Liv Jan
Chapit 3
Klike la pou koute lekti chapit sa1
Te genyen yon nonm pami Farizyen yo ki te rele Nikodèm, yon dirijan Juif yo;
2
se li menm ki te vin bò kote Jezi lannuit lan, epi, li te di Li: Rabi, nou konnen ke W se yon pwofesè ki soti kote Bondye, paske ankenn moun pa kapab fè mirak sa ke W ap fè yo, eksepte si Bondye avèk li.
3
Jezi reponn, e Li di misye: Anverite, anverite, Mwen di w sa; eksepte si yon moun nedenouvo, li pa kapab antre nan wayòm Bondye a.
4
Nikodèm di Li: Kòman yon moun ka fè fèt, alòske l fin granmoun? Èske l kapab antre yon dezyèm fwa nan vant manman l, epi, pou l fèt?
5
Jezi reponn: Anverite, anverite, Mwen di w sa, eksepte si yon moun pran nesans nan dlo, ak nan Lespri a, li pa kapab antre nan wayòm Bondye a.
6
Sa ki pran nesans nan chè, se chè; e, sa ki pran nesans nan Lespri a, se lespri.
7
Pa sezi dèske Mwen te di w, fòk nou nedenouvo.
8
Van an soufle kote li vle, e, ou tande bwi li, men w pa konn kote l soti, ni kote l prale; se menm jan an pou tout moun ki pran nesans nan Lespri a.
9
Nikodèm reponn, e li di Li: Kijan bagay sa yo fè fèt?
10
Jezi reponn, e Li di misye: Ou menm ki se pwofesè pèp Izrayèl la, epi w pa konn bagay sa yo?
11
Anverite, anverite, Mwen di w sa, N ap pale de sa Nou konnen, e temwaye sa Nou te wè, men nou menm, nou pa resevwa temwayaj Nou an.
12
Si Mwen pale nou de bagay ki sou latè, epi nou pa kwè, kòman pou nou va kwè, si Mwen pale nou de bagay ki nan syèl la?
13
E, pèsonn pa monte nan syèl la, sof Sila ki desann sot nan syèl la; Li menm, Pitit Gason Lòm nan ki nan syèl la.
14
E, tankou Moyiz te leve sèpan an anlè nan dezè a, se konsa ke Pitit Gason Lòm nan dwe pou yo leve L anlè;
15
Dekwa pou nenpòt moun ki kwè nan Li, pa peri; men, pou li gen lavi etènèl.
16
Paske, Bondye te sitèlman renmen lemonn, ke Li te bay sèl Pitit Gason Li te bay nesans lan, dekwa pou nenpòt moun ki kwè nan Li, pa peri, men, pou li gen lavi ki p ap fini an.
17
Paske, Bondye pa t voye Pitit Gason Li a nan lemonn pou kondane lemonn; men, pou ke lemonn ka sove pa mwayen Li menm.
18
Moun ki kwè nan Li, pa kondane; men, moun ki pa kwè a, deja kondane, paske li pa kwè nan non sèl Pitit Gason Bondye bay nesans lan.
19
E, men sa ki kondanasyon an: sèke limyè a vini nan lemonn; men, lèzòm renmen fènwa olye de limyè, paske zèv yo t ap fè yo, se move zèv.
20
Paske, tout moun k ap fè mal rayi limyè a, ni yo p ap vini nan limyè a, pou sa pa ta rive ke moun rele chal bare dèyè zèv y ap fè yo.
21
Men, moun k ap fè sa ki dapre laverite, li vini kote limyè a, dekwa pou zèv li yo ka parèt aklè, ke se nan Bondye yo te fèt.
22
Apre bagay sa yo, Jezi ak disip Li yo vini nan rejyon Jide a, Li rete la avèk yo, epi, Li t ap batize.
23
E, Jan, Li menm tou t ap batize nan Enon, tou pre Salim, paske te gen bon kou dlo la; moun te vini, epi yo te batize.
24
Paske, Jan potko fèmen nan prizon.
25
Alò, vin gen yon diskisyon ki leve ant kèk nan disip Jan yo ak Juif yo, konsènan pirifikasyon.
26
Epi, yo vin kote Jan, e yo di li: Rabi, Sila ki te avèk ou lòt bò Jouden an, se sou Li ou te temwaye a; gade, L ap batize, epi tout moun vin jwenn Li.
27
Jan reponn, li di: Yon nonm pa ka resevwa anyen, eksepte si se syèl la ki ba li l.
28
Nou menm, nou se temwen m, ke mwen te di se pa mwen ki Kris la, men, ke mwen menm, yo voye m anvan Li.
29
Moun ki gen lamarye a, se lemarye a; men, zanmi lemarye a, ki kanpe la, k ap tande l yo, yo rejwi anpil poutèt vwa lemarye a; konsa donk, lajwa pa m nan okonplè.
30
Li menm, fòk Li ogmante, mwen menm, fòk mwen diminye.
31
Sila a ki soti anwo a, anlè tèt tout moun; sila ki soti nan latè, li gen nati latè, e, li pale de latè; Sila ki soti nan syèl la, anlè tèt tout moun.
32
Li te wè, e, Li te tande sa L ap temwaye yo; men, pèsonn pa resevwa temwayaj Li a.
33
Moun ki te resevwa temwayaj Li a, te sètifye ke Bondye di sa ki vre.
34
Sila ke Bondye voye a, ap anonse Pawòl Bondye yo, paske, Bondye pa ba Li Lespri a ak ankenn mezi.
35
Papa a renmen Pitit Gason an, e Li remèt tout bagay nan men L.
36
Moun ki kwè nan Pitit Gason an, gen lavi ki p ap janm fini an; e, moun ki pa kwè Pitit Gason an, p ap wè lavi; men kòlè Bondye rete sou li.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!