Liv Jan
Chapit 19
Klike la pou koute lekti chapit sa1
Lè sa a atò, Pilat pran Jezi, epi l fè bat Li.
2
Lèfini, sòlda yo te trese pikan fè yon kouwòn, epi, yo mete nan tèt Li; ansuit, yo met yon manto wouj vyolèt sou Li.
3
Epi yo t ap di: Sali, Wa Juif yo! E, yo te souflete Li ak men yo.
4
Alò, Pilat sot deyò a ankò, epi l di yo konsa: Gade non! Men m mennen L vini ban nou, dekwa pou nou konnen ke m pa jwenn ankenn fot nan Li.
5
Lè sa a, Jezi te vin parèt, Li te gen kouwòn pikan an ak manto wouj vyolèt la sou Li. Epi, Pilat di yo konsa: Men nonm nan wi!
6
Alò, lè sakrifikatè anchèf yo ak ofisye yo wè Li, yo pran rele byen fò, yo di: Krisifye Li! Krisifye Li! Pilat di yo konsa: Pran Li nou menm, lèfini krisifye Li; paske mwen menm, m pa jwenn ankenn fot nan Li.
7
Juif yo reponn li: Nou gen yon lwa; e, dapre lalwa nou an fòk Li mouri, akòz Li fè tèt Li pase pou Pitit Gason Bondye.
8
Lè Pilat tande pawòl sa a atò, misye te vin pi kraponnen toujou.
9
Konsa, li retounen nan sal jijman an ankò, e li di Jezi konsa: Kibò W soti? Men, Jezi pa ba l ankenn repons.
10
Alò, Pilat di Li konsa: Se avèk mwen ke W p ap pale a? Ou pa konnen ke m gen pouvwa pou m krisifye W, e ke m gen pouvwa pou m lage W?
11
Jezi reponn: Ou pa t ap ka gen ankenn pouvwa ditou kont Mwen, si se pa t sèlman de anwo ke w te jwenn li; kidonk, sila a ki livre Mwen ba ou a komèt yon peche ki pi grav.
12
E, depi lè sa a, Pilat t ap chèche lage Li; Men, Juif yo rele fò, yo di: Si w kite nonm sa a ale, ou pa zanmi Seza! Nenpòt moun ki fè tèt li pase pou yon wa, se kont Seza l ap pale.
13
Alèkile, lè Pilat tande pawòl sa a, li mennen Jezi deyò a, epi l chita sou chèz jijman an nan yon kote ki rele Glasi a; men ann Ebre, se Gabata.
14
E, se te lè preparasyon pou Pak la, bò sizyèm è a konsa, epi li di Juif yo konsa: Gade non, men Wa nou an!
15
Men, yo rele fò: Wete L la a! Wete L la a! Krisifye Li! Pilat di yo konsa: Èske m ta va krisifye Wa nou an? Sakrifikatè anchèf yo reponn: Nou pa gen lòt wa apa de Seza!
16
Lè sa a, misye livre Li ba yo pou Li krisifye. Epi, yo pran Jezi, yo ale avè L.
17
E, Li menm, Li te pote kwa L mache ale yon kote ki rele Plas-Tèt-Mò a, ki te rele ann Ebre, Gòlgota.
18
Se la ke yo krisifye Li, ak de lòt moun ansanm ak Li; youn sou chak bò, epi Jezi nan mitan.
19
Epi, Pilat te ekri yon pankat; lèfini, li te plase l sou kwa a; e, men sa k te ekri a: JEZI, MOUN NAZARÈT, WA JUIF YO.
20
Pankat sa a, te gen anpil Juif ki te li l, paske kote Jezi te krisifye a te pre vil la, lèfini, li te ekri ann Ebre, an Grèk, ak an Laten.
21
Alèkile, sakrifikatè anchèf yo di Pilat: Non, pa ekri 'Wa Juif yo'; men ke ‘Li di ke L se Wa Juif yo’.
22
Pilat reponn: Sa m ekri a, m ekri l nèt!
23
Alò, sòlda yo menm, lè yo fin krisifye Jezi, yo pran rad Li yo, e yo fè kat pil ak yo, yon pil pou chak sòlda; epi, yo pran palto long Li a tou. Men, palto long nan te san kouti, li te trikote depi anwo toutantye.
24
Alò, yo pale ant yo, yo di: Ann pa chire l, men vi nou piye zo pou li, pou kiyès l a va ye. Se te pou Lekriti a te ka akonpli, sa ki te di: Yo separe rad Mwen yo ant yo menm; epi, yo piye zo pou palto long Mwen an. Kidonk, se bagay sa yo sòlda yo te fè a.
25
Kounye a la a menm, te gen manman Jezi ki te kanpe bò kwa a, ak sè manman L nan; ak Mari, madanm Kleyofas la; epi, ak Mari moun Magdala a.
26
Alò, lè Jezi gade L wè manman L ak disip la kanpe la, sila ke Li te renmen an, Li di manman L konsa: Madanm, gade non, Men pitit gason w!
27
Lèfini, Li di disip la: Gade non, men manman w! Epi, depi lè sa a, disip sa a te pran manman an vin rete lakay pa l.
28
Apre sa, Jezi ki te konnen ke kounye a, tout bagay te fin akonpli, pou ke Lekriti a te akonpli, Li di: Mwen swaf!
29
Alèkile, te gen yon veso ki te plen vinèg; alò, yo tranpe yon eponj nan vinèg la, yo ranje l sou yon gòl izòp, lèfini, yo lonje l mete nan bouch Li.
30
Alò, lè Jezi fin pran vinèg la, Li di: Se fini! Epi, Li bese tèt Li, Li remèt Lespri L.
31
Lè sa a, Juif yo menm, kòm se te jou preparasyon an ke l te ye, dekwa pou kò yo pa ta rete sou kwa a pandan jou Saba a, (avredi, jou Saba sa a te yon kokenn jou), yo mande Pilat pou pèmèt ke yo fè kase janm moun nan yo, epi pou yo desann kò yo pot ale.
32
Epi alò, sòlda yo vini, yo kase janm premye a; ansuit, janm dezyèm nan ki te krisifye avèk Li a;
33
men, lè yo rive sou Jezi, yo wè ke Li te deja mouri, yo pa kase janm Li.
34
Men, youn nan sòlda yo pèse bò kòt Li ak yon lans; epi, lamenm, san ak dlo koule soti.
35
E, se moun ki te wè sa a k ap temwaye; e, temwayaj li a se laverite; li konnen l ap bay laverite, dekwa pou nou menm nou ka kwè.
36
Paske, bagay sa yo te fèt, dekwa pou Lekriti a te ka akonpli: Yon zo nan kò L p ap kase.
37
Lèfini ankò, yon lòt ekriti te di: Yo va leve je gade Sila ke yo te pèse a.
38
Epi apre sa, Jozèf, moun Arimate, ki te yon disip Jezi, men, an kachèt, poutèt laperèz pou Juif yo, misye te mande Pilat otorizasyon pou li te pran kò Jezi; e, Pilat te ba l dwa fè sa. Alò, li vini, e li pran kò Jezi.
39
Epitou, te gen Nikodèm ki te vini, se Li menm nan ki anvan sa a t al kote Jezi lannuit la; misye te pote yon melanj lami ak lalwa, ki te prèske peze san liv.
40
Alò, yo te pran kò Jezi, epi, yo te vlope Li nan yon twal len ak fèy pafen yo, dapre koutim ke Juif yo te genyen pou antèman.
41
Alèkile, nan kote ke yo te antere Li a te gen yon jaden la; e, nan jaden an, te gen yon kavo nèf, kote ke yo patko janm antere pyès moun.
42
Kidonk, se la ke yo te met Jezi kouche, poutèt se te jou preparasyon Juif yo; e, vin twouve ke kavo a te tou pre a.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!