Liv Jan
Chapit 4
Klike la pou koute lekti chapit sa1
Konsa, lè Senyè a konnen ke Farizyen yo te tande ke Jezi t ap fè e te batize plis disip pase Jan;
2
alò, Jezi Li menm pa t batize moun non; men, se disip Li yo;
3
Li kite Jide, e, Li pati ankò al Galile.
4
Rive ke Li te blije pase anndan Samari.
5
Konsa, Li vin nan yon vil nan Samari ki te rele Sika, tou pre pi Jakòb te bay Jozèf, pitit gason li a.
6
Donk, se la ke pi Jakòb la te ye. Alò, Jezi ki te fatige pa vwayaj la, ale chita bò pi a; e, li te vè sizyèm è a konsa.
7
Te gen yon dam, moun Samari, ki te vin tire dlo; Jezi di li: Ban Mwen bwè enpe.
8
Difèt ke disip Li yo te ale nan vil la pou achte manje.
9
Alò, dam Samari a di Li: Kijan fè ke Ou menm ki se yon Juif, ap mande m dlo pou bwè, mwen menm ki se yon fanm Samari? Sèke, Juif pa t gen rapò ak Samariten yo.
10
Jezi reponn, e Li di l: Si w te konnen kado Bondye a, epi kiyès Li ye ki di w: ban M bwè enpe a, se Li menm ou t ap mande, epi, Li t ap ba ou dlo vivan an.
11
Madanm nan di Li: Mesye, bon W pa gen anyen pou W tire dlo, epitou, pi a fon; ki bò W gen dlo vivan sa a?
12
Èske W pi enpòtan pase papa nou Jakòb ki te ban nou pi sa a, e ki te bwè ladan l, li menm ak pitit li yo, ak twoupo li yo?
13
Jezi reponn, Li di: Nenpòt moun ki bwè dlo sa a, gen pou l swaf ankò;
14
men, nenpòt moun ki bwè nan dlo ke Mwen va ba li a, p ap janm swaf ankò; men, dlo ke M va ba li a, ap vin yon sous nan li k ap ponpe dlo rive nan lavi ki p ap fini an.
15
Madanm nan di Li: Mesye, ban m dlo sa a non, pou m pa swaf, nitou pou m pa vin tire dlo isit la ankò.
16
Jezi di li: Ale rele mari w, epi vin isit la.
17
Madanm nan reponn, e li di: Mwen pa gen mari. Jezi di li: Ou byen fèt di: ‘ Mwen pa gen mari ’,
18
paske w pase senk mari; e sa ke w gen kounye a, li pa mari w. Konsa, sa w di a, se laverite.
19
Madanm nan di Li: Mesye, mwen wè ke W se yon pwofèt;
20
zansèt nou yo te adore sou mòn sa a, e, nou menm yo, nou di ke se Jerizalèm ki kote ke moun dwe adore.
21
Jezi di li: Madanm, kwè Mwen; lè a ap vini kote ke se pa ni sou mòn sa a, ni Jerizalèm, ke moun va adore Papa a.
22
Nou menm yo, n ap adore sa nou pa konnen; nou menm, nou konnen sa n ap adore a, paske, sali nanm nan, se nan Juif yo ke li soti.
23
Men, lè a ap vini, e, li deja la, kote vre moun k ap adore tout bon vre yo, va adore Papa a ann espri e an verite; paske se moun konsa ke Papa a ap chèche pou adore L.
24
Bondye se Lespri, e moun k ap adore Li yo, dwe adore Li ann espri e an verite.
25
Madanm nan di Li: Mwen konnen ke Mesi a ap vini, Sila ke yo rele Kris la; lè Li vini, L ap di nou tout bagay.
26
Jezi di li: Mwen menm k ap pale avèk ou a, Mwen se Li.
27
Epi, se lè sa a ke disip Li yo vini. Yo te sezi wè ke L t ap pale ak dam nan; poutan, ankenn moun pa di: Sa W te vle? Oswa: Poukisa W t ap pale ak li a?
28
Alò, madanm nan kite ja dlo a la, epi l al fè wout li, li antre nan vil la; epi li di moun yo:
29
Vin wè yon nonm ki di m tout bagay ke m te janm fè; èske se pa ta Kris la?
30
Yo soti kite vil la, epi yo vini kote Li.
31
Pandanstan, disip Li yo t ap sipliye L, yo t ap di: Mèt, manje non!
32
Men, Li di yo: Mwen gen manje pou M manje ke nou pa konnen anyen de sa.
33
Alò, disip yo, youn t ap di lòt: Èske gen yon moun ki dwe te pote manje pou Li?
34
Jezi di yo: Manje pa M, se fè volonte Sila ki voye Mwen an, epi, pou fini travay Li a.
35
Èske nou pa di ke nan kat mwa ankò, lè rekòt la ap rive? Gade, Mwen di nou sa, leve je nou anlè, epi, gade jaden yo, paske, yo deja blanchi, pare pou rekòt la.
36
E, moun ki rekòlte a resevwa yon salè; e, li rasanble fwi pou lavi etènèl; dekwa pou ke toude, e moun ki simen an, e moun ki rekòlte a, kapab rejwi ansanm.
37
E konsa, pwovèb la di laverite: Yon moun simen, yon lòt rekòlte.
38
Mwen te voye nou rekòlte kote ke nou pa t fè ankenn travay; men, se lòt moun ki te travay; epi, nou antre nan travay pa yo.
39
E, anpil nan Samariten nan vil la te kwè nan Li, akòz pawòl madanm nan ki te temwaye a: Li di m tout sa mwen janm fè.
40
Konsa, lè Samariten yo te vin kote Li a, yo sipliye L pou Li rete avèk yo; e, Li rete la pandan de jou.
41
E, anpil lòt moun te vin kwè poutèt pwòp pawòl Li.
42
Epi, yo di madanm nan: Kounye a, nou kwè, nonpa akòz sa w te di a; paske nou tande Li nou menm, e, nou konnen tout bon vre ke se Kris la, Sovè lemonn lan.
43
Se konsa, apre de jou, Li pati kite la a, epi L ale nan Galile;
44
paske, Jezi Li menm te temwaye ke yon pwofèt pa gen lonè nan pwòp peyi pa l.
45
Donk, lè Li te vini nan Galile, moun Galile yo resevwa L, difèt ke yo te wè tout bagay ke Li te fè Jerizalèm yo nan fèt la; paske, yo menm tou, yo te ale nan fèt la.
46
Se konsa ke Jezi vini ankò Kana, nan Galile, kote ke Li te fè dlo vin tounen diven an. E, te gen yon ofisye wa a ki te gen pitit gason l malad Kapènawòm.
47
Lè li tande ke Jezi te kite Jide pou L vin nan Galile; li monte kote L; epi, li sipliye L pou Li desann, epi geri pitit gason l nan; paske li te rive pre lanmò.
48
Lè sa a, Jezi di li: Eksepte si nou wè siy ak mèvèy, nou p ap kwè!
49
Ofisye wa a di Li konsa: Mesye, ann desann non, anvan pitit mwen an mouri
50
Jezi di li: Ou mèt al fè wout ou, pitit gason w lan ap viv. Epi, nonm nan kwè pawòl Jezi te di li a; e, misye al fè wout li.
51
Epi, pandan kounye a ke l t ap desann, sèvitè li yo kontre avè l; epi, yo anonse l sa; yo di li: Pitit gason w lan ap viv.
52
Lè sa a, li poze yo kesyon pou l te konnen a ki lè li te refè a; epi, yo di li: Ayè, nan setyèm è a konsa, lafyèv la tonbe sou li.
53
Alò, papa a te konnen ke se te menm lè sa a ke Jezi te di li: Pitit gason w lan ap viv; konsa, e li menm li te kwè, ansanm ak tout moun lakay li.
54
Se sa ki te dezyèm mirak siy ke Jezi te fè, lè Li te soti kite Jide pou L vin nan Galile.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!