Liv Jan
Chapit 8
Klike la pou koute lekti chapit sa1
Jezi te monte al Mòn Oliv.
2
Epi, granmmaten, Li te retounen nan tanp lan; e, tout pèp la te pwoche bò kote L; epi, Li chita, e Li anseye yo.
3
Se konsa pwofesè lalwa yo ak Farizyen yo vin mennen ba Li yon dam ke yo te kenbe nan adiltè; epi, yo mete l nan mitan.
4
Lèfini, yo di Jezi: Mèt, dam sa a, yo te kenbe l nan adiltè, pandan l t ap komèt zak la menm.
5
Kounye a atò, Moyiz te kòmande nou nan lalwa a, ke yo dwe kalonnen yon moun konsa ak kout wòch pou tiye l; men, kisa Ou di nan sa?
6
Avredi, yo te di sa pou yo tante L, dekwa pou yo te ka jwenn yon bagay pou akize L. Men, Jezi kwoupi, epi ak dwèt Li, Li pran ekri atè a, kòmsi L pa t tande yo.
7
Alò, kòm yo te kontinye ap mande L sa, Li leve kanpe, epi Li di yo konsa: Moun ki san peche pami nou la a, kite ke se li anpremye ki voye yon wòch sou dam nan.
8
Lèfini, Li kwoupi ankò, epi Li kontinye ekri atè a.
9
Alò, moun yo ki tande sa a, palefèt ke konsyans yo te repwoche yo, youn apre lòt, yo te ale fè wout yo, kòmanse pa sa ki te pi granmoun nan rive menm sou dènye moun nan. Epi, Jezi te rete pou kont Li, e dam nan te kanpe nan mitan.
10
Lè Jezi leve kanpe, epi Li pa wè pèsonn lòt moun apa de dam nan; Li di l konsa: Madanm, kote moun sa yo ki t ap akize w yo? Pa gen ankenn moun ki kondane w?
11
Dam nan reponn, li di: Ankenn moun non, Senyè! Alò, Jezi di l konsa: Mwen menm nonplis, Mwen pa kondane w. Ale, epi pa peche ankò!
12
Apre sa, Jezi pran pale avèk moun yo ankò, Li di yo konsa: M se limyè lemonn lan; moun sa a k ap suiv Mwen an, li p ap mache nan fènwa; men, li va gen limyè lavi a.
13
Alò, Farizyen yo di Li konsa: W ap temwaye pou pwòp tèt Ou; temwayaj Ou a pa laverite!
14
Jezi reponn, Li di yo konsa: Atout Mwen temwaye pou pwòp tèt Mwen an, men temwayaj Mwen an se laverite; paske Mwen konnen kote M soti, ak kote M prale. Men nou pa fouti di ni kote M soti, ni kote M prale.
15
N ap jije dapre lachè; Mwen menm, M pa jije pèsonn.
16
E, menmsi Mwen ta jije, jijman M nan ap laverite, paske Mwen pa pou kont Mwen, men Mwen ak Papa a ki voye M nan.
17
Dayè, sa ekri tou nan lalwa nou an, ke temwayaj de zòm se laverite.
18
Mwen se yon moun k ap temwaye pou tèt Mwen, epi Papa a ki voye M nan temwaye de Mwen.
19
Lè sa a, yo mande: Kote Papa W? Jezi reponn: Nou pa konn ni Mwen menm, ni Papa M; si nou te konnen M, nou ta va konn Papa Mwen tou.
20
Se bò kote kès kòfrefò a ye a ke Jezi te di Pawòl sa yo, pandan Li t ap preche nan tanp lan; e, pèsonn pa t met lamen sou Li, paske lè L potko rive.
21
Apre sa, Jezi di yo ankò: Mwen pral fè wout Mwen; epi, nou va chèche M; nou va mouri nan peche nou yo; e, kote M prale a, nou p ap ka vin la.
22
Alò, Juif di konsa: Se tiye Li pral tiye tèt Li? Paske Li di: Kote M prale a, nou p ap ka vin la.
23
Lè sa a, Li reponn yo: Nou se moun anba isit, Mwen sot anlè nan syèl; nou se moun monn sa a, Mwen pa moun monn sa a.
24
Kidonk, M ap di nou sa, nou va mouri nan peche nou yo, si nou pa kwè ke se Mwen menm ki Li menm nan; nou va mouri nan peche nou yo.
25
Alò, yo mande L: Kiyès Ou ye? Epi, Jezi reponn yo: Menm moun sa ke M ap di nou depi okòmansman an.
26
Mwen gen anpil bagay pou M di e pou M jije de nou, men Sila ki voye M nan se laverite; e, M ap pale lemonn de bagay sa yo ke Mwen te tande ki sot nan bouch Li.
27
Yo pa t konprann se te de Papa a ke Li t ap pale yo.
28
Ansuit, Jezi di yo konsa: Lè nou fin leve Pitit Gason Lòm nan anlè, lè sa a, nou va konnen ke se Mwen menm ki Li menm nan, e ke Mwen pa fè anyen pou kont Mwen; men, tankou Papa a te aprann Mwen an, se de bagay sa yo ke Mwen pale.
29
E, Sila ki voye M nan, Li avè M; Papa a pa kite M pou kò M, paske Mwen toujou fè bagay sa ki fè L plezi yo.
30
Pandan ke Li t ap di pawòl sa yo, anpil moun te kwè nan Li.
31
Alò, Jezi di Juif ki te kwè nan Li yo: Si nou kontinye nan Pawòl Mwen an, alò n ap disip Mwen tout bonvre;
32
epi nou va konn laverite; e, laverite va fè nou vin lib.
33
Yo reponn Li: Se desandan Abraram nou ye wi, e nou pa t janm nan eskalvaj anba ankenn moun; kòman W fè di: Li va fè nou vin lib la?
34
Jezi reponn yo: Anverite, anverite M ap di nou sa, kelkeswa moun k ap kòmèt peche, se esklav peche l ye.
35
E, esklav la pa rete nan kay la pou toutan; alòske Pitit Gason an rete pou toutan.
36
Si se Pitit Gason an atò ki ta va fè nou vin lib la; n a va lib tout bonvre.
37
Mwen konnen ke se desandan Abraram nou ye; men, n ap chèche tiye M, paske Pawòl Mwen an pa jwenn plas nan nou.
38
M ap pale de sa ke Mwen te wè avèk Papa M; e nou menm, n ap fè sa ke nou te wè avèk papa nou.
39
Yo reponn, e yo di Li: Se Abraram ki papa nou! Jezi di yo konsa: Si se pitit Abraram nou te ye, nou ta va fè travay Abraram yo.
40
Men, n ap chèche tiye M, yon nonm ki di nou laverite ke Mwen tande kote Bondye; sa a, Abraram pa t fè l.
41
N ap fè zèv papa nou! Lè sa a, yo di L konsa: Nou pa t fèt nan fònikasyon non, nou gen yon sèl Papa, se Bondye Li menm.
42
Jezi di yo konsa: Si se Bondye ki te Papa nou, nou t ap renmen Mwen, paske Mwen soti nan Bondye; e, se de Li ke Mwen vini; se pa Mwen ki vin pou kò M non; men, se Li ki voye M.
43
Poukisa nou pa konprann sa M ap di a? Ebyen, se paske nou pa ka tande Pawòl Mwen an.
44
Nou sot nan papa nou, dyab la; e, se move dezi papa nou yo ke nou pral fè. Li te yon asasen depi okòmansman, e li pa kanpe sou laverite, paske, pa gen ankenn verite nan li. Lè l ap bay manti, li pale pou pwòp tèt li, paske l se yon mantè, e se li ki papa manti.
45
Poutan, paske Mwen di nou laverite, nou pa kwè M.
46
Kiyès pami nou ki ka pwouve ke Mwen peche? Alò, si se laverite M ap di, sa k fè nou pa kwè Mwen an?
47
Yon moun ki soti nan Bondye l ap tande pawòl Bondye yo; kidonk nou menm, nou pa tande yo, poutèt se pa nan Bondye nou soti.
48
Kounye a la, Juif yo reponn, yo di L konsa: Èske nou pa t byen fèt di ke W se yon Samariten, e ke W gen yon dyab sou Ou ?
49
Jezi reponn: Mwen pa gen yon dyab sou Mwen non, okontrè, M ap onore Papa M, alòske n ap dezonore Mwen.
50
Lèfini, se pa pwòp glwa pa Mwen ke M ap chèche; gen yon moun k ap chèche l, epi k ap jije.
51
Anverite, anverite, M ap di nou sa, si yon moun kenbe sa M ap di yo, li p ap janm wè lanmò.
52
Alò, Juif yo di Li konsa: Bon, Kounye a, nou konnen ke W gen yon dyab sou Ou. Abraram mouri, e pwofèt yo tou, epi W twouve di: Si yon moun kenbe sa M ap di yo, li p ap janm wè lanmò.
53
Èske W gen plis grandè pase papa nou Abraram ki mouri a? Epi, pwofèt yo mouri; pou kiyès Ou pran tèt Ou la a?
54
Jezi reponn: Si Mwen onore tèt pa M, onè M nan pa anyen; se Papa M ki onore M, Li menm ke n ap di ke Li se Bondye nou an;
55
Alòske nou patko konnen Li, men Mwen menm, Mwen konnen Li; e, si Mwen ta di ke M pa konnen Li, Mwen ta va yon mantè tankou nou; men, Mwen konnen Li, epi Mwen kenbe Pawòl Li.
56
Papa nou Abraram te rejwi pou l te wè jou M nan; e li te wè l, epi l te kontan.
57
Alò, Juif yo di L konsa: Bon, Ou poko menm gen senkant an, epi W te gentan wè Abraram?
58
Jezi di yo konsa: Anverite, anverite, M ap di nou sa: Anvan Abraram te fèt, Mwen se Mwen menm!
59
Lè sa a, yo pran wòch pou yo kalonnen Li, men Jezi kache kò L, epi Li soti deyò tanp lan, Li fofile nan mitan yo, e se te konsa L ale.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!