Liv Jan
Chapit 21
Klike la pou koute lekti chapit sa1
Apre bagay sa yo, Jezi te montre tèt Li bay disip yo nan Lanmè Tiberyad la; e, men kijan Li te montre tèt Li a:
2
Te gen gwoup mesye sa yo ki te ansanm: Simon Pyè ak Toma ki te rele Jimo a, epi, Natanayèl moun Kana nan Galile, ak de pitit gason Zebede yo, epi, de lòt nan disip Li yo.
3
Simon Pyè di yo konsa: Mwen pral lapèch! Yo di l konsa: Nou menm tou, nou pral avè w. Y ale, epi lamenm, yo monte nan yon kannòt. Men, lannuit sa a, yo pa t kenbe anyen.
4
Men, pandan kounye a ke jou t ap louvri, twouve ke Jezi te kanpe bò lanmè a; Men, disip yo pa t konnen ke se te Jezi.
5
Alò, Jezi di yo konsa: Timoun, èske nou gen manje? Yo reponn Li: Non!
6
Ansuit, Li di yo konsa: Voye filè sou bò dwat bato a, epi nou va jwenn. Konsa donk, yo voye li, epi twouve kounye a ke yo pa t ka rale l akòz valè kantite pwason yo.
7
Alò, disip sa ke Jezi te renmen an di Pyè konsa: Se Senyè a wi! Alèkile, kou Simon Pyè tande ke se te Senyè a, misye met rad pechè pwason l lan sou li (paske li te toutouni); lèfini, li lage kò l nan lanmè a.
8
E, lòt disip yo vini nan yon ti bak (paske yo pa t lwen tè, se te a desan bras konsa), yo te rale filè ak pwason yo.
9
Alò, yonfwa yo te met pye yo sou tè, yo gade yo wè yon dife chabon la, ak pwason sou li, epi, pen.
10
Jezi di yo konsa: Pote kèk nan pwason nou fèk pran yo vini non!
11
Simon Pyè anbake, epi, li rale filè a rive sou rivaj la; li te plen ak yon valè gwo pwason ki te sansenkanntwa; e, atout yo te anpil konsa, men, filè a pa t chire.
12
Jezi di yo konsa: Vin manje non! E, okenn nan disip yo pa t oze mande Li: Kiyès moun Ou ye? Paske yo te konnen ke se te Senyè a.
13
Alò, Jezi vini, e Li pran pen, e Li ba yo; lèfini, Li fè menm jan an ak pwason an.
14
Kounye a, sa te fè twazyèm fwa ke Jezi te montre tèt Li bay disip Li yo, apre ke Li te fin resisite pami mò yo a.
15
Donk, lè yo fin manje, Jezi di Simon Pyè: Simon, pitit gason Jonas la, èske w renmen Mwen plis pase sa yo? Misye di Li: Wi Senyè, Ou konnen ke m renmen W! Li di misye konsa: Bay ti mouton M yo manje!
16
Li mande misye ankò yon dezyèm fwa: Simon, pitit gason Jonas la, èske w renmen Mwen? Misye di Li konsa: Wi Senyè, Ou konnen ke m renmen W! Li di misye konsa: Bay mouton M yo manje!
17
Li mande misye yon twazyèm fwa: Simon, pitit gason Jonas la, èske w renmen Mwen? Pyè te chagren difèt ke Li te mande l yon twazyèm fwa, «Èske w renmen Mwen?» an. Kidonk, misye di Li konsa: Senyè, Ou konn tout bagay, Ou konnen ke m renmen W! Jezi di l konsa: Bay mouton Mwen yo manje!
18
Anverite, anverite, M ap di w sa, lè w te jenn, ou te mare senti w pou kò w; epi, ou te pwomennen mache kote w te vle; men, lè w va granmoun, ou va lonje men w yo, epi, se yon lòt moun ki va mare senti w; epi, l ap pote w ale kote w pa vle.
19
Li te di sa pou montre pa ki kalite lanmò ke misye ta dwe glorifye Bondye. E, lè Li te fin deklare sa, Li di misye konsa: Suiv Mwen!
20
Alèkile, Pyè ki vire tèt li gade, li wè disip ke Jezi renmen an t ap suiv yo; se li menm tou an ki te piye sou lestomak Jezi pandan soupe a, e ki te mande: Senyè, kiyès k ap trayi W la?
21
Lè Pyè wè l la, misye di Jezi: Senyè, e kisa nonm sa a va fè?
22
Jezi di misye konsa: Si Mwen ta vle ke l rete jiskaske M vini, nan kisa sa gade w? Ou menm, suiv mwen!
23
Alò, pawòl sa a simayen pami frè yo, kòmkwa disip sa a pa ta dwe mouri; alòske, Jezi pa t di misye ke li pa ta dwe mouri, men pito, Si Mwen ta vle ke li rete jiskaske M vini, nan kisa sa gade w?
24
Se disip sa a ki temwaye de bagay sa yo, epi ki ekri bagay sa yo; e, nou konnen ke temwayaj li a se laverite.
25
E, gen anpil lòt bagay toujou ke Jezi te fè, si yo ta pran pou ekri sou yo chak, mwen sipoze ke menm lemonn pa t ap ka kenbe kantite liv ki ta dwe ekri yo. Amèn.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!