Liv Mak
Chapit 14
1
Nan de jou, se t apral fèt Pak la ak fèt Pen San Ledven an. Sakrifikatè an chèf yo ak pwofesè Lalwa yo t ap chèche yon mwayen pou yo fè rize epi met men sou Li pou yo tiye L.
2
Men, yo te di: Se pa nan jou fèt la pou n fè sa, pou sa pa ta rive ke pèp la fè dezòd.
3
Se konsa, pandan Li te Betani lakay Simon ki te gen lèp la, Li chita atab pou L manje, e twouve gen yon dam ki vini ak yon bokal ann albat ki te gen yon pafen na ki vann chè anpil ladan l; epi, manzè kase bokal la, e li vide pafen an sou tèt Jezi.
4
Alèkile, te gen kèk moun ki te fè gwo kòlè; e, antre yo, yo t ap di: Poukisa gaspiyaj pafen sa a fèt?
5
Paske, pafen sa a ta ka vann pou plis pase twasan denye, e yo ta bay pòv kòb la! Se pa ti mimire yo t ap mimire kont dam nan.
6
Men, Jezi di: Kite l trankil! Poukisa n ap nui l nan? Se yon bòn zèv li fè pou Mwen.
7
Paske, pòv yo, n ap toujou genyen yo avèk nou, e nenpòt lè nou vle, n ap ka fè byen pou yo; alòske Mwen menm, nou p ap toujou genyen M avèk nou.
8
Li fè sa l kapab. Se depi davans ke li anbome kò Mwen pou antèman an.
9
Anverite M ap di nou sa: Tout kote levanjil sa a va preche sou tè a, yo va rakonte sa l te fè a tou, an souvni de li.
10
Apre sa, Jida Iskaryòt, youn nan Douz yo, al kot sakrifikatè an chèf yo pou l livre Jezi ba yo.
11
Lè yo tande sa, yo kontan e yo pwomèt misye pou yo ba l lajan. Kidonk, misye te vin ap chèche yon bon okazyon pou li trayi Jezi.
12
Epi, nan premye jou fèt Pen San Ledven an, jou ke yo tiye bèt y ap sakrifye pou Pak la, disip Li yo mande L: Ki kote Ou ta vle n al prepare pou Ou pouke W kapab manje dine Pak la?
13
Alèkile, Li voye de nan disip Li yo ale, Li di yo: Antre nan vil la, n ap rankontre ak yon mesye k ap pote yon krich dlo. Suiv li;
14
epi, kenpòt kote li va antre a, di mèt kay la: Mèt la di: Kibò pyès kote Mwen va manje dine Pak la avèk disip Mwen yo ye?
15
Lè sa a, l ap montre nou yon gwo pyès aletaj ki tou founi e pare. Se la pou n prepare pou nou an.
16
Kidonk, disip Li yo ale; e, yo antre nan vil la, epi yo jwenn bagay yo jan ke Li te di yo a. Apre sa, yo fè preparasyon pou Pak la.
17
E, nan aswè, Li vini ak Douz yo.
18
Antan ke yo te atab ap manje, Jezi di: Anverite M ap di nou sa: Gen youn nan nou k ap manje avè M la a ki pral trayi M.
19
Alò, yo te kòmanse ap vin tris; epi youn apre lòt, yo mande L: Èske se mwen? Ansuit, yon lòt mande: Èske se mwen?
20
Lè sa a, Li di yo: Se youn nan Douz yo k ap tranpe pen nan bòl manje a avèk Mwen an.
21
Se vre ke Pitit Gason Lòm nan prale, tankou sa te ekri sou Li a; men, malè pou nonm sa a ke se pa mwayen li menm ke trayizon Pitit Gason Lòm nan rive a! Li t ap pi bon pou nonm sa a si l pa t janm fèt.
22
Pandan yo t ap manje a, Jezi pran pen, Li beni l, epi Li kase l, apre sa, Li ba yo l, ansuit Li di: Pran, manje! Sa se kò Mwen.
23
Epi apre, Li pran koup la, e lè Li fin rann gras, Li ba yo l, e yo tout bwè ladan l.
24
Ansuit, Li di yo konsa: Sa se san Mwen pou Nouvo Alyans lan, ki koule pou anpil moun.
25
Anverite M ap di nou sa: Mwen p ap bwè fwi pye rezen an menm ankò, jis nan jou sa a ke M va bwè youn ki nouvo, nan wayòm Bondye a.
26
Epi, apre yo te fin chante yon Im, yo soti, y ale sou Mòn Oliv.
27
Alèkile, Jezi di yo konsa: Nou tout pral chite akòz Mwen aswè a; paske, men sa ki ekri: M ap frape bèje a, epi mouton yo va gaye.
28
Epoutan, apre Mwen resisite, Mwen pral Galile anvan nou.
29
Men, Pyè di L konsa: Menmsi tout lòt yo va chite; men, kanta mwen menm, mwen p ap chite!
30
Lè sa a, Jezi di l: Anverite M ap di w ke jodi a, aswè a la a, anvan kòk la chante de fwa, w ap gentan nye m twa fwa.
31
Men, misye ensiste pi rèd li di: Menmsi pou m ta mouri avè W, anyen pa ka fè m nye W. E, yo tout di menm bagay la tou.
32
Apre sa, yo rive yon kote ki rele Jetsemane. Li di disip Li yo: Chita la pandan ke Mwen pral lapriyè.
33
Li pran Pyè, Jak ak Jan avèk Li; epi, Li vin santi yon doulè san parèy; e, Li te santi L twouble anpil.
34
Li di yo: Yon tristès amò, depase mezi, anvayi nanm Mwen. Rete la, epi veye!
35
Alò, Li vanse yon tikras pi lwen, Li lage kò L atè a, epi Li lapriyè pou ke si sa ta posib, lè a ta ka pase lwen Li.
36
Epi, Li di: Abba, Papa, tout bagay posib pou Ou. Wete koup sa a devan Mwen non. Alò, se pa sa Mwen vle a, men se sa Ou vle a.
37
Apre sa, Li tounen, Li jwenn yo ap dòmi; epi Li di Pyè: Simon, apa se dòmi w ap dòmi? Ou pa t ka ret ap veye pandan inèdtan?
38
Se pou nou veye e priye, dekwa pou nou pa tonbe nan tantasyon. Avredi, lespri a pare, men chè a fèb.
39
Epi Li deplase ankò, Li lapriyè, Li di menm pawòl yo.
40
E lè L retounen, Li jwenn y ap dòmi ankò, (paske je yo te lou); yo pa t konn kisa pou yo reponn Li.
41
Li tounen sou twazyèm fwa a, Li di yo: Nou dòmi e nou pran repo! Setase! Lè a rive! Gade! Pitit Gason Lòm nan livre nan men pechè yo.
42
Leve non, ann ale; men li, moun ki trayi M nan rive!
43
Menm kote a vre, pandan L t ap pale a, Jida, youn nan Douz yo, parèt ak yon gwo foul ki te vin ak epe, ak baton; se moun ke sakrifikatè an chèf yo, pwofesè Lalwa yo, ak Ansyen yo te voye.
44
Twouve ke moun ki te trayi L la te ba yo yon siy, li te di: Moun mwen va bo a, se Li menm; arete L, epi mennen L ale an sekirite.
45
Yonfwa misye te vin rive, li mache dwat sou Jezi, li di: Mèt, Mèt! Epi li bo L.
46
Se konsa, yo met men sou Li; epi, yo arete L.
47
Alèkile, youn nan moun ki te kanpe la yo rale yon epe, li bay sèvitè sakrifikatè souvren an yon kout epe, e koupe zòrèy li.
48
Men lè sa a, Jezi di yo: Apa nou vini ak epe ak baton pou n arete M tankou se yon vòlè M ye!
49
Mwen te avèk nou chak jou nan tanp lan ap anseye; epoutan, nou pa t arete M; men, Ekriti yo dwe akonpli konsa.
50
Lè sa a, tout disip yo vire kite L, yo kraze rak.
51
Men, te gen yon jennonm ki te suiv Li; se sèlman yon dra an twal len ki te vlope kò misye. Epi, vin gen yon jenn gason ki eseye kenbe li;
52
men, misye kite dra len an, li sove nan men yo toutouni.
53
Kounye a, yo mennen Jezi ale kote sakrifikatè souvren an; se la ke tout sakrifikatè an chèf yo, Ansyen yo ansanm ak pwofesè Lalwa yo te reyini.
54
Alò, Pyè te suiv Li de lwen, jis rive nan lakou sakrifikatè souvren an; epi, li chita ak sèvitè yo, e li t ap chofe kò l bò dife a.
55
Alèkile, sakrifikatè an chèf yo ak tout Konsèy la t ap chèche jwenn temwayaj kont Jezi pou yo te ka tiye L; men, yo pa t jwenn ankenn.
56
Avredi, anpil moun te bay fo temwayaj sou Li, men temwayaj yo pa t ann akò youn ak lòt.
57
Se konsa vin gen kèk moun ki kanpe, yo bay fo temwayaj kont Li, yo di:
58
Nou te tande L ap di: M ap kraze tanp sa a ki fèt ak men moun lan, epi nan twa jou M ap bati yon lòt ki fèt san men moun.
59
Men, la a ankò, temwayaj yo a pa t ann akò youn ak lòt.
60
Alèkile, sakrifikatè souvren an kanpe nan mitan yo, epi li poze Jezi kesyon, li di: Apa W pa reponn anyen? Kisa l ye ke y ap temwaye kont Ou konsa a?
61
Men, Jezi fèmen bouch Li; Li pa di yon mo. Sakrifikatè souvren an poze L kesyon ankò, li di L: Èske W se Kris la, Pitit Gason Sila ki beni an?
62
Lè sa a, Jezi di: Wi, se Li menm Mwen ye; e, nou va wè Pitit Gason Lòm nan chita sou men dwat puisans lan; epi k ap vini nan nyaj yo nan syèl la.
63
Lè sa a, sakrifikatè souvren an chire rad sou li a, epi li di: Poukisa nou bezwen lòt temwen ankò?
64
Nou tande blasfèm nan. Kisa nou panse? Alò, yo tout akize L, pou Li kondane amò.
65
Epi, kèk ladan yo pran krache sou Li, yo kouvri figi L, epi yo ba L kout pwen, lèfini yo di L: Pwofetize non! Ansuit, sèvitè yo te souflete L ak pla men yo.
66
Pandan Pyè te twouve l anba nan lakou a, youn nan sèvant sakrifikatè souvren an te vin parèt;
67
e, lè l wè Pyè ki t ap chofe kò l, li fikse je l sou misye, epi l di: E ou menm tou, ou te avèk Jezi moun Nazarèt la!
68
Men, misye nye sa, li di: M pa ni konnen, ni konprann sa w ap di la a. Apre sa, misye al kanpe bò gerit la; e, lè sa a, kòk la chante.
69
Se konsa yon sèvant wè misye ankò, epi manzè te vin kòmanse ap di moun ki te kanpe la yo: Misye se youn nan yo wi!
70
Alò, Pyè nye sa ankò. Epi, yon ti moman apre, moun ki te kanpe la yo di Pyè yon lòt fwa: Se vre wi, ou se youn nan yo! Dayè, se moun Galile w ye; e, ou pale tankou moun ki sot la.
71
Men lè sa a, misye kòmanse joure, epi l fè sèman, li di: Mwen pa konn nonm n ap pale de li a!
72
Alèkile, kòk la chante yon dezyèm fwa; epi, Pyè sonje pawòl Jezi te di l la: Anvan kòk la chante de fwa, ou va nye M twa fwa. Alò, lè l reflechi sou sa, li tonbe kriye.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!