Liv Jan
Chapit 20
Klike la pou koute lekti chapit sa1
Nan premye jou semèn nan, Mari, moun Magdala a, vin byen bonè nan kavo a; te fè nwa toujou lè a; epi, li wè ke wòch la te deplase sot devan kavo a.
2
Alò, li kouri, e li vin kot Pyè, ak lòt disip la, sila ke Jezi te renmen an, epi li di yo konsa: Yo wete Senyè a nan kavo a wi! Lèfini, nou pa konnen kote y al mete Li.
3
Lè sa a, Pyè kouri ale ansanm ak lòt disip la, e yo rive nan kavo a.
4
Avredi, yo toude te kouri ansanm; men, lòt disip la te kouri pi vit pase Pyè, e li te rive an premye nan kavo a.
5
Epi, li kwoupi pou l gade anndan an, li wè twal len yo poze atè a, men li pa antre.
6
Alò, Simon Pyè vin rive apre l, e misye antre anndan kavo a, epi, li wè twal len yo poze atè a;
7
lèfini, mouchwa a ki te mare tèt Li a, pa t poze menm kote ak twal len yo, Men, li te plwaye yon kote pou kont li.
8
Lè sa a, lòt disip la vin antre tou, li menm ki te rive an premye nan kavo a; li wè, epi li kwè!
9
Vremanvre, yo patko konprann Lekriti a, kòmkwa Li te gen pou Li te resisite pami mò yo.
10
Apre sa, disip yo ale lakay yo ankò.
11
Men, Mari li menm te ret kanpe deyò kavo a ap kriye; pandan ke l t ap kriye a, li kwoupi, epi l gade anndan kavo a,
12
epi, li wè de zanj abiye an blan ki te chita; youn nan tèt kote yo te met kò Jezi kouche a, e lòt la nan pye a.
13
Epi, yo mande konsa: Madanm, poukisa w ap kriye a? Li di yo konsa: Se paske yo pran Senyè m nan y al avè L, e mwen pa konnen ki kote y al mete Li.
14
E, apre li te fin di sa a, li vire tounen, epi li wè Jezi ki te kanpe la; men, li pa t rekonèt ke se te Jezi.
15
Jezi di l konsa: Madanm, poukisa w ap kriye a? Ki moun w ap chèche? Manzè li menm ki te met nan tèt li ke moun nan se te jadinye a li te ye, li di l konsa: Mesye, si se ou menm ki pran L al avèk ou a; di m kote w mete L, epi m pral pran Li.
16
Jezi di l konsa: Mari! Li vire tèt li tounen, epi l di Li: Rabouni! Ki vle di, Mèt.
17
Jezi di li konsa: Pa manyen M, paske Mwen poko monte bò kot Papa M; men, al kote frè Mwen yo, di yo konsa: Mwen monte al kote Papa Mwen, e Papa nou tou; kote Bondye Mwen, e Bondye nou tou.
18
Mari, moun Magdala a vini, epi li di disip yo ke li te wè Senyè a, e ke Senyè a te di l bagay sa yo.
19
Apre sa, nan apremidi menm jou a, difèt ke se te premye jou semèn nan, lè sa a, tout pòt kote disip yo te reyini an te fèmen poutèt laperèz pou Juif yo, Jezi parèt nan mitan yo, epi Li di yo konsa: Lapè avèk nou!
20
E, lè Li fin di sa a, Li montre men L ak bò kòt Li ba yo. Alò, disip yo te kontan lè yo wè Senyè a.
21
Alèkile, Jezi di yo ankò: Lapè avèk nou! Tankou Papa M te voye Mwen an, se konsa tou Mwen voye nou.
22
E, apre ke L te fin di sa, Li soufle sou yo, epi L di yo konsa: Resevwa Lespri Sen an!
23
Nenpòt moun ke nou padone peche l, peche moun sa a va padone pou li; e nenpòt moun ke nou kenbe peche l, peche moun sa a va rete kont li.
24
Twouve ke Toma, youn nan douz yo, sila ke yo te rele Jimo a, pa t avèk yo lè Jezi te vini an.
25
Alò, lòt disip yo di misye konsa: Nou wè Senyè a wi! Men, misye di yo konsa: Eksepte si m ta va wè mak klou yo nan men L, lèfini, m ta va met dwèt mwen nan mak klou yo, epi m ta va met men m nan bò kòt Li, mwen p ap kwè.
26
E, uit jou apre sa, disip Li yo te anndan an, e Toma te avèk yo; alò Jezi vini, pandan ke tout pòt te fèmen, Li parèt nan mitan yo, epi Li di: Lapè avèk nou!
27
Apre sa, Li di Toma: Lonje dwèt ou isit la non, epi gade men M yo; lèfini, lonje men w, epi mete l nan bò kòt Mwen. Apre sa, se pa pou w san lafwa non; okontrè, se pou w kwè.
28
Alèkile, Toma reponn, e misye di Li konsa: Senyè Mwen e Bondye Mwen!
29
Jezi di l konsa: Toma, paske w wè Mwen, ou kwè; moun ki atout yo pa wè epi ki kwè yo, se moun ki beni yo ye.
30
E, gen anpil lòt mirak vremanvre ke Jezi te fè devan disip Li yo, ki pa rapòte nan liv sa a;
31
men, mirak sa yo ekri, dekwa pou nou ka kwè ke Jezi se Kris la, Pitit Gason Bondye a; epi, nan kwayans nou an, nou ka gen lavi atravè non Li.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!