Liv Jan
Chapit 16
Klike la pou koute lekti chapit sa1
Bagay sa yo, Mwen di nou yo, pou ke nou pa ta chite.
2
Yo va gen pou mete nou deyò nan sinagòg; wi, gen yon lè k ap vini, kote nenpòt moun ki tiye nou ap panse ke se Bondye l ap rann sèvis.
3
E, bagay sa yo, y ap fè nou yo, paske yo pa konnen Papa a, ni Mwen menm.
4
Men, Mwen di nou bagay sa yo, pou lè tan an va rive, nou ka sonje ke M te pale nou de yo. E, Mwen pa t di nou bagay sa yo okòmansman, paske Mwen te avèk nou.
5
Twouve ke kounye a, Mwen pral fè wout Mwen al jwenn Sila ki te voye M nan; e, okenn nan nou pa mande M: Ki bò W prale?
6
Men, poutèt Mwen te di nou bagay sa yo, lapenn anvayi kè nou.
7
Poutan, se laverite M ap ba nou; li nan avantaj nou pou ke M ale a. Si M pa ale, Konsolatè a p ap vin jwenn nou; men, si Mwen pati, M ap voye L pou nou.
8
E, lè Li vini an, L ap akize lemonn pou peche, pou dwati, ak pou jijman.
9
Pou peche, paske yo pa kwè nan Mwen;
10
pou dwati, paske Mwen pral jwenn Papa M, epi nou p ap wè M ankò;
11
pou jijman, paske prens monn sa a deja jije.
12
Mwen gen anpil bagay toujou pou M di nou, men, nou pa ka pote chay sa yo kounye a.
13
Men, lè Li menm, Lespri verite a, vini an, L ap gide nou nan tout verite; paske, Li p ap vin pale de tèt pa Li, men, nenpòt sa ke L va tande, se sa ke L va deklare; epi, L ap montre nou bagay ki gen pou rive.
14
Li va ban Mwen glwa, paske Li va resevwa nan sa ki pou Mwen, epi, Li va montre nou l.
15
Tousa ke Papa a posede, se pou Mwen yo ye; alò, se sa k fè Mwen di ke Li va pran nan sa ki pou Mwen, epi L ap montre nou li.
16
Nan yon ti moman, nou p ap wè M; epi ankò, nan yon ti moman, n ap wè M, paske M al jwenn Papa a.
17
Alò, kèk nan disip yo t ap di ant yo menm: Kisa L di nou la a: Nan yon ti moman, nou p ap wè M, epi ankò, nan yon ti moman, n ap wè M, paske M al jwenn Papa a?
18
Alèkile, yo di: Kisa sa vle di lè Li di 'Yon ti moman an'? Nou pa ka konprann sa L di a!
19
Kounye a la a, Jezi te konnen ke yo te anvi poze L kesyon; donk, Li di yo konsa:
20
Anverite, anverite, M ap di nou ke nou va ap kriye e rele anmwe; alòske lemonn va ap rejwi; epi, nou va tris, men tristès nou an va vin tounen lajwa.
21
Yon fanm, lè l gen tranche, li gen tristès, paske lè li a rive; men, yon fwa ke l fin akouche timoun nan, li pa sonje soufrans lan ankò, poutèt lajwa l genyen dèske yon moun fèt nan monn lan.
22
Alò, twouve ke kounye a la a, nou nan tristès, men M ap wè avè nou ankò; e, kè nou va kontan, e lajwa nou an, pèsonn p ap ka wete l lakay nou.
23
E nan jou sa a, nou p ap gen anyen pou nou mande M. Anverite, anverite, M ap di nou sa, kèlkeswa sa l ye a ke nou ta va mande Papa a nan non Mwen, L ap ban nou li.
24
Jiska prezan, nou pa t mande anyen nan non Mwen; mande, epi nou va resevwa, dekwa pou lajwa nou an ka okonplè.
25
Bagay sa yo, Mwen te di nou yo an pwovèb, men lè a vin rive kote ke se pa an pwovèb Mwen va pale ak nou ankò, men, Mwen va pale nou de Papa a aklè.
26
Nan jou sa a, nou va mande nan non Mwen, e, Mwen p ap di nou ke se Mwen menm ki pral lapriyè Papa a pou nou non;
27
paske, Papa a Li menm, Li renmen nou, difèt ke nou te renmen Mwen an, e ke nou te kwè ke M te soti nan Bondye.
28
Se nan Papa a ke M te soti, lèfini, Mwen te vin nan lemonn; epi ankò, M ap kite lemonn, lèfini, Mwen pral jwenn Papa a.
29
Disip Li yo di L konsa: Gade! Kounye a, men W ap pale aklè, e W pale san ankenn pwovèb.
30
Kounye a, nou gen asirans ke Ou konn tout bagay, e ke Ou pa bezwen pou pèsonn ta va kesyone W; se sa ki fè nou kwè ke se nan Bondye ke W te soti.
31
Jezi reponn yo: Èske Kounye a nou kwè?
32
Men li! Moman an a ap rive; wi, li deja rive, lè ke nou va gaye, chak moun pou kont li; epi nou va kite M pou kò M; Men, Mwen pa pou kò M, paske Papa a avè M.
33
Bagay sa yo, Mwen te di nou yo dekwa pou ke nan Mwen menm nou ka gen lapè. Nan lemonn, nou va gen tribilasyon; men, nou mèt pran kouraj; paske, Mwen gen laviktwa sou lemonn!
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!