Liv Jan
Chapit 15
Klike la pou koute lekti chapit sa1
Mwen se vre pye rezen an, epi, Papa M se kiltivatè a.
2
Chak branch nan Mwen ki pa donnen fwi, Li koupe l jete; alòske, chak branch ki donnen fwi, Li netwaye li, dekwa pou li ka donnen plis fwi.
3
Kounye a la a, nou pwòp atravè Pawòl la ke Mwen te deklare nou an.
4
Rete nan Mwen, e Mwen va rete nan nou. Menm jan branch lan pa ka donnen fwi pou kont li, sof si li rete nan pye rezen an; nou pa ka fè plis pase sa, sofsi nou rete nan Mwen.
5
Mwen se pye rezen an, nou se branch yo. Moun ki rete nan Mwen an, epi ke Mwen rete nan li a, se Li menm k ap donnen bon jan fwi; paske, san Mwen, pa gen anyen nou ka fè.
6
Si yon moun pa rete nan Mwen, yo koupe l tankou yon branch; lèfini, li seche; apre sa, moun sanble yo, epi voye yo nan dife, e yo boule yo.
7
Si nou rete nan Mwen, epi Pawòl Mwen yo rete nan nou, nou va mande sa nou vle, epi sa va fèt pou nou.
8
Se nan sa ke Papa M jwenn glwa, se lè nou donnen bon jan fwi, se konsa ke nou va disip Mwen.
9
Menm jan Papa M te renmen Mwen an, se konsa tou ke M te renmen nou; se pou nou kontinye rete nan lanmou Mwen an.
10
Si nou kenbe kòmandman Mwen yo, nou va rete nan lanmou Mwen an, menm jan ke Mwen kenbe kòmandman Papa M yo, e ke M rete nan lanmou Li an.
11
Bagay sa yo, Mwen te di nou yo dekwa pou ke lajwa Mwen an ka rete nan nou, lèfini, pou ke lajwa nou an ka okonplè.
12
Men sa ki kòmandman Mwen an: Se pou nou youn renmen lòt, menm jan ke Mwen te renmen nou an.
13
Pèsonn pa gen pi gran lanmou pase sa a: pou yon moun bay lavi li pou zanmi l.
14
Nou se zanmi Mwen, si nou fè tout sa ke M kòmande nou yo.
15
Apati de kounye a, se pa sèvitè ke Mwen rele nou non, paske, sèvitè a pa konn sa mèt li ap fè; men, Mwen rele nou zanmi, paske, tout sa ke Mwen te tande yo bò kote Papa M nan, Mwen fè nou konnen yo.
16
Se pa nou menm ki te chwazi M; men, se Mwen ki te chwazi nou, ansuit ki te tabli nou pou fè ke nou ale epi donnen fwi; e fè ke fwi nou yo rete. Konsa, nenpòt sa nou va mande Papa a nan non Mwen, Li kapab ban nou li.
17
Bagay sa yo, Mwen kòmande nou yo pou ke nou youn renmen lòt.
18
Si lemonn rayi nou, nou konnen ke l te rayi M anvan ke l te rayi nou an.
19
Si se moun lemonn nou te ye, lemonn t ap renmen pwòp moun pa li; men, difèt ke nou pa moun lemonn lan, e ke Mwen te chwazi nou soti deyò lemonn lan, alò lemonn rayi nou.
20
Sonje pawòl sa Mwen te di nou an: Yon sèvitè pa ka gen plis grandè pase mèt li. Si yo te pèsekite M, se konsa y ap pèsekite nou tou; si yo te kenbe pawòl Mwen yo, y ap kenbe pa nou yo tou.
21
Men, tout bagay sa yo ke y ap fè nou yo, se poutèt non Mwen y ap fè yo; paske yo pa konnen Sila ki voye M nan.
22
Si Mwen pa t vini pou M pale avèk yo, yo pa t ap gen peche; men kounye a, yo pa gen eskiz pou peche yo.
23
Yon moun ki rayi M, li rayi Papa M tou.
24
Si Mwen pa t fè de kalite zèv ke pèsonn moun pa t janm fè nan mitan yo, yo pa t ap gen peche; men kounye a, an menm tan yo e wè, e rayi nou toulè de, e Papa M e Mwen menm.
25
Men, sa te rive pouke pawòl la te ka akonpli, pawòl sa ki di nan lalwa a: Yo te rayi Mwen san rezon.
26
Men, lè Konsolatè a va vini an, Li menm ke M ap voye ban nou an ki soti kote Papa a, Li menm nan ki se Lespri Verite a, ki soti nan Papa a, Li va temwaye de Mwen.
27
E, nou menm tou, nou va bay temwayaj, paske nou te avèk Mwen depi okòmansman.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!