: Ki kòmandman Moyiz te ban nou?
4
Yo di: Moyiz te pèmèt yon nonm ekri yon ak divòs pou l voye madanm li ale.
5
Epi, Jezi reponn, Li di yo: Se poutèt jan kè nou di wi ki fè l te ekri règleman sa a pou nou.
6
Men, depi nan kòmansman kreyasyon an, Bondye te fè yo mal ak femèl.
7
Se poutèt sa, yon nonm va kite papa l ak manman l, pou li ini ak madanm li;
8
epi, yo de a ap vin fè yon sèl chè; konsa, yo pa de ankò, men yo se yon sèl chè.
9
Kidonk, sa Bondye ini youn ak lòt, pinga lòm separe l.
10
Apre sa, lè yo te nan kay la, disip Li yo poze L kesyon sou menm zafè sa a.
11
E, Li di yo: Nenpòt moun ki ta va divòse ak madanm li, epi k al marye ak yon lòt fi; li komèt adiltè kont madanm li an.
12
E si yon fanm ta va divòse ak mari l; epi, l al marye ak yon lòt gason, li komèt adiltè.
13
Kounye a menm, moun yo te mennen kèk timoun ba Li pou L te touche yo. Men, disip Li yo te fè moun ki te vini avèk yo a obsèvasyon.
14
Men, lè Jezi wè sa, Li pa t kontan ditou; alò, Li di yo: Kite timoun yo vin jwenn Mwen, pinga nou anpeche yo; paske se pou moun tankou yo wayòm Bondye a ye.
15
Anverite M ap di nou sa: Nenpòt moun ki pa resevwa wayòm Bondye a tankou yon timoun piti, li p ap antre ladan l.
16
Apre sa, Li pran timoun yo nan bra L, Li poze men L sou yo, Li beni yo.
17
Atan Li ta prale sou wout la, gen yon mesye ki kouri vin met ajenou devan L. Li mande Jezi: Bon Mèt, ki sa mwen dwe fè pou m gen lavi etènèl?
18
Alò, Jezi di l: Poukisa w rele M bon an? Pa gen pèsonn moun ki bon, eksepte yon sèl: se Bondye.
19
Ou konnen kòmandman yo: Pa komèt adiltè, pa tiye moun, pa vòlè, pa bay fo temwayaj, pa eksplwate moun, onore papa w ak manman w.
20
Lè sa a nonm lan reponn, li di L konsa: Mèt, m ap suiv tout kòmandman sa yo depi m piti.
21
Alò, Jezi fikse je sou misye ak lanmou pou li, epi Li di l: Gen yon bagay ou manke: Ale, vann tout sa w genyen, epi bay pòv lajan an, konsa, ou va gen trezò nan syèl la; apre sa, vini, pran kwa w, epi suiv Mwen.
22
Men, misye te chagren lè l te tande pawòl sa a; l ale byen tris; paske, li te gen anpil byen.
23
Alò, Jezi vire gade otou Li; epi, Li di disip Li yo: Ala difisil sa ap difisil pou moun ki rich yo antre nan wayòm Bondye a!
24
Men, disip yo te sezi tande pawòl sa a L te di yo a. Alò, Jezi reponn yon lòt fwa, Li di: Timoun, ala difisil sa difisil pou moun ki met konfyans yo nan richès antre nan wayòm Bondye a!
25
Li pi fasil pou yon chamo antre nan yon je zegui pase pou yon moun ki rich antre nan wayòm Bondye a.
26
Lè sa a, yo vin sezi depase mezi, e youn t ap di lòt: Kiyès menm ki ka sove atò?
27
Alèkike, antan Jezi ap gade yo, Li di: Ak lèzòm, sa enposib; men pa ak Bondye, paske tout bagay posib ak Bondye.
28
Alò, Pyè kòmanse pale pou di Li: Gade, nou kite tout bagay, epi nou suiv Ou!
29
Jezi di: Anverite M ap di nou sa: Pa gen moun ki kite kay, oubyen frè, oubyen sè, oubyen papa, oubyen manman, oubyen madanm, oubyen pitit, oubyen tè, poutèt Mwen, e poutèt levanjil la;
30
ki, kounye a nan tan sa a, p ap resevwa san fwa plis kay, frè, sè, manman, pitit, teren, ansanm ak pèsekisyon, e li va jwenn lavi etènèl nan tan k ap vini an.
31
Men, anpil moun ki an premye ap vin an dènye; e, an dènye yo ap an premye.
32
Apre sa, yo te pran wout la yo t ap monte Jerizalèm; e, Jezi t ap mache devan yo; yo te etone; e, atout yo t ap suiv la, yo te pè. Yon lòt fwa ankò, Li pran Douz yo, e Li kòmanse pale yo sa ki te gen pou rive L yo.
33
Li di: Gade, kounye a, n ap monte Jerizalèm; e, Pitit Gason Lòm nan apral livre bay sakrifikatè an chèf yo ak pwofesè lalwa yo; epi, y ap kondane L amò; lèfini, y ap livre L bay Payen yo;
34
lè sa a, y ap pase L nan rizib; e, y ap krache sou Li; epi, y ap tiye L; men, sou twazyèm jou a, L ap resisite.
35
Epi, apre sa, Jak ak Jan, de pitit gason Zebede yo, vanse kote Li, e yo di L: Mèt, nou ta renmen ke W fè sa nou pral mande W la pou nou.
36
Li di yo: Kisa nou vle ke M ta fè pou nou an?
37
Yo di L konsa: Ban nou pèmisyon pou nou chita youn sou men dwat Ou, e lòt la sou men goch Ou lè W va nan glwa W la.
38
Men, Jezi di yo: Nou pa konn sa n ap mande la a non! Èske n ap ka bwè nan gode sa a ke M pral bwè a? Èske nou ka batize ak menm batèm ke M pral batize a?
39
Epi, yo di Li: Nou kapab wi. Lè sa a, Jezi di yo: Se vre, n ap ka bwè nan gode M pral bwè a; e, ak batèm ke M pral batize a, nou va batize avèk li.
40
Men, kanta pou chita sou men dwat Mwen oswa sou men goch Mwen an, se pa Mwen menm ki bay sa; men, plas sa yo rezève pou moun yo te prepare yo a.
41
Alèkile, lè dis lòt disip yo tande sa, yo pete fache kont Jak ak Jan.
42
Men, Jezi rele yo vin jwenn Li, epi Li di yo konsa: Nou konnen ke moun ki konsidere antan ke dirijan Payen yo kòmande yo ak gwo ponyèt, e ke gran nèg yo gen otorite sou yo.
43
Men, se pa konsa sa va fèt pami nou. Okontrè, kèlkeswa moun ki ta vle vin gran pami nou, li dwe vin sèvitè nou;
44
e, kèlkeswa moun ki ta vle an premye pami nou, li dwe vin esklav tout moun.
45
Paske, menm Pitit Gason Lòm nan pa t vini pou moun sèvi L; men, Li te vini pou L sèvi moun, e pou Li bay lavi L kòm ranson pou anpil moun.
46
Epi, yo te rive Jeriko; se konsa ke pandan Li t ap kite Jeriko ansanm ak disip Li yo e yon gwo foul moun, Batime, avèg la, pitit gason Time a, te chita bò wout la ap mande.
47
E lè li tande ke se te Jezi, Moun Nazarèt la, misye te kòmanse rele e li di: Jezi, Ou menm Pitit Gason David la, gen mizerikòd pou mwen.
48
Lè sa a, anpil moun te pran fè l repwòch pou di l pe bouch li. Men, misye rele pi fò toujou: Ou menm Pitit Gason David la, gen mizerikòd pou mwen!
49
Alèkile, Jezi kanpe, e Li bay lòd pou yo rele misye. Konsa, yo rele nonm avèg la, yo di li: Pran kouraj; leve kanpe, men L ap rele w.
50
Epi, misye li menm, voye rad sou li a jete, li leve kanpe, li vin jwenn Jezi.
51
Alò, Jezi reponn e Li di misye: Kisa w vle pou M ta fè pou ou? Nonm avèg la di Li konsa: Senyè, se pou mwen ta gen kapasite pou m wè ankò.
52
Lè sa a, Jezi di misye: Ou mèt al fè wout ou, lafwa w sove w! Epi lamenm, misye resevwa kapasite pou l wè ankò, e li suiv Jezi sou wout la.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!