Liv Jan
Chapit 13
Klike la pou koute lekti chapit sa1
Kounye a menm, anvan fèt Pak la, difèt ke Jezi te konnen ke lè Li te rive kote ke L dwe pati kite monn sa a e tounen al jwenn Papa a; e difèt ke Li te renmen moun Li yo ki te nan monn lan, Li renmen yo jiska lafen.
2
E kòm soupe a t ap fini, alòske kounye a, dyab la te met nan kè Jida Iskaryòt, pitit gason Simon an, pou li trayi Jezi;
3
Jezi ki te konnen ke Papa a te lage tout bagay nan men Li, e ke Li te soti nan Bondye epi Li ta pral tounen jwenn Bondye,
4
Li leve kanpe kite soupe a; epi, Li wete rad sou Li, lèfini, Li pran yon sèvyèt ke Li mare nan ren L.
5
Apre sa, Li vide dlo nan yon kivèt, epi Li kòmanse lave pye disip Li yo e siye yo ak sèvyèt ke L te mare ren L avèk li a.
6
Alò, Li vin rive sou Simon Pyè; epi, Pyè di Li konsa: Senyè, kòmsi pou W ta lave pye m?
7
Jezi reponn, Li di misye: Sa M ap fè a, ou pa konprann li kounye a la a; men, ou va konprann li apre sa.
8
Pyè di Li konsa: Ou pa gendwa janm lave pye mwen! Jezi reponn: Si Mwen pa lave w, ou p ap gen anyen pou w wè avè M.
9
Simon Pyè di Li konsa: Senyè, se pa pye m sèlman non, men, se men mwen ak tèt mwen tou!
10
Jezi di li: Yon moun ki lave, pa bezwen anyen dot ke lave pye l; men, li pwòp nan tout kò l. Kidonk, nou menm, nou pwòp; men se pa nou tout.
11
Difèt ke Li te konnen kiyès ki ta pral trayi L la, alò, Li te di: Se pa nou tout ki pwòp!
12
Konsa donk, apre ke Li te fin lave pye yo, e ke Li te met rad sou Li, epi ke Li te chita ankò, Li di yo konsa: Èske nou konprann sa M sot fè pou nou an?
13
Nou rele M Mèt, e Senyè; e, nou byen fèt rele M konsa, paske se sa M ye vre.
14
Alò, si Mwen menm ki Mèt e ki Senyè nou an, lave pye nou, nou menm tou, nou youn dwe lave pye lòt.
15
Paske se yon egzanp Mwen ban nou, dekwa pou nou fè menm jan ke M te fè pou nou an.
16
Anverite, anverite, M ap di nou sa: Sèvitè a pa gen plis grandè pase Senyè li; nonplis tou, Moun yo voye a pa gen plis grandè pase Sila ki voye l la .
17
Si nou konnen bagay sa yo, se moun ki byenere nou va ye, depi ke nou fè yo.
18
Mwen p ap pale de nou tout; Mwen konnen moun ke M chwazi yo; men, se pou Lekriti a kapab akonpli: Moun k ap manje pen avèk Mwen an leve talon l kont Mwen!
19
Kounye a la a, M ap di nou sa anvan l rive, dekwa pou lè l vin rive, nou va kwè ke se Mwen ki Mwen menm nan.
20
Anverite, anverite, M ap di nou sa: Moun ki resevwa kèlkeswa moun Mwen voye, se Mwen ke l resevwa; e, moun ki resevwa Mwen an, se Sila ki voye Mwen an ke li resevwa.
21
Lè Jezi te fin pale konsa, Li te twouble nan Lespri Li, epi Li bay temwayaj, Li di: Anverite, anverite, M ap di nou ke youn nan nou va trayi Mwen.
22
Lè sa a, disip yo, youn pran gade lòt, yo pa t si de kiyès Li t ap pale.
23
Alò, te gen youn nan disip yo ki te piye sou lestomak Jezi, Li menm ke Jezi te renmen an,
24
Simon Pyè, atò, fè misye siy, kòmkwa pou l ta mande kiyès moun sa a ye ke L ap pale de li a.
25
Moun ki te piye sou lestomak Jezi a di Li konsa: Senyè, kiyès sa a?
26
Jezi reponn: Se moun sa ke Mwen va bay yon moso pen, apre ke M fin tranpe l la. Lèfini, Li tranpe moso pen an, epi Li lonje l bay Jida Iskaryòt, pitit gason Simon an.
27
E, apre moso pen an, Satan antre nan misye. Alèkile, Jezi di li konsa: Sa w gen pou w fè a, fè l vit!
28
Avredi, pèsonn sou tab la pa t konnen pou ki rezon Li te di misye sa.
29
Paske, gen ladan yo ki te panse, palefèt ke se Jida ki te kenbe kès la, ke Jezi te di misye: Achte bagay sa n ap bezwen pou fèt la; oubyen, pou misye ta va bay pòv yo yon kichòy.
30
Alò, misye li menm, yon fwa ke li te fin resevwa moso pen an, li soti lamenm; e, se lannuit li te ye.
31
Kidonk, lè misye fin sot deyò, Jezi di: Kounye a Pitit Gason Lòm nan glorifye, e, Bondye jwenn glwa nan Li.
32
Si Bondye jwenn glwa nan Li, Bondye va glorifye L nan Li menm tou, e, Li va glorifye L tousuit.
33
Timoun, se pou yon ti moman ke M la a avèk nou. Nou va chèche M, e tankou Mwen te di Juif yo li a: Kote M prale a, nou pa ka vini; alò, kounye a, se nou M ap di sa.
34
Men yon nouvo kòmandman M ap ban nou: Se pou nou youn renmen lòt; menm jan ke Mwen te renmen nou an, se konsa nou youn dwe renmen lòt.
35
Se sa ki va fè tout moun konnen ke se disip Mwen nou ye: si nou gen lanmou youn pou lòt.
36
Simon Pyè di Li konsa: Senyè ki kote W prale a? Jezi reponn li: Kote M prale a, ou pa ka suiv Mwen la kounye a, men w a va suiv Mwen apre.
37
Pyè di Li konsa: Senyè, sa k fè mwen pa ka suiv Ou kounye a? M ap bay lavi m poutèt Ou!
38
Jezi reponn li: Poutèt Mwen w ap bay lavi w la? Anverite, anverite, M ap di w sa: Kòk p ap ko chante e w ap gentan nye M twa fwa.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!