Liv Jan
Chapit 10
Klike la pou koute lekti chapit sa1
Anverite, anverite, M ap di nou sa, yon moun ki pa pase nan pòt la pou l antre nan pak mouton an; men, ki grenpe pase yon lòt jan; Li menm, se yon volè ak yon pyajè ke l ye.
2
Men, moun nan ki pase nan pòt la pou l antre, se bèje mouton li ye.
3
Se pou li ke gadyen an ap louvri; e, mouton yo tande vwa l, epi, li rele pwòp mouton pa l yo dapre non yo; lèfini, li kondui yo sot deyò.
4
E, lè li fin mete tout mouton pa l yo deyò, li pran devan yo, epi, mouton yo suiv li, paske yo konn vwa li.
5
Alòske yo p ap suiv yon etranje; okontrè, y ap kouri pou li, paske yo pa konn vwa etranje.
6
Se ak parabòl sa a ke Jezi te pale ak yo, men yo pa t konprann kisa Li t ap di yo la a.
7
Alò, Jezi di yo ankò: Anverite, anverite, M ap di nou sa, Mwen se pòt mouton yo.
8
Tout sa ki te vin anvan Mwen yo, se vòlè ak kriminèl yo ye; men, mouton yo pa t koute yo.
9
Mwen se pòt la, nenpòt moun ki pase pa Mwen menm pou l antre, li va sove, epi li va antre soti, e li va jwenn patiraj.
10
Vòlè a pa vini pou lòt bagay ke pou piye, pou tiye, e pou detwi; Mwen vini dekwa pou yo ka gen lavi, e pou yo ka genyen li ann abondans.
11
Mwen se Bon Bèje a; Bon Bèje a bay lavi L pou mouton yo.
12
Men, yon moun ki se yon anplwaye li ye, e ke se pa bèje a li ye, e ke se pa pwòp mouton pa li ke mouton yo ye, lè l wè lou a ap vini, li kite mouton yo, epi l kouri; apre sa, lou a rape yo, lèfini, li gaye mouton yo.
13
Anplwaye a kouri, paske se yon anplwaye li ye, e ke li pa enterese nan zafè mouton yo.
14
Mwen se Bon Bèje a, e M konnen mouton Mwen yo; epi, sa ki pa M yo konnen Mwen.
15
Tankou Papa M konnen Mwen an, se menm jan an tou ke Mwen konnen Papa a; lèfini, Mwen bay lavi M pou mouton yo.
16
E, Mwen gen lòt mouton ki pa nan pak sa a; yo menm tou, fòk Mwen vin avèk yo; e, yo va tande vwa Mwen; alò, a va gen yon grenn pak, ak yon grenn Bèje.
17
Konsa donk, Papa M renmen M, paske Mwen bay lavi M pou mouton yo, dekwa pou Mwen ka pran l ankò.
18
Pèsonn pa pran l nan men M non, men se Mwen menm pou kò M ki bay li. Mwen gen pouvwa pou M bay li, lèfini, Mwen gen pouvwa pou M pran l ankò. Se kòmandman sa a ke Mwen resevwa nan men Papa Mwen.
19
Alò, te gen divizyon ankò pami Juif yo poutèt pawòl sa yo.
20
E, anpil nan yo t ap di: Li gen yon dyab sou Li, Li fou! Poukisa n ap koute Li?
21
Lòt moun t ap di: Pawòl sa yo, se pa pawòl yon moun ki gen dyab sou li. Èske yon dyab ka louvri je avèg?
22
Lè sa a nan Jerizalèm, se te fèt Dedikas ki t ap fete; se te pandan livè.
23
E, Jezi t ap mache nan lakou tanp lan, sou galeri Salomon an.
24
Epi, Juif yo vin antoure Li, yo di L konsa: Pou jis kilè W ap kenbe nou nan doutans? Si W se Kris la, di nou sa kareman.
25
Jezi reponn yo: Mwen di nou sa, epi nou pa kwè. Travay yo ke M ap fè nan Non Papa M nan, se yo ki temwaye pou Mwen.
26
Tankou M te di nou an, nou pa kwè, paske nou pa pami mouton M yo.
27
Mouton pa M yo tande vwa M; e, Mwen konnen yo; epi, yo suiv Mwen.
28
Lèfini, Mwen ba yo lavi etènèl; epi, yo pa gendwa janm peri; nonplis tou, pèsonn p ap kapab rape yo nan men Mwen.
29
Papa M ki ban Mwen yo a pi gran pase tout moun; e ankenn moun pa ka rape yo nan men Papa M.
30
Mwen menm ak Papa M, nou se youn.
31
Lè sa a, Juif yo te ranmase wòch ankò pou kalonnen Li.
32
Jezi reponn yo: Gen anpil zèv ke Mwen montre nou ki soti kote Papa Mwen; pou kiyès nan zèv sa yo n ap tiye M ak kout wòch la?
33
Juif yo reponn Li, yo di: Se pa pou yon bòn zèv n ap tiye W ak wòch la non, men se pou blasfèm; ak difèt ke Ou menm ki yon nonm ap fè tèt Ou pase pou Bondye.
34
Jezi reponn yo: Èske sa pa ekri nan lalwa nou an: Mwen di, nou se bondye?
35
Si Li rele yo bondye, yo menm ke Pawòl Bondye a te vin jwenn yo a, e kòm, Lekriti a pa kapab defèt;
36
kòman nou fè di de Sila ke Bondye sanntifye epi ke Li voye sou latè a: ‘W ap blasfeme!’, difèt ke Mwen di, Mwen se Pitit Gason Bondye a?
37
Si Mwen p ap fè travay Papa Mwen yo, nou mèt pa kwè nan Mwen;
38
men, si M ap fè yo, menmsi nou pa ta kwè Mwen, kwè travay yo; dekwa pou nou konnen, e pou nou kwè, ke Papa a nan Mwen, e ke Mwen nan Li.
39
Alò, yo chèche pran L ankò, men Li chape anba men yo,
40
epi, Li pati ale lòt bò Jouden an ankò, kote ke Jan te konn ap batize anvan an; e se la Li te rete.
41
Epi, anpil moun te vin jwenn Li, e yo t ap di konsa: Jan pa t fè ankenn mirak; men, tout sa li te di yo sou Nonm sa a se te laverite.
42
Konsa, nan kote sa a, anpil moun te kwè nan Li.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!