Liv Jan
Chapit 18
Klike la pou koute lekti chapit sa1
Kou Jezi fin di pawòl sa yo, Li vanse ale ak disip Li yo lòt bò Ravin Sedwon an, kote k te gen yon jaden; Li antre ladan l ak disip Li yo.
2
Jida Li menm tou, sila ki te trayi Li a, te konn kote a, paske Jezi te vin la plizyè fwa ak disip Li yo.
3
Alèkile, Jida, ki te resevwa yon lame gason ak ofisye nan men sakrifikatè an chef yo ak Farizyen yo, misye vin la ak lanp, tòch, e ak zam.
4
Konsa donk, Jezi ki te konnen tousa ki te dwe rive kont Li yo; Li vanse, epi Li di yo konsa: Kiyès n ap chèche?
5
Yo reponn Li: Jezi, moun Nazarèt! Jezi di yo: Se Mwen menm! E, Jida, ki te trayi Li a, te kanpe avèk yo.
6
Alò, lamenm Jezi te fin di yo: 'Se Mwen menm' nan, yo te pati pa bak epi yo tonbe atè a.
7
Lè sa a, Li mande yo ankò: Kiyès n ap chèche? Epi, yo di: Jezi, moun Nazarèt!
8
Jezi reponn: Mwen deja di nou se Mwen menm. Alò, si se Mwen n ap chèche a, kite sa yo al fè wout yo.
9
Se te pou pawòl ke Li te deklare a te ka akonpli, Li te di: Pami sila ke Ou te ban Mwen yo, Mwen pa pèdi okenn nan yo.
10
Lè sa a, Simon Pyè, ki te gen yon epe, li rale l, epi li frape sèvitè sakrifikatè souvren; e, li koupe zòrèy dwat misye. Non sèvitè a se te Malkis.
11
Alèkile, Jezi di Pyè konsa: Met epe w la anndan fouwo l! Gode sa a ke Papa M ban Mwen an, kòmsi, pou M pa ta bwè l?
12
Lè sa a, lame gason an ak kapitèn lan, ansanm ak ofisye Juif yo arete Jezi, epi yo mare Li.
13
Lèfini, yo mennen L ale kote Àn anpremye, kòm misye se te bòpè Kayif, ki li menm, te sakrifikatè souvren nan menm ane sa a.
14
Se Kayif sa a wi, ki te bay Juif yo konsèy, ke sa te nan avantaj yo pouke se yon nonm ki pou ta dwe mouri nan plas pèp la.
15
Epi, Simon Pyè te suiv Jezi, e yon lòt disip te fè sa tou. Disip sa a te yon moun ke sakrifikatè souvren an te rekonèt; se konsa l te rantre ak Jezi anndan lakou sakrifikatè souvren an.
16
Men, Pyè te rete nan baryè a, pa deyò. Epi, lòt disip la ke sakrifikatè souvren an te rekonèt lan, al pale ak fi ki t ap veye baryè a; e li fè Pyè rantre.
17
Alò, madmwazèl ki t ap veye baryè a di Pyè konsa: Èske w pa youn nan disip nonm sa a tou? Misye reponn: Non, se pa mwen!
18
Lè sa a, sèvitè yo ak ofisye yo te kanpe la, yo te limen yon boukan dife chabon, paske te fè frèt, kifè, yo t ap chofe kò yo; e, Pyè te kanpe la avè yo, li t ap chofe kò li.
19
Alò, sakrifikatè souvren an poze Jezi kesyon sou disip Li yo ak sou ansèyman L nan.
20
Jezi reponn li: Mwen te pale kareman bay lemonn, M te toujou ap anseye nan sinagòg la ak nan tanp lan, kote Juif yo konn rasanble yo, e, Mwen pa janm di anyen an sekrè.
21
Poukisa se Mwen w ap mande a? Mande moun ki te tande M yo kisa ke Mwen te di yo; gade non, yo konnen kisa M te di!
22
E, lamenm ke Li te fin pale konsa, youn nan ofisye ki te kanpe kote L yo frape Jezi ak pla men li, li di: Èske se konsa pou W reponn sakrifikatè souvren an?
23
Jezi reponn li: Si Mwen di sa ki mal, temwaye sa ki mal la; men, si se sa ki byen, poukisa w frape M nan?
24
Alèkile, Àn voye L ale tou mare bay Kayif, sakrifikatè souvren an.
25
Pandanstan, Simon Pyè te kanpe ap chofe kò li. Alò, moun yo di misye konsa: Èske w pa youn nan disip Li yo tou? Misye nye sa; li di: Non, se pa mwen!
26
Youn nan sèvitè sakrifikatè souvren an, ki te fanmi ak nonm sa ke Pyè te koupe zòrèy li a, di konsa: Èske m pa t wè w nan jaden an avèk Li?
27
Alò, Pyè nye sa ankò. Epi, lamenm, kòk la chante.
28
Lèfini, yo mennen Jezi ale soti kot Kayif la pou antre nan sal jijman gouvènè a; se te bonè nan maten; e, yo menm, yo pa t antre nan sal jijman an pou sa pa t rive ke yo ta sal tèt yo, ansòt ke yo te ka manje manje Pak la.
29
Alò, Pilat soti al jwenn yo, epi l di: Ki akizasyon nou pote kont nonm sa a?
30
Yo reponn, e yo di l konsa: Si Li pa t yon malfektè, nou pa t ap livre L ba ou!
31
Alèkile, Pilat di yo konsa: Se pou nou pran Li epi jije L dapre lalwa nou an! Lè sa a, Juif yo di l konsa: Li pa legal pou nou kondane yon moun amò.
32
Se te pou pawòl Jezi a te ka akonpli, lè Li te pale de ki kalite lanmò Li te dwe mouri a.
33
Alò, Pilat antre nan sal jijman an ankò, epi misye rele Jezi, e li di Li: Èske Ou se Wa Juif yo?
34
Jezi reponn li: Èske se de pwòp tèt pa w ke w ap di sa, oswa se lòt moun ki di w sa de Mwen?
35
Pilat reponn: Èske m se yon Juif? Se pwòp nasyon W lan, ak sakrifikatè anchèf yo ki livre W ban mwen! Bon, kisa W te fè?
36
Jezi reponn: Wayòm pa M nan pa nan monn sa a; si wayòm Mwen an te nan monn sa a, alò, sèvitè Mwen yo ta va goumen dekwa pou Mwen pa t livre bay Juif yo. Men, kounye a la a, wayòm pa M nan se pa isit ke l ye.
37
Alò, Pilat di Li: Donk, se yon Wa W ye? Jezi reponn: Ou di ke M se yon Wa. Se pou rezon sa a ke M te fèt, e se poutèt sa ke Mwen te vini nan lemonn, pou Mwen bay temwayaj de verite a. Tout moun ki soti nan verite a tande vwa Mwen.
38
Pilat di Li konsa: Kisa ki verite a? Epi, lè l fin di sa a, li vire soti ankò, l al kot Juif yo, e li di yo konsa: Mwen pa jwenn ankenn krim ditou non nan Li.
39
Men, nou gen yon koutim ki fè ke m dwe lage yon prizonye ban nou pou Pak la; èske nou ta vle m lage Wa Juif la ban nou?
40
Lè sa a, yo tout rele ankò, yo di: Se pa nonm sa a, men Barabas pito! Alòske, Barabas se yon kriminèl li te ye.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!