Liv Mak
Chapit 13
Klike la pou koute lekti chapit sa1
Epi, pandan Li t ap soti nan tanp lan, youn nan disip Li yo di L konsa: Mèt, gade de kalite wòch ak de kalite konstriksyon ki isit la!
2
Men, Jezi reponn, Li di l: Ou wè bèl konstriksyon sa yo? P ap gen yon grenn wòch k ap ret kanpe sou tèt yon lòt pou yo pa vide l atè.
3
Apre sa, pandan Li te chita sou Mòn Oliv la, anfas tanp lan, Pyè, Jak, Jan ak Andre vin kote L apa, yo mande L:
4
Di nou, kilè bagay sa yo va gen pou fèt? E, ki siy ki va genyen lè tout bagay sa yo pral akonpli a?
5
Lè sa a, pou Li reponn, Jezi kòmanse pa di: Fè atansyon pou pèsonn pa twonpe nou.
6
Paske, plizyè moun va vini sou non M; y ap di: Se mwen ki Kris la; e, y ap twonpe anpil moun.
7
Epi, lè nou tande lagè k ap fèt ak bwi k ap kouri sou lagè, pinga nou trakase tèt nou. Fòk bagay sa yo rive; men se poko lafen an sa.
8
Paske, nasyon pral leve kont nasyon, e wayòm kont wayòm; va gen tranblemanntè nan plizyè kote; e, va gen grangou ak dezòd. Se va kòmansman doulè yo sa.
9
Men, nou menm, veye kò nou; paske yo va livre nou nan tribinal; yo va bat nou nan sinagòg; e, yo va mennen nou devan gouvènè ak devan wa poutèt Mwen, pou yon temwayaj kont yo.
10
E anvan sa, fòk levanjil la anonse nan tout nasyon yo.
11
Men, lè y ap mennen n ale a, lè y ap livre nou an, pa reflechi davans sou sa nou pral di; nonplis tou, pa gentan deside anyen nan tèt nou. Men, kèlkeswa sa nou resevwa nan lè sa a, se sa pou nou di; paske, se pa nou menm ki pral pale a non, men, se Lespri Sen an.
12
Alèkile, frè va trayi frè l pou fè tiye l; papa va trayi pitit gason l; timoun va leve kont paran yo pou fè tiye yo.
13
E, tout moun va rayi nou poutèt non Mwen; men, sila ki va andire jiska lafen an, se li menm ki va sove.
14
Men, lè nou va wè abominasyon ki lakòz dezolasyon an, sa pwofèt Danyèl te pale de li a, lè nou wè l kanpe kote l pa t dwe kanpe (se pou moun k ap li a chèche konprann), lè sa a, se pou moun ki nan Jide yo kouri sove al nan mòn yo.
15
E, moun ki sou do kay la, se pa pou l desann nan kay la, ni pou l antre al pran anyen anndan kay la.
16
Epi, moun ki nan jaden an, se pa pou l tounen ankò al pran rad li.
17
Men, ala rèd sa va rèd pou fanm ki ansent yo, ak fanm ki gen tibebe nan tete nan jou sa yo!
18
Men, se pou nou lapriyè pou kouri nou an pa rive nan sezon fredi.
19
paske, nan jou sa yo, va gen tribilasyon tankou sa ki potko janm genyen depi nan kòmansman kreyasyon Bondye te kreye a pou jis rive kounye a; e, p ap janm genyen l ankò.
20
Avredi, sof lefèt ke Senyè a te diminye nan jou yo, pa gen moun ki t ap sove; men, poutèt eli yo, moun Li te chwazi yo, Li te wete nan jou yo.
21
Alò lè sa a, si yon moun ta va di nou: Gade! Men Kris isit la! Oswa: Gade! Men Li lòtbò a! Pinga nou kwè li.
22
Paske, fo Kris ak fo pwofèt va gen pou parèt, e yo va fè de kalite siy ak mèvèy pou yo sedui moun; menm eli yo, si sa te posib.
23
Nou menm atò, se pou n veye; gade, Mwen di nou tout bagay depi davans.
24
Men, nan jou sa yo, apre tribilasyon sa a, solèy la ap vin nwasi; e, lalin nan p ap bay limyè l la ankò;
25
Lèfini, zetwal nan syèl yo va sot tonbe; e, puisans sa yo ki nan syèl la va gen pou yo sekwe.
26
Alèkile, yo va wè Pitit Gason Lòm nan k ap vini nan nyaj yo avèk anpil puisans ak glwa.
27
Alò, Li va voye zanj Li yo; e pral rasanble moun ki eli L yo nan direksyon kat van yo; soti nan dènye pwent latè a, rive nan dènye pwent syèl la.
28
Kounye a, aprann yon parabòl sou pye figfrans lan: Kou branch li apenn ap soti, e ke l ap pouse fèy, nou konnen sezon lete a pre rive.
29
Donk, se menm jan an tou, lè nou va wè bagay sa yo ap rive, konnen ke L toupre; ke L nan papòt la.
30
Anverite M ap di nou ke jenerasyon sa a p ap pase jiskaske tout bagay sa yo rive.
31
Syèl la ak tè a ap pase ale, men pawòl Mwen yo p ap pase ale.
32
Men, jou sa a ak lè sa a, pa gen pèsonn ki konnen yo; non, ni zanj nan syèl yo, ni Pitit Gason an; sèl Papa a.
33
Fè atansyon, veye e priye; paske, nou pa konnen kilè lè a rive.
34
Paske, Pitit Gason Lòm nan, se tankou yon nonm ki fè yon vwayaj al byen lwen, ki te kite lakay li, epi ki te bay sèvitè li yo otorite, e chak moun te gen travay pa l; ansuit, li te pase moun k ap veye pòt la lòd pou l veye.
35
Kidonk, veye! Paske nou pa konnen kilè mèt kay la ap vini an, si se aswè, si se a minui, si se lè kòk ap chante, oswa si se nan maten;
36
dekwa pou sa pa rive li vini sanzatann, epi li jwenn ou k ap dòmi.
37
E, sa Mwen di nou an, M ap di tout moun li: Veye!
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!