Liv Jan
Chapit 6
Klike la pou koute lekti chapit sa1
Apre bagay sa yo, Jezi ale lòt bò Lanmè Galile, ki se lanmè Tiberyad.
2
Epi, yon gwo foul moun te suiv Li, poutèt yo te wè bann mirak Li yo ke Li te fè sou moun ki te malad yo.
3
Ansuit, Jezi monte sou yon mòn, epi Li chita la, ak disip Li yo.
4
E, Pak la, youn nan fèt Juif yo, te vanse rive.
5
Lè Jezi leve je L atò, e ke L wè kantite foul moun sa yo ki t ap vin jwenn Li an, Li di Filip; Ki kote nou va jwenn pou achte pen pou moun sa yo manje?
6
Vremanvre, Li te di misye sa, pou teste l; paske Li menm, Li te konnen kisa L ta pral fè.
7
Filip reponn Li: Desan denye pen p ap ase pou yo, pou ke chak moun ta pran yon ti moso!
8
Youn nan disip yo, Andre, frè Simon Pyè a, di Li:
9
Gen yon ti gason isi a ki gen senk pen dòj ak de ti pwason; men, kisa sa reprezante devan tout foul moun sa yo?
10
Epi, Jezi di: Fè moun yo chita! Alò, te gen bon kou zèb gazon nan kote sa a; donk, moun yo chita. Kantite yo, te rive senk mil konsa.
11
Ansuit, Jezi pran pen yo, e, apre ke Li fin rann gras, Li distribye yo bay disip yo; epi, disip yo bay moun ki te chita yo; e, menm jan an tou pou pwason yo; kantite yo te vle.
12
Lè vant yo te plen, Li di disip Li yo: Ranmase moso ki rete yo, dekwa pou anyen pa pèdi.
13
Konsa donk, yo ranmase e mete yo ansanm; e, yo plen douz panye, ak rès senk pen dòj ki te rete a, apre ke moun yo te fin manje.
14
Alò, moun sa yo, lè yo te wè mirak ke Jezi te fè a, yo di: Sa a vre, se Pwofèt ki te gen pou vini nan lemonn lan!
15
Alèkile, lè Jezi santi ke yo ta pral pran Li, pou yo fè L Wa, Li pati al sou mòn nan ankò, pou kont Li.
16
E, lè aswè te vin ap rive, disip Li yo desann bò lanmè a;
17
epi, yo bake nan yon kannòt, e, yo travèse lanmè a, pou y al Kapènawòm. Lè sa a, li te deja fè nwa, epi, Jezi pa t vin jwenn yo.
18
Epi, lanmè a te monte, akòz yon gwo van ki t ap soufle.
19
Alò, lè yo te rame ant vennsenk a trant estad konsa, yo wè Jezi ki t ap mache sou lanmè a, e ki t ap vanse sou kannòt la; yo te pè.
20
Men, Li di yo: Se Mwen, pa pè!
21
Lè sa a, yo vin dakò resevwa L nan kannòt la; epi, lamenm tou, kannòt la te koste atè, kote yo ta prale a.
22
Nan demen, lè moun yo ki te kanpe sou lòt bò lanmè a wè ke pa t gen lòt kannòt la, apa de sa ke disip yo te monte ladan l nan; epitou, ke Jezi pa t ale nan kannòt la ak disip Li yo, men, se disip yo ase ki te ale;
23
avredi, te gen lòt kannòt ki te vini sot Tiberyas, yo te tou pre kote moun yo te manje pen an, apre ke Senyè a te rann gras la.
24
Lè moun yo wè ke Jezi pa t la, e disip Li yo nonplis, yo pran bato, epi y al Kapènawòm; yo t ap chèche Jezi.
25
Epi, lè yo vin jwenn Li sou lòt bò lanmè a, yo di L konsa: Rabi, kilè W vin isit la menm?
26
Jezi reponn yo, Li di: Anverite, anverite, Mwen di nou sa, n ap chèche M, se pa paske nou te wè mirak yo non, men pito, paske nou te manje pen yo, e vant nou te plen.
27
Pa travay pou manje k ap peri a; men pou manje k ap dire pou lavi ki p ap janm fini an, ke Pitit Gason Lòm nan va ban nou an; paske, se sou Li ke Bondye Papa a poze so Li.
28
Yo di Li konsa: Kisa nou dwe fè pou nou akonpli travay Bondye yo?
29
Jezi reponn, e, Li di yo: Men sa ki travay Bondye a: Se kwè pou nou kwè nan Sila ke Li voye a.
30
Alò, yo di Li konsa: Ki siy W ap montre nou atò a, pouke nou ka wè, e pou nou ka kwè W? Ki travay Ou fè?
31
Zansèt nou yo te manje lamàn nan dezè a; tankou sa te ekri: Li te ba yo pen ki soti nan syèl pou yo manje.
32
Lè sa a, Jezi di yo konsa: Anverite, anverite, Mwen di nou sa, Moyiz pa t ban nou pen ki soti nan syèl la non; men, Papa M ban nou vre pen ki soti nan syèl la.
33
Paske, pen Bondye a, se Moun ki desann sot nan syèl la; epi, ki bay lemonn lavi a.
34
Alò, yo di L konsa: Senyè, toujou ban n pen sa a non!
35
Jezi di yo: Mwen se pen lavi a, moun ki vini jwenn Mwen an, li p ap janm grangou; e, moun ki kwè nan Mwen an p ap janm swaf.
36
Men, Mwen di nou sa, sèke nou wè Mwen, e nou pa kwè.
37
Tout sa yo ke Papa M ban Mwen yo, yo va vini jwenn Mwen; e, moun ki vini jwenn Mwen an, Mwen p ap janm voye l jete deyò.
38
Paske, Mwen desann sot nan syèl, nonpa pou Mwen fè volonte pa Mwen; men, volonte Sila ki te voye Mwen an.
39
E, men sa ki volonte Papa ki te voye Mwen an: Se pou ke tout sa yo ke Li ban Mwen yo, pou Mwen pa pèdi ankenn nan yo; men, pou Mwen resisite yo nan dènye jou a.
40
E, men sa ki volonte Sila ki voye M nan: Se pou chak moun ki wè Pitit Gason an, epi, ki kwè nan Li, ka gen lavi ki p ap janm fini an; epi, M ap resisite l nan dènye jou a.
41
Lè sa a, Juif yo mimire kont Li, poutèt Li te di: Mwen se pen ki soti nan syèl la.
42
Alèkile, yo di konsa: Èske se pa Jezi, pitit gason Jozèf la; Li menm ke, e papa l, e manman l, nou konnen an? Kouman fè L di: Mwen desann sot nan syèl la?
43
Donk, Jezi reponn, epi, Li di yo: Se pa pou n ap mimire youn bay lòt!
44
Ankenn moun pa ka vin jwenn Mwen sof si Papa a ki te voye Mwen an, rale l vini. Epi, M ap resisite l nan dènye jou a.
45
Sa te ekri nan pwofèt yo: Epi, yo tout va aprann nan men Bondye. Konsa, chak moun ki te tande, e ki te aprann nan men Papa a, li vini jwenn Mwen.
46
Sa pa vle di ke pyès moun janm wè Papa a, eksepte Sila ki soti nan Bondye a; Li te wè Papa a.
47
Anverite, anverite, Mwen di nou sa, moun ki kwè nan Mwen an gen lavi ki p ap janm fini an.
48
Mwen se pen lavi sa a.
49
Zansèt nou yo te manje lamàn nan dezè a; e, yo mouri.
50
Sa a, se pen ki desann sot nan syèl la, pouke yon moun ka manje l, epi l pa mouri.
51
Mwen se pen vivan an ki desann sot nan syèl la; si nenpòt moun manje nan pen sa a, l ap viv pou toutan; e, pen ke M ap ba li a, se chè Mwen, ke M ap bay pou lavi monn lan.
52
Alò, Juif yo t ap diskite antre yo, yo t ap di, kijan pou nonm sa a ta fè ban nou chè L pou nou manje a?
53
Lè sa a, Jezi di yo: Anverite, anverite, Mwen di nou sa, eksepte si nou manje chè Pitit Gason Lòm nan, e ke nou bwè san Li; nou pa gen lavi nan nou.
54
Nenpòt moun ki manje chè M, e ki bwè san M, li gen lavi etènèl; epi, M ap resisite l nan Dènye Jou a.
55
Paske chè M se manje tout bon vre, e san M se bwason tout bon vre.
56
Moun ki manje chè M, e, ki bwè san M, abite nan Mwen, e Mwen, nan li.
57
Tankou Papa a ki vivan, voye Mwen an, e ke Mwen viv gras a Papa a; konsa tou, moun ki manje M nan, Li menm tou, a va viv gras a Mwen .
58
Se sa ki pen ki desann sot nan syèl la; nonpa tankou zansèt nou yo te manje lamàn nan; e apre, yo mouri a; moun ki manje nan pen sa a, l a va viv pou toutan.
59
Se bagay sa yo ke Li te di nan sinagòg la, pandan Li t ap anseye nan Kapenawòm.
60
Alò, plizyè nan disip Li yo, lè yo te tande sa, yo te di: pawòl sa a di; kiyès ki ka tande l?
61
Jezi, nan Li menm, te konnen ke disip Li yo t ap mimire sou sa, Li di yo konsa: Èske sa eskandalize nou?
62
E si nou ta wè Pitit Gason Lòm nan, monte kote Li te ye anvan an, menm?
63
Se Lespri a ki bay lavi; chè a pa vo anyen. Pawòl ke Mwen di nou yo, yo se lespri, e yo se lavi.
64
Men, gen kèk nan nou ki pa kwè. Avredi, Jezi te konnen depi okòmansman kiyès yo te ye ki pa t kwè yo, e kiyès moun ki t a va trayi L la.
65
Epi, Li di: Se poutèt sa Mwen di nou ke pèsonn pa ka vin jwenn Mwen, eksepte si se bay ke Papa M te ba l sa.
66
Depi lè sa a, anpil nan disip Li yo tounen; e, yo pa kontinye mache avè L ankò.
67
Lè sa a, Jezi di Douz yo: Èske nou prale tou?
68
Alò, Simon Pyè reponn Li: Senyè, bò kot kiyès pou nou ta ale? Se Ou ki gen Pawòl lavi etènèl la.
69
Epitou, nou kwè, e nou asire ke W se Kris la, Pitit Gason Bondye Vivan an.
70
Jezi reponn yo: Èske se pa Mwen menm ki te chwazi nou douz la yo? E, youn nan nou se yon dyab.
71
Li t ap pale de Jida Iskaryot, pitit gason Simon an, paske, se li menm ki ta pral trayi Li a; misye te youn nan Douz yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!