Liv Jan
Chapit 9
Klike la pou koute lekti chapit sa1
Apre sa, pandan Jezi t ap pase, Li wè yon nonm ki te avèg depi l fèt;
2
epi, disip Li yo mande Li, yo di: Mèt, kiyès ki te peche, nonm sa a, oswa paran li, ki fè ke l fèt tou avèg la?
3
Jezi reponn: Se pa ni nonm sa a ki te peche, ni paran li; men, se pou zèv Bondye yo ka parèt aklè atravè misye.
4
Mwen dwe fè travay Sila ki voye Mwen an pandan li lajounen; lannuit lan ap vini lè pèsonn p ap ka travay.
5
Toutotan ke Mwen nan lemonn, Mwen se limyè monn lan.
6
Lè Li te fin di sa, Li krache atè a; epi Li fè labou ak krache a, lèfini, Li fwote je nonm avèg la ak labou a,
7
epi Li di misye konsa: Ale lave je w nan basen Siloye a (lè w tradui mo sa a, li vle di: moun ke yo voye a). Misye al fè wout li vre, e li lave je l, epi, li te wè nan je l lè li retounen.
8
Alò, vwazen yo ak moun ki te konn wè misye lè l te avèg la, yo di konsa: Se pa nonm sa a ki te konn chita la a ap mande a?
9
Kèk nan yo di: Se misye wi! Gen lòt ki di: Li sanble ak li! Men Li menm, li di: Se mwen menm!
10
Alò, yo di misye konsa: Kòman je w fè louvri?
11
Misye reponn, li di: Yon nonm yo rele Jezi fè labou, epi Li fwote labou a sou je m, apre sa, Li di m: Ale nan basen Siloye a, lave je w. Kidonk, m ale, mwen lave, lèfini, mwen resevwa kapasite pou m wè.
12
Kounye a la, yo di misye: Kote Li? Misye reponn: M pa konnen!
13
Epi, yo pran nonm sa ki te avèg anvan sa a, yo mennen misye kote Farizyen yo.
14
Twouve ke se te jou Saba l te ye lè Jezi te fè labou a, epi Li te louvri je nonm nan.
15
Alò, yon lòt fwa ankò, Farizyen yo mande misye kijan l fè resevwa kapasite pou l wè. Misye di yo konsa: Li fwote labou sou je m yo, apre sa, mwen lave yo, epi mwen wè!
16
Alèkile, kèk nan Farizyen yo di: Nonm sa a pa sot kote Bondye, paske Li pa obsève jou Saba! Gen lòt ki di: Kòman pou yon nonm k ap peche ta ka fè kalite mirak sa yo? Kidonk, te gen yon divizyon pami yo.
17
Yo mande nonm avèg la yon lòt fwa ankò: Kisa w di de Li difèt ke Li louvri je w yo? Misye di: Li se yon pwofèt.
18
Avredi, Juif yo pa t kwè istwa ki te di sou nonm nan, kòmkwa li te yon moun ki te avèg, epi ki te vin ka wè apre sa a, jiskaske yo te rele paran nonm ki te resevwa kapasite pou l wè a.
19
Konsa, yo mande paran yo, yo di: Èske se pitit gason nou an ki te fèt tou avèg la sa? Alò, kijan fè ke l wè kounye a?
20
Paran nonm nan reponn yo, yo di: Nou konnen ke se pitit gason nou an sa, nou konnen ke li te fèt tou avèg;
21
men, pa ki mwayen ke l wè kounye a, nou pa konnen; oubyen, kiyès ki te louvri je l yo, nou pa konnen. Li gen laj; mande l; li va pale pou tèt li.
22
Paran yo te pale konsa paske yo te pè Juif yo, poutèt ke Juif yo te deja pase kondisyon ke nenpòt moun ki ta deklare ke Jezi se Kris la, moun sa a, se pou yo mete l deyò nan sinagòg la.
23
Se sa k fè paran yo te di: Li gen laj, mande l, li a.
24
Alò, yo rele nonm ki te avèg la ankò, epi yo di l konsa: Bay Bondye glwa a non; nou konnen ke nonm sa a se yon pechè Li ye!
25
Misye reponn, li di: Èske Li se yon pechè ou non, mwen pa konnen; yon bagay mwen konnen, sèke mwen te avèg, kounye a, mwen wè!
26
Alèkile, yo mande misye ankò: Kisa Li te fè w? Kòman Li te louvri je w yo?
27
Li reponn yo: Mwen te deja di nou, men nou pa t koute; alò, sa k fè nou vle tande l ankò? Èske nou ta vle vin disip Li tou?
28
Lè sa a, yo joure misye, yo di: Se ou menm ki disip Li; men nou menm, se disip Moyiz nou ye.
29
Nou konnen ke Bondye te pale ak Moyiz; men, kanta nonm sa a, nou pa konn moun ki kote L ye.
30
Mesye a reponn, e li di yo konsa: Bagay sa a gen yon mèvèy nan li palefèt ke nou pa konn moun kibò L ye; alòske, Li louvri je m.
31
Kounye a la a, nou konnen ke Bondye pa koute pechè; men, si nenpòt moun ta va yon moun k ap adore Bondye, epi k ap fè volonte Li, se moun sa a ke Li koute.
32
Depi lemonn egziste yo pa janm tande ke ankenn moun te janm louvri je youn ki te fèt tou avèg.
33
Si Nonm sa a pa t soti kote Bondye, Li pa t ap ka fè anyen.
34
Yo reponn, e yo di misye konsa: Se nan peche nèt ale ke w te fèt, epi se ou k ap anseye nou? Epi, yo met misye deyò.
35
Jezi tande ke yo te mete nonm nan deyò a; e, lè Li vin jwenn misye, Li di l konsa: Èske w kwè nan Pitit Gason Bondye a?
36
Misye reponn, e li di: Kiyès Li ye, Senyè, dekwa pou m ta va kwè nan Li?
37
Epi, Jezi di misye konsa: Ou wè Li, e an menm tan, se Li menm k ap pale avèk ou la a.
38
Alò, nonm nan di: Senyè, mwen kwè. Epi, li adore Jezi.
39
Lè sa a, Jezi di: Se pou jijman ke Mwen vini nan monn sa a, dekwa pou sila ki pa wè yo, ka wè; epi, pou sila ki wè yo, va vin avèg.
40
Alèkile, kèk nan Farizyen ki te avèk Li yo tande pawòl sa yo, epi yo di L konsa: Èske nou avèg tou?
41
Jezi di yo konsa: Si nou te avèg, nou pa ta va gen peche; men kounye a la a, nou di ke nou wè, donk peche nou an rete.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!