Liv Zèv Apot Yo
Chapit 3
Klike la pou koute lekti chapit sa1
Yon lè, Pyè ak Jan te monte nan tanp lan ansanm nan lè lapriyè a, ki se nevyèm è a.
2
Epi, te gen yon nonm enfim depi nan vant manman l ke kèk moun t ap pote; yo te depoze misye chak jou devan pòtay tanp lan ki te rele 'Bèl antre' a, pou ke l te ka mande moun yo k ap antre nan tanp lan lacharite.
3
Donk misye, lè li wè Pyè ak Jan ta pral antre nan tanp lan, mande yo lacharite.
4
Lè sa a, Pyè fikse je l sou misye, ansanm ak Jan, li di: Gade nou!
5
Konsa, nonm nan vire je gade yo, li t ap atann aske l jwenn kichòy nan men yo.
6
Men, Pyè di konsa: M pa gen ankenn ajan ak lò; men, sa m genyen an, m ap ba w li: Nan non Jezi Kris, Moun Nazarèt la, leve kanpe, epi mache!
7
Lèfini, ak men dwat li, li pran misye, epi l rale misye kanpe; e menm lè a, zo pye l ak cheviy li yo te pran fòs.
8
Alò misye vòltije kanpe, epi l mache, li antre nan tanp lan avèk yo, li t ap mache, li t ap ponpe, e li t ap louwe Bondye.
9
E, tout moun t ap gade l k ap mache e k ap louwe Bondye.
10
E, yo te konnen ke se te li ki te chita ap mande lacharite a nan pòtay 'Bèl Antre' tanp lan; konsa, kè sote ak etònman te plen yo poutèt sa ki te rive misye a.
11
E, kòm nonm enfim nan pa t lage Pyè ak Jan yon may, tout moun yo ansanm te kouri al jwenn yo sou galeri ki te rele Galeri Salomon an, yo t ap poze tèt yo anpil kesyon.
12
Lè Pyè wè sa, li reponn moun yo: Nou menm moun Izrayèl yo, sa k fè nou sezi pou sa? Epitou, poukisa nou fikse je nou konsa sou nou de a, kòmsi se ta ak pwòp pouvwa nou, oswa poutèt jan nou sen ke nou fè nonm sa a vin mache a?
13
Bondye Abraram, ak Izarak, ak Jakòb e ak zansèt nou yo, Li te glorifye Pitit Gason Li a, Jezi; Li menm ke nou te livre a, epi ke nou te nye devan Pilat la, lè misye te deside lage L la.
14
Men, nou te nye Sila ki Sen an, Sila ki Jis la.
15
Lèfini, nou tiye Prens lavi a, Li menm ke Bondye te resisite pami mò yo; sa ke nou te temwen de li.
16
E, se non Li, pa mwayen lafwa nan non Li, ki fè nonm sa a jwenn fòs, misye ke nou wè la a, e ke nou konnen an; wi, se lafwa nan Jezi ki bay misye gerizon total sa a nan prezans nou tout ki la a.
17
Kounye a, frè yo, mwen konnen ke se iyorans ki lakòz nou te fè sa, menm jan an pou dirijan nou yo tou.
18
Men, bagay sa yo, Bondye te anonse yo davans yo nan bouch pwofèt Li yo, kòmkwa, Kris la t ap gen pou Li soufri; ebyen, Jezi akonpli yo.
19
Alò, se pou nou repanti; epi, pou nou konvèti, dekwa pou peche nou yo ka efase, lè tan soulajman yo a vini gras a prezans Senyè a.
20
Lè sa a, Li va voye Jezi Kris, Li menm ke yo te deja preche ban nou an.
21
Li menm ke syèl la dwe resevwa jis lè tan an rive pou tout bagay retabli; se de bagay ke Bondye te anonse pa mwayen bouch pwofèt sen Li yo, depi kòmansman lemonn.
22
Paske, se vre ke Moyiz te di zansèt yo konsa: Gen yon Pwofèt ke Senyè a va leve kanpe pou nou pami frè nou yo, tankou mwen menm; nou va koute Li nan tout bagay, kèlkeswa sa Li va di a.
23
E, sa va rive ke tout nanm ki pa koute Pwofèt sa a va gen pou yo detwi pami pèp la.
24
Wi, e, tout pwofèt yo, sot sou Samyèl ak sila ki vin apre yo, tousa nan yo ki te pale yo, se menm jan an tou ke yo te anonse jou sa a yo davans.
25
Nou se pitit pwofèt yo ak alyans ke Bondye te fè avèk zansèt nou yo, lè Li te di Abraram konsa: E, se nan desandans ou ke tout fanmi sou latè va beni.
26
Apre ke Li resisite Jezi, Pitit Gason Li a, se bay nou menm an premye ke Bondye voye Li pou beni nou, nan detounen Li detounen nou chak de peche nou yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!