Liv Zèv Apot Yo
Chapit 1
Klike la pou koute lekti chapit sa1
Rapò ke mwen te ekri anvan an, O Teyofil, li te pale alafwa de tout bagay ke Jezi Kris te kòmanse fè yo, de sa ke Li t ap anseye,
2
jis rive nan jou kote ke Li te anlve anlè a; apre ke L te fin bay apot ke Li te chwazi yo lòd atravè Lespri Sen an.
3
Se ba yo menm tou ke Li te montre tèt Li tou vivan apre soufrans Li yo, pa mwayen plizyè prèv sètifye, kote ke yo te wè Li pandan karant jou; e Li t ap pale de bagay ki gen pou wè ak wayòm Bondye a;
4
epi, pandan Li te reyini ansanm ak yo, Li te kòmande yo pou yo pa kite Jerizalèm, Li di konsa: Men, rete tann pwomès Papa a, sa ke nou te tande Mwen te di a.
5
Paske Jan, vremanvre, te batize ak dlo; men, se va ak Lespri Sen an ke nou va batize nan kèk jou konsa.
6
Alò, lè yo te vin reyini ansanm, yo poze L kesyon, yo di: Senyè, èske se lè sa a ke W ap tabli wayòm Izrayèl la ankò?
7
Epi, Li reponn yo: Se pa nou menm ki pou konnen tan oswa epòk ke Papa a deside ak pwòp otorite Li.
8
Men, nou va resevwa pouvwa, apre ke Lespri Sen an vin sou nou; epi, nou va temwen M alfwa nan Jerizalèm, e nan tout Jide a, e nan Samari, ak nan kote ki pi lwen sou latè.
9
Alèkile, lè Li te fin di bagay sa yo, pandan ke yo te kanpe la ap gade, Li te anlve anlè, epi yon nyaj pran Li, e Li disparèt devan je yo.
10
E, pandan ke je yo fikse anlè nan syèl la ap gade L k ap monte, epi twouve ke de zòm abiye an blan te kanpe kote yo.
11
Yo di konsa: Nou menm moun Galile, pouki nou ret kanpe la a ap gade anlè nan syèl la konsa? Menm Jezi sa a ki kite nou an, e ki monte nan syèl la, Li va gen pou Li vini menm jan nou wè Li monte nan syèl la.
12
Apre sa, yo kite Mòn ki rele Oliv la pou retounen Jerizalèm, se te distans yon chemen jou Saba konsa.
13
Epi, lè yo te rive, yo monte anlè nan yon chanmòt kote yo te abitye rete; se te Pyè, ak Jak, ak Jan, ak Andre, Filip, ak Toma, Batèlmi, ak Matye, Jak pitit gason Alfe a, ak Simon Zelòt la, epi Jid frè Jak la.
14
Tout mesye sa yo, ak yon tèt ansanm te kontinye nan lapriyè ak siplikasyon, avèk medam yo, e Mari manman Jezi a, epi avèk frè Jezi yo.
15
Se konsa ke nan jou sa yo, Pyè leve kanpe nan mitan disip yo, epi li di: (kantite moun ki te la yo te rive anviwon sanven an total)
16
Moun yo, ak frè yo, Lekriti sa a, li nesesè pou ke l akonpli; kote ke pa mwayen bouch David, Lespri Sen an te pale anvan sa konsènan Jida ki te gid moun ki te pran Jezi yo.
17
Paske avredi, misye te konte pami nou, epi li te resevwa yon pòsyon nan ministè sa a.
18
Alèkile, nonm sa a te achte yon teren avèk lajan gany ki soti nan peche; epi, li tonbe tèt anba, li fann fal li nan mitan; epi, tout anndan zantray li gaye deyò.
19
E, se te yon istwa ke tout moun Jerizalèm te konnen, nan pwen ke nan pwòp lang pa yo, teren an pote non 'Akèldama', ki vle di, Teren san an.
20
Vremanvre, sa ekri nan liv Sòm yo: Se pou lakay li tounen yon kote ki bandone, e pa kite pèsonn ret ladan l; epi, se pou yon lòt moun pran plas li a.
21
Kidonk, pami mesye sa ki te la avèk nou yo tout pandan Senyè a t ap ale vini nan mitan nou an;
22
kòmanse apati de batèm Jan an, rive nan menm jou ke Li te anlve anlè kite nou an; se pou n chwazi yon moun kòm temwen rezireksyon Kris ansanm avèk nou.
23
Se konsa yo deziyen de moun: Jozèf yo te rele Basabas, ki te gen non jwèt, Jistis, epi, Matyas.
24
Alèkile, yo te lapriyè, yo te di: Ou menm, Senyè, ki konnen kè tout moun, montre pami yo de a kiyès ke W chwazi,
25
dekwa pou li patisipe nan ministè sa a, e nan gwoup apot yo, ke nan rebelyon l, Jida te lage pou l te ka ale nan pwòp kote pa li.
26
Se konsa ke yo fè yon tirajosò pou yo; epi, se sou Matyas lo a tonbe. E, misye te vin nonmen avèk onz apot yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!