Liv Jan
Chapit 17
Klike la pou koute lekti chapit sa1
Se pawòl sa yo ke Jezi te di; lèfini, Li leve je L anlè nan syèl la, epi Li di: Papa, lè a rive; glorifye Pitit Gason W lan, konsa, Pitit gason w lan va kapab glorifye Ou tou.
2
Tankou Ou te ba L pouvwa sou tout chè a, pou ke Li te bay lavi etènèl a tout moun ke W te ba Li yo.
3
E, men kisa k lavi etènèl la: Se pou yo kapab konnen Ou menm, sèl vre Bondye a, ak Jezi Kris, Li menm ke Ou te voye a.
4
Mwen te glorifye Ou sou latè; Mwen fini ak travay ke W te ban M fè a.
5
Alèkile, O Papa, glorifye Mwen non nan prezans Ou, avèk glwa sa a ke M te genyen avè W la, anvan lemonn te egziste a.
6
Mwen te fè non W parèt aklè devan je moun ke Ou te ban Mwen yo pami lemonn lan. Se pa W yo te ye, lèfini, Ou te ban Mwen yo, e yo te kenbe Pawòl Ou a.
7
Kounye a, yo konnen ke tout bagay, kèlkeswa sa l te ye ke Ou te ban Mwen an, yo soti nan Ou;
8
paske, Mwen te pase pawòl yo ke Ou te ban Mwen an ba yo; e, yo te resevwa yo; epi, yo te rekonèt tout bon vre ke Mwen te soti nan Ou, e yo te kwè ke se Ou ki te voye M.
9
M ap lapriyè pou yo, Mwen p ap lapriyè pou lemonn; men, se pou sila yo ke W te ban Mwen yo, paske, se pou Ou yo ye;
10
e, tout sa ki pa M, se pa W; epi, sa ki pa W, se pa M; e, Mwen jwenn glwa nan yo.
11
Kounye a la menm, Mwen pa nan monn lan ankò, men yo menm, yo nan monn lan; alòske Mwen menm, M ap vin jwenn Ou. Papa ki sen an, atravè pwòp non pa W, kenbe moun sa ke W te ban Mwen yo non; pouke yo ka fè youn, jan ke Nou ye a.
12
Pandan ke Mwen te la avèk yo a nan monn lan, Mwen te kenbe yo nan Non W. Sila yo ke W te ban Mwen yo, Mwen te kenbe yo, e okenn nan yo pa pèdi, sof pitit gason pèdisyon an, dekwa pou Lekriti a te ka akonpli.
13
E Kounye a, M ap vin jwenn Ou; e, Mwen pale bagay sa yo nan lemonn dekwa pou yo ka gen lajwa pa M nan ki vin okonplè nan yo menm.
14
Mwen te ba yo Pawòl Ou a, epi lemonn te rayi yo, poutèt yo pa moun lemonn, tankou ke M pa moun lemonn lan.
15
Mwen p ap lapriyè pou ke W ta wete yo nan lemonn non; men, pou ke W ta prezève yo anba Mechan an.
16
Yo pa moun lemonn menm jan ke M pa moun lemonn lan.
17
Sanktifye yo atravè verite W la, Pawòl Ou a se verite.
18
Menm jan W te voye M nan lemonn lan, se konsa tou Mwen te voye yo nan lemonn.
19
E se poutèt yo menm ke Mwen sanktifye tèt Mwen, dekwa pou yo menm tou y a sanktifye atravè verite a.
20
E, nonplis tou, se pa pou sila yo sèl ke M ap lapriyè a non; men, se pou moun yo ki va kwè nan Mwen atravè mesaj yo a.
21
Konsa, yo va youn, jan ke Ou menm Papa, Ou ye nan Mwen an, e ke Mwen ye nan Ou a; pou ke yo menm tou, yo ka yon sèl nan Nou, dekwa pou lemonn ka kwè ke se Ou menm ki te voye M.
22
Epi, laglwa ke W te ban Mwen an, Mwen te ba yo li, dekwa pou yo ka youn, tankou ke Nou se youn nan.
23
Mwen menm nan yo menm, e Ou menm nan Mwen menm, pouke yo ka rive alapèfeksyon antan ke youn, epi, pou ke lemonn ka konnen ke W te voye Mwen, e ke Ou renmen yo menm jan ke W renmen M nan.
24
Papa, Mwen vle ke yo menm tou, sila ke Ou ban Mwen yo, pou yo avè M kote Mwen ye, dekwa pou yo ka wè glwa Mwen an ke Ou te ban M nan; paske Ou te renmen M depi anvan kreyasyon monn lan.
25
O, Papa ki jis nan, lemonn pa t konnen W, men Mwen te konnen W; e, sila yo te konnen ke se Ou ki te voye M.
26
Konsa, Mwen te devwale Non W ba yo, e, M ap devwale l, pouke lanmou ke W te renmen M avèk li a kapab nan yo; epi, pouke Mwen kapab nan yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!