Liv Zèv Apot Yo
Chapit 4
Klike la pou koute lekti chapit sa1
Pandan ke yo t ap pale ak moun yo, twouve ke sakrifikatè yo, kòmandan tanp lan, ak Sadiseyen yo parèt sou yo,
2
paske yo te fache dèske de mesye yo t ap anseye moun yo; epi, ke pa mwayen Jezi, yo t ap preche rezireksyon moun mouri.
3
Yo met men sou de mesye yo, epi yo kenbe yo ann atant pou demen, paske lè sa a, li te gentan aswè.
4
Men, anpil moun, pami sila yo ki te tande Pawòl la, te kwè; epi, nan gason yo, kantite a te rive senk mil konsa.
5
Alèkile, sa vin rive nan landemen ke chèf yo, ansyen yo, ak pwofesè lalwa yo,
6
ak Àn, sakrifikatè souvren an, ak Kayif, ak Jan, ak Aleksann, e ak tout manm nan fanmi sakrifikatè souvren an, yo tout te reyini ansanm nan Jerizalèm.
7
Epi, apre ke yo fin mete de mesye yo kanpe nan mitan yo, yo mande: Pa ki pouvwa, osinon nan non kiyès nou fè bagay sa a?
8
Alò, Pyè ki te ranpli pa Lespri Sen an, di yo konsa: Nou menm chèf pèp la yo, ak ansyen Izrayèl yo,
9
puiske jounen jodi a y ap poze nou de a kesyon konsènan bòn zèv ki fèt annegad nonm enfim nan, pou konn pa ki mwayen li te geri;
10
se pou nou tout konn sa, e tout pèp Izrayèl la tou, ke se nan non Jezi Kris, Moun Nazarèt, ke nou te krisifye a, ke Bondye te resisite pami mò yo, se pa mwayen Li menm ke nonm sa a tou geri, kanpe devan nou la a.
11
Se wòch ke nou menm k ap bati yo te jete a, ki vin tounen wòch prensipal kwen an.
12
Avredi, pa gen sali nanm nan okenn lòt moun; paske, pa gen ankenn lòt non ke yo bay pami lèzòm anba syèl la ki ta ka fè nou sove.
13
Alèkile, lè yo wè kalite asirans sa a lakay Pyè ak Jan, epi ke yo te reyalize ke se te moun òdinè ki pa t edike de mesye yo te ye, yo te sezi; yo pran enfòmasyon de yo, ke yo te avèk Jezi.
14
Men, lè yo gade nonm ki te geri a kanpe la a avèk de mesye yo, yo pa t ka di anyen kont sa.
15
Alò, yo ba yo lòd met kò yo sou kote, soti kite reyinyon Konsèy la; epi, yo diskite sa ant yo menm.
16
Yo t ap mande: Kisa nou va fè mesye sa yo? Paske, se tout bon vre ke gen yon gwo kalite mirak ke yo te fè, e li parèt aklè pou tout moun ki ret nan Jerizalèm; e, nou pa ka nye sa.
17
Men, pou sa pa gaye pi lwen nan mitan pèp la, vin nou menase yo e defann yo pale ak pèsonn moun ankò nan non sa a.
18
Apre sa, yo rele mesye yo, epi yo pase yo lòd pou yo pa pale ditou, ni anseye nan non Jezi.
19
Men, Pyè ak Jan reponn pou di yo konsa: Si wi ou non sa t ap dwat nan je Bondye pou ke nou de a ta koute sa n ap di nou yo, olye de sa Bondye di, jije sa nou menm!
20
Paske, nou pa ka fè lòt bagay ke pale de sa ke nou te wè ak sa ke nou te tande yo.
21
Konsa, apre ke yo te fin menase yo plis toujou, yo kite mesye yo ale, difèt ke yo pa t jwenn ankenn jan pou ta pini yo, poutèt pèp la, paske tout moun t ap glorifye pou sa k te fèt la.
22
Vremanvre, nonm ke yo te fè mirak gerizon sou li a te gen plis pase karantan.
23
Konsa, apre ke yo te fin lage, Pyè ak Jan al jwenn moun ki te akonpaye yo a; epi, yo rapòte tousa sakrifikatè anchèf yo ak ansyen yo te di yo.
24
E, lè moun yo tande sa, yo leve vwa yo bay Bondye, yon sèl kou ansanm, yo di: Senyè, Ou se Bondye ki kreye syèl, ak latè a, ak lanmè a, e tousa ki ladan yo;
25
se Ou ki te di pa mwayen bouch David, sèvitè W: Poukisa nasyon yo fin anraje konsa a, epi pèp yo ap manniganse bagay pou granmesi?
26
Wa sou latè yo soulve, e chèf yo met tèt yo ansanm kont Senyè a, ak kont Kris Li a.
27
Vremanvre, e Ewòd, e Pons Pilat, ak Payen yo, ak pèp Izrayèl la, yo te met tèt yo ansanm kont Jezi Pitit Sen Ou an,
28
dekwa pou yo ka fè tousa ke men W ak plan W te deside depi davans ki pou te fèt.
29
Kounye a Senyè, gade menas y ap fè yo; e, bay sèvitè W yo mwayen pou ke se ak yon asirans total ke yo anonse Pawòl Ou a,
30
W a va lonje men W pou W geri, epi pou mirak ak mèvèy kapab fèt nan non Pitit Sen W lan, Jezi.
31
E, lè yo te fin lapriyè, kote yo te reyini ansanm nan te pran tranble, epi, yo tout te ranpli ak Lespri Sen, e yo t ap anonse Pawòl Bondye a ak asirans.
32
E konsa, foul moun pami sa ki te kwè yo te fòme yon sèl kè, yon sèl nanm; ni pa gen youn nan yo ki te konsidere ke byen l te posede yo se pou li yo ye; okontrè, yo te posede tout bagay antre yo.
33
E, se ak yon kokenn chenn puisans ke apot yo t ap temwaye de rezireksyon Senyè Jezi a; epi, te gen yon gwo gras ki tonbe sou yo tout.
34
Ni pa t gen okenn pami yo ki te manke anyen; paske, tousa ki te posede teren oswa kay te vann yo, apre sa, yo te pote lajan lavant bagay yo ki te vann nan,
35
lèfini, yo te depoze lajan yo a nan pye apot yo; epi, distribisyon te fèt bay chak moun selon nesesite l.
36
Se konsa, Jozèf, ke apot yo te rele Banabas (lè w tradwi l, ki vle di: pitit gason konsolasyon an), ki se te yon Levit, moun ki te sot nan peyi Chip,
37
misye te gen yon teren, li te vann li, epi, li pote kòb la, e li depoze l nan pye apot yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!