Liv Mak
Chapit 16
Klike la pou koute lekti chapit sa1
Epi, lè Saba te fin pase, Mari, moun Magdala, ak Mari, manman Jak, ansanm ak Salome, t al achte fèy santi bon pou vin friksyone kò Jezi.
2
Konsa donk, byen bonè nan maten, nan premye jou semèn nan, kou solèy leve, yo vin nan tonb lan.
3
Youn t ap di lòt: Ki moun ki pral woule wòch la soti devan pòt tonb lan pou nou?
4
Men, lè yo leve je yo gade, yo wè wòch la te deja woule soti devan pòt tonb lan; atout se te yon wòch ki te gwo anpil.
5
E, lè yo vin antre nan tonb lan, yo wè yon jenn gason ki te chita sou bò dwat la; li te gen yon wòb blanch long sou li; yo te pè.
6
Li di yo: Nou pa bezwen pè non; Se Jezi, moun Nazarèt la, Li menm yo te krisifye a, n ap chèche; Li resisite, Li pa isit la. Gade! Men kote yo te mete L kouche a.
7
Men, al fè wout nou, di disip Li yo avèk Pyè: Li pran devan nou, L al Galile; se la nou va wè Li, tankou L te di nou an.
8
Konsa donk, yo soti rapid nan tonb lan, yo kouri ale, yo t ap tranble e yo te sezi anpil. Yo pa t di pèsonn anyen, tèlman yo te pè.
9
Lè Jezi te fin resisite a byen bonè premye jou nan semèn nan, Li te parèt toudabò devan Mari, moun Magdala ke Li te chase sèt demon sou li a.
10
Epi, Mari t al rakonte moun ki te konn ak Jezi yo sa, kòm yo te nan lapenn e yo t ap kriye.
11
Men yo menm, lè yo tande ke Li te vivan e ke Mari te wè Li, yo pa t kwè.
12
Apre sa, Li te parèt sou yon lòt fòm devan de nan yo pandan yo t ap mache al andeyò.
13
Epi yo tounen al rakonte rès disip yo sa; men, disip yo pa t kwè yo nonplis.
14
Apre sa, Li te parèt devan onz apot yo pandan yo te atab, e Li repwoche yo poutèt enkredilite yo, e poutèt kè yo ki andisi, paske yo pa t kwè moun ki te wè L yo apre ke L te fin resisite a.
15
Epi, Li di yo: Ale nan lemonn antye, e preche levanjil la bay tout kreyasyon an.
16
Moun ki kwè e ki batize va sove, men moun ki pa kwè va kondane.
17
Epitou, siy sa yo ap akonpanye moun ki kwè yo: Nan non Mwen yo va chase demon, yo va pale nan nouvo lang,
18
yo va kenbe sèpan, e si yo ta bwè yon bagay ki se pwazon, li p ap fè yo anyen; yo va poze men yo sou malad, e moun yo va geri.
19
Konsa donk, lè Senyè a te fin pale avèk yo a, Li monte nan syèl, e Li chita sou men dwat Bondye.
20
Alèkile, yo mache al preche toupatou; Senyè a t ap travay avèk yo; e Li t ap konfime Pawòl la avèk mirak ki mache ansanm avè l. Amèn.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!