Liv Jan
Chapit 2
Klike la pou koute lekti chapit sa1
Nan twazyèm jou a, te gen yon maryaj nan Kana, ki nan Galile; e, manman Jezi te la.
2
E, Jezi ak disip Li yo, toulède te envite nan maryaj la.
3
Epi, lè yo te vin bezwen diven, manman Jezi di Li: Yo pa gen diven non!
4
Jezi di li: Madanm, kisa Mwen gen pou M wè nan sa avè w? Lè M nan poko rive.
5
Manman L di sèvitè yo: Nenpòt sa Li di nou fè, fè l!
6
Alò, te gen sis ja dlo an wòch ki te kanpe la, dapre jan pirifikasyon Juif yo te fèt la; yo chak te kenbe dezoutwa mezi konsa.
7
Jezi di yo: Plen ja yo ak dlo. Epi, yo plen yo ra bouch.
8
Apre, Li di yo: Kounye a, pran ladan l, epi, pote bay chèf kanbiz la. Epi, yo pote l ba li.
9
Lè chèf kanbiz la te goute dlo a ki te tounen diven an, misye pa t konn kibò l te soti; (men sèvitè yo ki te tire dlo a, te konnen); chèf kanbiz la rele lemarye a;
10
epi, li di misye: Tout moun, se nan kòmansman resepsyon yo sèvi diven siperyè a; e, apre moun fin byen bwè, yo sèvi sa ki enferyè a; men ou menm, ou te kite diven siperyè a jis pou kounye a.
11
Se kòmansman mirak siy ke Jezi te fè nan Kana, ki nan Galile; e, Li te fè glwa Li parèt aklè; epi, disip Li yo te kwè nan Li.
12
Apre sa, Li desann al Kapènawòm, Li menm, ak manman Li, ak frè Li yo, ak disip Li yo; men, yo pa t fè anpil jou la.
13
Fèt Pak Juif yo te pre rive, e, Jezi monte Jerizalèm;
14
epi, Li jwenn nan tanp lan, moun ki t ap vann bèf, mouton, ak pijon, avèk moun k ap chanje lajan yo, ki te chita.
15
Apre ke Li te fè yon fwèt ak ti kòd kout, Li chase yo tout soti nan tanp lan, e mouton, e bèf; epi, Li voye lajan moun ki t ap chanje yo atè, ansuit, Li chavire tab yo.
16
Epi, Li di moun ki t ap vann pijon yo: Wete bagay sa yo la a; pa fè lakay Papa M nan vin tounen yon mezon komès.
17
E, disip Li yo sonje ke sa te ekri: Chalè devouman pou lakay Ou a, ap fin devore M.
18
Lè sa a, Juif yo reponn, e yo di Li: Ki mirak siy ke W montre nou, ki fè W fè bagay sa yo?
19
Jezi reponn, Li di yo: Detwi tanp sa a, epi, nan twa jou, M ap remete l kanpe.
20
Alò, Juif yo di: Karannsizan ke tanp sa a te pran pou l bati, epi Ou menm, W ap remete l kanpe sou twa jou?
21
Men, Li t ap pale de tanp kò Li.
22
Se sa ki fè ke lè Li te resisite pami mò yo, disip Li yo te sonje ke Li te di yo sa, epi, yo te kwè Lekriti, ak Pawòl Jezi te di a.
23
Alò, lè Li te Jerizalèm pandan Pak la, nan jou fèt la, anpil moun te kwè nan non Li, lè yo te wè mirak ke Li t ap fè yo.
24
Men, Jezi pa t angaje tèt Li avèk yo, paske Li te konn lèzòm;
25
epi, Li pa t bezwen pèsonn temwaye ba Li sou lòm, paske Li te konnen sa ki nan lòm.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!