Liv Jan
Chapit 11
Klike la pou koute lekti chapit sa1
Kounye a menm, te genyen yon nonm ki te malad, misye te rele Laza, moun Betani, vil kote Mari ak Mat, sè li a, te moun nan.
2
(Se Mari sa a ki te onksyone Senyè a ak pafen an, lèfini, li te siye pye Li ak cheve l la; se frè li Laza, ki te malad la.)
3
Kidonk, sè li yo voye moun kote Jezi, pou di: Senyè, men li, moun Ou renmen an malad!
4
Lè Jezi tande sa, Li di: Maladi sa a pa la pou lanmò non, men se pou glwa Bondye, dekwa pou Pitit Gason Bondye a va glorifye konsa.
5
Vremanvre, Jezi te renmen Mat, e sè li a, e Laza.
6
Kidonk, lè Li te tande ke misye te malad la, Li te rete de jou anplis toujou nan kote ke Li te ye a.
7
Epi, apre sa, Li di disip Li yo: An nou tounen nan Jide ankò.
8
Disip Li yo di L konsa: Mèt, lòt jou la a Juif yo t ap chèche tiye W ak wòch, epi W pral la ankò?
9
Jezi reponn: Èske se pa douz èdtan ki gen nan lajounen an? Si yon moun, se nan lajounen l ap mache, li p ap bite, paske l wè limyè monn sa a.
10
Men, si yon moun, se lannuit l ap mache, l ap bite, paske pa gen ankenn limyè nan li.
11
Se sa L te di, epi apre sa, Li di yo ankò: Zanmi nou Laza ap dòmi, men M prale pou Mwen ka leve l nan dòmi.
12
Alò, disip yo di: Senyè, si se dòmi l ap dòmi, li va refè.
13
Kwake Jezi t ap pale de lanmò misye, men yo menm, yo te panse ke se de pran repo nan dòmi Li t ap pale.
14
Lè sa a, Jezi di yo kareman: Laza mouri.
15
E, poutèt nou menm, Mwen kontan difèt ke M pa t la, defason pou ke nou ka kwè; men antouka, ann ale kote l la non.
16
Lè sa a, Toma, sila ke yo te bay tinon Jimo a, di lòt disip parèy li yo: Ann ale tou non, dekwa pou nou ka mouri avèk li.
17
Men, lè Jezi vin rive, Li jwenn ke yo te mete misye nan tonm nan depi kat jou deja.
18
Kounye a la a, Betani te toupre Jerizalèm, anviwon kenz estad distans konsa.
19
E, anpil nan Juif yo te vin bò kote Mat ak Mari pou konsole yo poutèt frè yo a.
20
Alò, Mat Li menm, yonfwa li te tande ke Jezi t ap vini, l al rankontre L; men, Mari te ret chita la nan kay la.
21
Epi, Mat di Jezi konsa: Senyè, si W te la, frè m nan pa t ap mouri!
22
Men, mwen konnen ke menm kounye a la a, nenpòt sa ke W ta mande Bondye, Bondye ap ba Ou li.
23
Jezi di l konsa: Frè w la va resisite.
24
Mat di Li konsa: Wi, m konnen ke l ap resisite nan rezireksyon dènye jou a.
25
Jezi di l konsa: Mwen se rezireksyon an, e M se lavi a; moun sa ki kwè nan Mwen an, atout li ta mouri, malgre sa, li va viv.
26
E, nenpòt moun k ap viv, epi ki kwè nan Mwen, li p ap janm mouri. Èske w kwè sa?
27
Manzè di Li konsa: Wi Senyè, mwen kwè ke Ou se Kris la, Pitit Gason Bondye a, ki te gen pou vini nan lemonn lan.
28
Epi, lè li fin di sa, l al fè wout li, lèfini, li rele Mari, sè l la, an sekrè, li di l: Mèt la vini wi; men L ap rele w.
29
Menm lè li tande sa a, li kouri leve, epi l al jwenn Li.
30
Alèkile, Jezi patko rive nan bouk la, men, Li te kote Mat te rankontre L la.
31
Alò, Juif yo ki te nan kay la avèk Mari a, e ki t ap konsole l la, lè yo wè Mari kouri leve epi l soti a, yo suiv li; yo t ap di: Li pral bò tonm nan pou l kriye.
32
Epi, lè Mari te vin rive kote Jezi te ye a, e ke l wè Li, li lage kò l atè nan pye L, li di Li konsa: Senyè, si W te la, frè m nan pa t ap mouri!
33
Alò, lè Jezi gade Li wè manzè k ap kriye, e Juif ki te vin avè l yo k ap kriye tou, Li jemi nan lespri L, e Li te twouble.
34
Ansuit, Li di: Ki kote nou mete l? Yo di L konsa: Senyè, vin wè non.
35
Jezi kriye.
36
Lè sa a, Juif yo di konsa: Gade kijan Li te renmen misye!
37
E, gen nan yo ki di: Èske Nonm sa a ki te louvri je avèg la pa t ka fè ansòt pou ke moun sa a pa t mouri tou?
38
Alò, Jezi fremi yon lòt fwa ankò anndan kò Li, pandan ke L vanse bò tonm nan. Se te yon kavo, e te gen yon wòch sou tèt li.
39
Jezi di: Wete wòch la! Mat, sè defen an, di Li konsa: Senyè, Kounye a, li gentan gen sant wi, paske l mouri depi kat jou.
40
Jezi di l konsa: Èske M pa t di w ke depi w ta kwè, ou va wè glwa Bondye ?
41
Alò, yo wete wòch la ki te kote mò a te kouche a. Epi, Jezi leve je L anlè, e Li di: Papa, Mwen remèsye Ou dèske W tande Mwen.
42
E, Mwen te konnen ke W ap toujou tande M; men, se poutèt moun sa yo ki kanpe la a ke M di sa, dekwa pou yo ka kwè ke se Ou ki te voye Mwen.
43
E, lè Li te fin pale konsa, Li rele ak yon vwa byen fò: Laza, vanse soti!
44
Epi, nonm sa k te mouri a vanse soti; e men l, e pye l te mare ak bandaj, epi, figi l te kouvri ak yon mouchwa. Jezi di yo konsa: Demare li, lèfini, kite l ale.
45
Konsa donk, anpil pami Juif ki te vini bò kot Mari yo, ki te wè bagay sa ke Jezi te fè yo, te kwè nan Li.
46
Men, kèk nan yo al fè wout yo, y al kot Farizyen yo; e yo rakonte yo ki kalite bagay ke Jezi te fè yo.
47
Alò, sakrifikatè anchèf yo ak Farizyen yo reyini yon konsèy, epi yo di: Kisa pou n fè? Paske Nonm sa a ap fè yon bann mirak!
48
Kidonk, si nou ta kite L trankil, tout moun ap vin kwè nan Li, lèfini, Women yo va vini pou yo alafwa detwi e plas nou an, e nasyon nou an.
49
E, youn nan yo ki te rele Kayif, se li ki te sakrifikatè souvren nan menm ane sa a, misye di yo konsa: Nou pa konprann anyen menm non!
50
Nonplis tou nou pa reyalize ke l t ap pi nan avantaj nou, pouke yon sèl nonm ta mouri pou pèp la, e ke tout nasyon an pa peri.
51
Avredi, se pa t de li menm ke li te di sa, men, difèt ke se li ki te sakrifikatè souvren nan ane sa a, li te pwofetize ke Jezi te dwe mouri pou nasyon sa a.
52
E, se pa t pou nasyon sa a sèlman, mentou, ke Li ta genyen pou Li pran pitit Bondye yo ki gaye lòt bò yo, rasanble yo ansanm pou vin fè yon sèl.
53
Kidonk, apati de jou sa a, yo te pran desizyon an ansanm pou yo fè L mouri.
54
Alò, Jezi pa t mache anpiblik ankò nan mitan Juif yo; okontrè, Li soti la, L ale nan yon pwovens toupre dezè a, nan yon vil ki te rele Efrayim; e se la ke Li te kontinye rete ak disip Li yo.
55
Alèkile, fèt Pak Juif yo te pre rive, e anpil moun t ap kite pwovens yo pou yo te monte Jerizalèm anvan Pak la, pou yo pirifye tèt yo.
56
Se konsa yo vin ap mande pou Jezi, epi, yo t ap pale ant yo menm pandan yo te kanpe nan lakou tanp lan: Sa nou panse, ou kwè Li p ap vin nan fèt la?
57
Men lè sa a, sakrifikatè anchèf yo ak Farizyen yo te pase yon lòd, sèke, si nenpòt moun ta konnen kote Jezi ye, se pou moun nan montre kote a, dekwa pou yo ka pran Li.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!